إزاى تحوّش فلوس السفر؟

بعد ما النت عرّفنا إن الدنيا مش بس باريس ولندن.. كل واحد بقى ليه قايمة بالأماكن اللي نفسه يزورها، بس نجيب  منين الفلوس؟

عشان السفر ميفضلش حلم  وصور بنعملها شير على الفيس بوك وبس، الموضوع مش محتاج فلوس من حد، ومش دايمًا محتاج شغل ليل نهار، ولا حتى مرتب كبير.

أمال محتاج إيه؟.. أولًا نحدد هنروح فين؟ و الهدف ده محتاج أد إيه؟ كمان متحطش عينك على فنادق خمس نجوم، ولا تذكرة Business Class للطيران. خلاص جهزت كل المعلومات وهتسافر بعد أد إيه.. نبدأ نحوّش للسفر بقى.. إزاي؟

برطمان السفر: The Travel Jar

فاكرين زمان أهالينا كانوا بيعلمونا نحوّش، ولمّا كبرنا اتفرجنا على فيلم الكارتون "UP". في الفيلم، "كارل" و"إيلي" كانوا عاملين برطمان كبير، راسمين عليه المكان اللي عايزين يسافروا ليه "شلال الفردوس".

أي بيت مصرى فيه كمية برطمنات أشكال وألوان وأنواع، اختارلك واحد وحط فيه صورة المكان اللي بتحوش له. وكل يوم لمّا ترجع البيت، فضّي الفكة اللي في جيوبك كلها فيه. وأوعى تفتح البرطمان كل شوية وتعد، سيبهم ببركتهم، وافتحه بس لمّا خلاص تكون بتحجز تذاكر السفر.

الخطة الخمسية – إمشي وشد الحزام

ولأن الفلوس من الطيور، يعنى من الحاجات اللي مبتيطقش تُقعد مكانها في المحفظة، ولازم الواحد يحلّق عليها عشان متتصرفش، يبقى لازم نعملها خطة خمسية من بتوع الحكومة.

عشان تسافروا لازم تبقى مُدبّر، يعني إيه؟ أولًا اعرف أنت بتصرف حوالي قد إيه في اليوم؟ وبتصرفهم على إيه؟ وبعدين تحجم صَرف الفلوس إلّا على الحاجات الأساسية بس، زى فلوس الانتقالات، ولو هنجيب لبس جديد يبقى في المعقول.

لو مش بتعرف تمسك إيدك.. ادخل جمعية واقبضها الآخر، مفيش أكتر من الجمعيات اللي الأم المصرية بتتحايل على ولادها يدخلوها.

كمان بدل ما تصرف فلوسك على التاكسي والموصلات الكتير، ممكن نستخدم المترو بأي طريقة في الخروجة أو بدل ما تركبوا تلات موصلات، اركبوا اتنين وامشوا شوية. أو اصحى بدرى اتفسح بأتوبيس النقل العام.

 كُل في بيتك

تقريبًا أكتر الناس بتشتغل عشان تصرف  فلوسها على الأكل من بره، ونسمع كل أم بتحسبن على القلقاس اللي نايم فى التلاجة وقبله السبانخ، ومش لاقيين اللي يعبرهم.

عبرهم أنت وكُل فى البيت، أكل البيت حلو وبيشبع ويوفر فلوس الأكل من بره، وكمان بيوفر فلوس "الأنتينال". على فكرة عادي ناخد سندويتشات معانا الجامعة والشغل ولو مامتك عملت أكل مش عاجبك، ممكن تطبخ اللي أنت عايزينه.

الموضوع ده هيوفر معاك حوالي من خمسين لـ مية جنيه  في الإسبوع، على حسب صرفك على الأكل وأدوية المعدة.

مشروع صغير

عشان تحقق حلمك، لازم تشتغل على نفسك، في ناس ممكن تشتغل شغلانتين، وفي ناس بتستنفذ مواهبها، و منها استثمار ومنها تظبط فلوس السفر.

أعرف ناس ابتدوا عملوا "إكسسوارات" ويبعوه وناس بتعمل الدبابيس الملونة دي. فى بنات ذكية كانت بتعمل كب كيك وبيبعوه وبيسوقوه على حسابهم على الفيس بوك.

الموضوع مش بس ربح وتحويش  الموضوع بيقلب بمهارات تعامل وعرض، والواحد بيصبح جاهز نفسيًا لفكرة "غريب في بلاد غريبة".

 طب واللغة؟

 وفر فلوس الكورسات واتعلم أي لغة أون لاين، وفي مواقع كتير ببلاش لتعليم المبتدئين، ومواقع للممارسة وكلها ببلاش. عشان تعرفوهم اضغطوا هنا

لو عملت الخمس خطوات دي، ممكن تحوش فلوس رحلة كاملة للهند أو لبنان أو ماليزيا. وعشان تخطط كويس للأمور المادية وتحسبها صح في تطبيقات ممكن تنزلها على تليفوك، تسهل عليك الموضوع عشان تعرفها اضغط هنا.