#أفكار_جديدة_جدا #سيارات #دخان
كل اسباب خروج دخان اسود من الشكمان في السيارة

السلام عليكم ورحمة الله وبركاته واهلا وبيكم في قناة افكار جديده جدا ومعكم هاني

هنتكلم في عجالة عن اسباب خروج دخان او عادم اسود من الشكمان.

بس الاول كده شرفنا باشتراكك في القناة وفعل علامة الجرس، وندخل بقى في الموضوع علطول.

.اول سبب
ان الشرارة اللي طالعة من البوجيهات ضعيفة ومبتقدرش تحرق خليط الوقود بالكامل، وضعف الشرارة لها اسباب كتير جدا، بدايتها من البطارية والدينامو ونهايتها في البوجيهات نفسها، مرورا بالموبينة وكابلاتها والاسبراتير بمحتوياته.

يعني لو البوجيهات مرطبة او فيها تسريب كهربا بسبب شروخ صغيرة في طبقة السيراميك العازلة بين القطب الموجب والسالب، او لو كان الخلوص بتاعها مفتوح او مقفول بزيادة، او حتى لو كان نوع البوجيهات غير اصلي.

لو الدينامو ضعيف او السير بتاعه مرخي، او الكابل اللي طالع منه مش راكب كويس او عليه طين او اكسدة او صدا ومش موصل للبطارية تيار كامل.

او اي كابل من كابلات الموبينة سواء داخل ال١٢ فولت او خارج ال١٢ او خرج الضغط العالي او اي كابل من كابلات الاسبراتير اللي رايحين للبوجيهات او الشاكوش بتاع الاسبراتير او وش الاسبراتير او حتى الابلاتين مش مظبوط او ملدوع او الكوندنسر بدأ يضرب، كل دي اسباب مرتبطة بس بكهربة الموتور، واي واحد منهم يعملك دخنة سودة.

تاني سبب ان الخليط نفسه غني بالبنزين اكتر من اللازم.. او مفتقر للهوا اقل من اللازم وبالتالي بيصعب حرق خليط الوقود بشكل كامل، وده غالبا بيكون سببه تركيب بك بنزين اوسع من الطبيعي، او ضيق او كتمة في بيكات الهوا، او كتمة في فلتر الهوا بسبب أتربة او زيوت، او بوش في بوابة السرعة في الكربيراتير اللي فيه اكتر من بوابة، اما في العربيات الانجكشن ممكن تسييل في الرشاشات، ومحتاجة تنضيف او تغيير، او مشكلة في حساس الشكمان او حساس الاكسجين حسب الاسم اللي تعرفه به، ومحتاج يتنضف او يتغير.

تالت سبب ان كهربة الاسبراتير مأخرة بزيادة، بحيث ان الشرارة مبتلحقش تحرق الخليط، لانها بتخرج بعد بداية نزول البستم عن اعلى نقطة، والطبيعي انها تخرج في لحظة وصول البستم لاعلى نقطة في غرفة الحرق.

او في مشكلة في الكامات او التاكيهات بتخلي غرف الحرق تفتح قبل ميعادها، وبالتالي الخليط مبياخدش فرصته كاملة، لان الكامات والتاكيهات وجهين لعملة واحدة، وهم المسؤولين عن فتح وقفل الصبابات او الصمامات، ولو صباب الوقود طول شوية في الفتح يبقى هيسحب وقود اكتر، ولو صباب العادم فتح بدري شوية هيخلي الخليط يخرج قبل ما يكتمل الحرق بتاعه، وممكن اما يخرج على هيئة دخان اسود، او يخرج بفرقعة او نار من الشكمان.

ممكن سبب واحد او اكتر منهم يعمل دخنة سوداء، وبالتالي ضعف في اداء السيارة وزيادة في استهلاك الوقود وكمان تلوث للهواء وامراض للمجتمع كله، مش بس صاحب العربية.

وفي اللحظة دي نكون وصلنا لنهايه حلقتنا وإلى اللقاء في حلقه جديده والسلام عليكم ورحمة الله وبركاته.


د