#أفكار_جديدة_جدا
#سيارات
#بنزين

خلال خمس سنين كل أسباب زيادة استهلاك البنزين

السلام عليكم ورحمة الله وبركاته، أهلا بيكم في فيديو جديد ومعاكم هاني، حلقة النهارده هتكون عن كل خطوة عملتها قللت معايا استهلاك الوقود طول فترة تعاملي مع العربية، وكل خبرة خدتها في ال 5 سنوات الماضيين باختصار في الفيديو ده.

بس الاول شرفنا باشتراكك في القناة وفعل علامة الجرس، ونبدأ على بركة الله.

أول ما جبت العربية كان استهلاك البنزين فيها 4.5 كم لكل لتر بنزين 80، يعني ٩٠ كم في الصفيحة اللي هي٢٠ لتر، وهسيبلك فيديو بيحسب متوسط الاستهلاك الحقيقي بشكل عملي تقدر تعتمد عليه.
ث.٤٣
https://youtu.be/zs-omIFtq3M

وكان سبب زيادة الاستهلاك ده وقتها، هو تقريبا كل الأسباب اللي ممكن تعمل المشكلة دي، وكان أولها هي طريقة السواقة، لأني كنت لسه متعلم جديد.

وكمان بعد طريقة السواقة عملت حاجات كتيرة كل خطوة منها ساهمت بجزء معين في توفير البنزين.

أول خطوة كانت ظبط التاكيهات، وتغيير كابلات البوجيهات، وظبط خلوص البوجيهات بالفيلر على ورقة 70، وبعدها فكيت الكربيراتير ونضفته كويس جدا وراجعت بيكات البنزين وركبتها زي مقاساتها في الكتالوج، 115 البك الأول، لكن بك البوابة التانية ركبته 110 بدل 125 عشان أقلل سرعة العربية شوية، وأجرب أثرها على استهلاك البنزين، وظبطت مسمار الهوا على 3 لفات عكس عقارب الساعة.

بعد كده دخلت على الاسبراتير، غيرت الأبلاتين والكوندنسر، لكن الأهم إني ظبطت خلوص الأبلاتين زي الكتالوج ما بيقول، على ورقة 40 بالفيلر

قسمت كهربة الاسبراتير وظبطته ع الشعرة، وراجعت داخل وخارج الموبينة، يعني كابل ال12 فولت، والكابل اللي رايح للاسبراتير، وكابل الضغط العالي.

سير الدينامو لقيته مش مشدود كويس،وعشان تعرف انه مش مشدود، هتجرب تلف طنبورة الدينامو او طنبورة طلمبة الميه بإيدك والعربية مطفية، لو قدرت تلفها يبقى السير مريح ولازم يتشد أو يتغير، لأن الكهربا اللي طالعة من الدينامو هي أساس كل كهربا في العربية.

المهم بعد الشغل ده كله، اللي خدت فيه شهور، بقيت لما افك البوجيهات ألاقي سنونها مفيش عليها اي كربون أو هباب، لأن كل حاجة عندي مظبوطة.

وفي الوقت ده العربية وصلت معايا ل7.5 كم بكل ١ لتر بنزين 80 كمتوسط تشغيل في الظروف العادية، يعني 150 كم في الصفيحة.

كنت متصور إن ده أفضل رقم ممكن أوصل له على الإطلاق، لكن شهر في التاني وبطارية العربية بدأت تعمل مشاكل وتنام مع كل يومين تلاتة ركنة، ووقتها لقيت البوجيهات بدأت تعمل كربون تاني، والاستهلاك بقى اعلى شوية لكنه مش سيء.

قررت وقتها اغير البطارية بعد ما اتأكدت إنها خلاص مش نافعة، وفي فيديوهات فحص لها على القناة، لكن إن شاء الله هعمل فيديو عملي هيكون أكثر شمولية ودقة في فحص البطارية قبل قرار تغييرها.

بعد تغيير البطارية الاستهلاك اتحسن معايا أكتر، ووصلت من 7.5 ل 8.6 كم في كل ١ لتر من بنزين ٨٠.
بدأت أراجع الفرامل كمان وبدأت أحسن من طريقة سواقتي أكتر، وكمان بدأت أشيل كل حاجة من العربية عاملة وزن وملهاش أهمية، لحد ما وصلت لمتوسط استهلاك في مرة من المرات ل 9.25 كم في كل ١ لتر بنزين 80، وللعلم كل الحسابات دي شاملة المشي في الزحمة والطرق المفتوحة والتسخين والمطبات واشارات المرور، يعني متوسط استهلاك في كل الظروف مش في الطرق السريعة بس.

لما شديت العربية وجددتها بالكامل، حسبت الاستهلاك معاها كذا مرة على مدار شهور، لقيت إني وصلت في مرة ل 9.75 كم لكل ١ لتر من بنزين 80 كمتوسط استهلاك، لكن بعد الرقم ده لقيت الدنيا باظت خالص ونزلت تاني ل7 أو أقل كمان.

راجعت كل حاجة من جديد، لحد ما اكتشفت كذا مكان بيسرب بنزين، مرة خرطوم مش مربوط، مرة مدخل البنزين في الكربيراتير، وأخر حاجة كانت شرخ في زور تنك البنزين، عالجته زي ما شوفتوني في الفيديو اللي فات قبل ده، ومستني اشوف النتيجة بعد كذا تجربة عشان اتأكد منها.

العربية حاليا بتدور معايا من أول تكة، مش بتحتاج أكتر من دقيقة أو اتنين تسخين مهما طالت فترة الركنة، السحب والجري على الطريق تمام ومفيش أي تقطيع ولا بتقصر معايا في تخطي العربيات التانية على الطريق وحاضرة معايا في دوسة البنزين، ومفيش ريحة عادم ولا بنزين ني ولا في كربون على البوجيهات، يعني كل حاجة تمام وفاضل بس اعرف النتيجة ايه وابلغكم.

كل الكلام اللي قولته في الفيديو ده، والخطوات اللي عملتها، لها فيديو شرح عملي على القناة هتلاقيها كلها متجمعة في بلاي ليست أو قايمة هتظهر معاك في اخر الفيديو وهتلاقيها كمان في الوصف أسفل الفيديو،

وبكده نكون وصلنا لنهاية حلقتنا، لايك بقى للفيديو، وبلاش توقف الفيديو عندك، وابعته لكل أصحابك اللي عندهم مشكلة مع البنزين والسلام عليكم ورحمة الله وبركاته.