انا مواطن عربي و عاوز اسافر بره بلدي لبلد اوروبي او امريكي أعمل اى ؟ - التفاصيل الكاملة

ايوة البطاقة الشخصية هي نقطة البداية، ليه؟ عشان بيبقي مكتوب فيها الوظيفة او اذا كنت طالب، طب ايه علاقة ده بالسفر؟ – هقولك انت لما بتيجي تستخرج جواز سفر مصري بيكتبولك الوظيفة او المهنة اللي في البطاقة حتي لو معاك ما يثبت غير كده مثال: لو في البطاقة مكتوب حاصل علي بكاليريوس تجارة هيتكتب كدة – “B. of Commerce” – وطبعا كدة قدام اي حد برة مصر انت “عاطل”.

طب حط نفسك مكان المسؤول في اي سفارة بيجيلة في اليوم الاف عوزين يسافره وهو مثلا مسموح يسفر ١٠٠ بس في اليوم هيختار اكيد افضلهم، طيب هو بقي يختار واحد ماعندوش شغل يعني ممكن يبق عبئ علي البلد ولا يختار واحد شغال قادر انه يصرف فلوس جوه البلد اللي هيروحها؟

يبقي لازم تكتب مهنة في الباسبور بتاعك، ازاي؟

– بص يا سيدي، لو انت بتشتغل في مكان ومتأمن عليك (تأمينات الاجتماعية) يبقي تغير البطاقة وهتختم الاستمارة من التأمينات بالوظيفة الجديدة.

– لو انت من اصحاب المهن الحره، زي طبيب، محامي، محاسب يبقي لازم تختم استمارة البطاقة من النقابة التابع لها.

طب لو مش متأمن عليا او مش بشتغل اصلا؟

بونص: ممكن تبقي صاحب شركة. هاتحتاج مبلغ في حدود ١٠٠٠ جنيه وعقد ايجار وتقدر تستخرج سجل تجاري (لا يقل رأس المال عن ٥٠٠٠ جنيه) وبطاقة ضريبية وبكدة تبقي صاحب شركة وبالتالي هتقدم الورق دة وانت بتعمل البطاقة الجديدة ويتكتبلك صاحب شركة كذا. و يتكتب في الباسبور – “Owner of X” – طبعا X دي بدل اسم الشركة، اكيد كدة وضعك قدام اي سفارة افضل.

طيب هايل جدا، هنفترض انك عملت كدة ودلوقت معاك بطاقة شخصية مكتوب فيها مهنة، نيجي بقي للنقطة الثانية.

دول شوية حاجات ممكن تحتاجهم وانت مسافر 

الموقف من التجنيد:

عشان تخرج برة البلد لازم ماتكونش مطلوب للتجنيد (طبعا البنات محظوظة هنا)، الموقف من التجنيد بيتكتب في الباسبور وبالتالي وانت خارج من المطار بتعدي علي شرطة الجوازات وبيشوفو انت مطلوب ولا لأ او لا قدر الله علي قائمة الممنوعين من السفر 

يبقي لازم تخلص ورق الجيش الاول، سواء اعفاء نهائي او مؤقت او مؤجل المهم يكون الجيش مش عاوزك دلوقت.

معلومة مهمة: لو انت معاف مؤقت او مؤجل يبقي لازم تستخرج تصريح سفر من الجيش، ودة بيتعمل في الهايك ستب او في منطقة تجنيد الزتون (تجنيد جسر السويس) – والموضوع بياخد ساعتين زمن وبيتكلف في حدود ٣٠ جنيه بس طبعا كل واحد وعلي حسب حالته.

ايه تاني لازم احضره؟

اخر حاجة لازم تحضرها،

حساب في البنك:

بص بقي احنا اتفقنا ان السفارات عاوزة الناس اللي تصرف في البلد وبالتالي بيطلبو ضمان مالي للسفر – يعني هتصرف منين وانت مسافر؟
و بالتالي لازم تعمل حساب في بنك درجة اولي وتكون مصروفاته قليلة انا انصح بواحد من البنوك دي: البنك الاهلي – بنك اسكندرية – بنك القاهرة – بنك مصر، البنوك الاجنبية خدمتها افضل بس مصروفاتها كتير.

طبعا هتعمل الحساب بالبطاقة واعتقد الحد الادني لفتح الحساب ٢٠٠٠ جنيه وتطلب تستخرج بطاقة فيزا او ماستر كارد تكون بتشتغل برة مصر وكمان تطلب ان الحساب يكون مكتوب فيه الاسم بالانجليزي (عشان يبقي زي اسمك في الباسبور بعد كدة). وكمان المعاملات تكون بالانجليزي في كشف الحساب.

طيب خلاص كدة؟ لا طبعا سعادتك كل يومين او ثلاثة تروح تعمل عمليه في الحساب سواء سحب او ايداع بأي مبلغ عشان تعمل حركة علي الحساب، طب ليه؟
عشان السفارات مش عاوزة واحد فتح حساب حط مبلغ مستلفه وهيسحبه تاني يوم ويضحك عليهم، فبيطلبو حساب عليه حركة ولما تطلع الـ “Bank Statment”  او كشف الحساب لازم تكون بالانجليزي وتكون لمدة تغطي ٣ شهور علي الاقل.

كدة انت جهزت نفسك تمام، معاك بطاقة فيها وظيفة وموقفك من التجنيد وعملت حساب في البنك،

الخطوة اللي جاية انك تستخرج جواز سفر ودي هغطيها في المقال دة  سلام.