#تجديد_سيارة
#أفكار_جديدة_جدا
#عربية_قديمة

بعد تجربتي في شد وتجديد العربية ندمان ولا فرحان؟ ونصيحة مهمة في اخر الحلقة.

اهلا بيكم في قناة افكار جديده جدا ومعاكم هاني، ونبدأ مع بعض خطوة بخطوة كده ونشوف سلبيات وايجابيات اعاد تجديد سيارة قديمة او شد عربية قديمة، عشان نقدر نقرر القرار السليم قبل اتخاذ اي خطوة في الموضوع ده.

بس الاول كده شرفنا باشتراكك في القناة وفعل علامة الجرس وتابعني لاخر الفيديو.

اولا الشق الاول وهو الايجابيات.

عربيتك القديمة انت بس اللي عارف قيمتها، وعارف ايه فيها كويس وايه محتاج شغل.
عشان كده لما تشدها او تجددها هتبقى عارف تصرف على ايه وتخلي ايه، وطبعا هتبدأ بالأساسيات قبل الشكليات، ده طبعا لو بتشدها لنفسك مش للبيع... لان اللي بيشد عربية للبيع عارف شغله ومش محتاج مننا نصيحة.

وبالتالي بعد التجديد هتبقى عربية قليلة الاعطال وشكلها ولونها على مزاجك، غير انك تشتري عربية غيرها شكلها كويس بس اساساتها مش مضمونة، ومتعرفش هتشتغل معاك لحد امتى وهتحتاج مصاريف ايه.

ثانيا
هتعرف صنايعية كتير ومحلات قطع غيار كتير وسعر قطع الغيار برضو، والاهم من ده كله انك هتاخد خبرة اكبر في مجال السيارات من وقفتك مع الصنايعية واللف على المحلات والتجار.

مش هتحتاج تجري ولا تلف على المرور والمحاكم عشان تبيع عربيتك وتشتري عربية تانية، وممكن تتعرض لاي مخاطر سواء نصب او سرقة او غش، وياما ناس خدت مقالب كتير واشترت عربيات غير مقبولة في المرور او عربيات فيها اعطال خفية بأسعار اعلى من قيمتها، وبالفعل مفيش حد مضمون.

الشق التاني في حلقتنا هو سلبيات تجديد عربية قديمة، وهتكون كالتالي.

اولا
المصاريف اللي هتصرفها على عربيتك القديمة هتكون اكبر من الفرق اللي هتحطه عليها وتجيب واحدة تانية زيها بس حالتها احسن، على افتراض ان حالتها هتكون فعلا حلوة خارجيا وداخليا.

ثانيا
هتاخد شهور لف وتعب بسبب التعامل مع الصنايعية، ولو مكنتش حاضر معاهم في كل خطوة يبقى هتاخد احلى مقلب وعربيتك هتتبهدل وتتقلب وتتكروت في الشغل وهتندم اشد الندم بعد كده على حال العربية وعلى خسارة فلوسك.

ثالثا
هتلاقي نفسك مهمل في شغلك وبيتك ونفسياتك وحشة بسبب مشاكل كل يوم مرتبطة بالعربية والصنايعية وقلقك انها تطلع وحشة في الاخر ومجهودك يروح هباء... وزعلك على كل قرش عمال يطير بدون نتيجة مضمونة.

رابعا
عربيتك بتتجدد يعني هتلاقي نفسك بتصرف مواصلات كتير وبعد ما كانت عربيتك حاضرة معاك طول الوقت اصبحت زي الناس بتقف تستنى ميكروباص ولا توكتوك، الا لو معاك وسيلة نقل تانية.

هتخسر كتير بجانب اللي هتصرفه، لان في حاجات هتبوظ من الركنة زي البطارية، وحاجات هتبوظ في ايد الصنايعية زي الازاز، وحاجات هتضيع وسط الشغل لما تفكها وتسيبها عندك او عند اي صنايعي او هتتسرق عادي ومش هتاخد عوضها سواء ضاعت او باظت او اتسرقت، او بقى هتقضيها خناقات ومشاكل وهتاخد شغل سيء جدا، لان الصنايعي لو مزاجه وحش معاك مش هيظبط الشغل.

كل دي سلبيات هنقابلها واحنا بنشد العربيه بتاعتنا بس لازم نتعلم الاول ازاي نمنعها او على الاقل نتجنب بعضها علشان منرجعش نندم بعد كده اننا خذنا الخطوه دي.

تالت شق في الحلقة هو رأيي الشخصي.

اما بقى بالنسبه لراي الشخصي في الموضوع انا هتكلم عن تجربتي انا مش تجربه حد ثاني وبرده ما تاخذش برأيي الا لو كنت في نفس ظروفي.

اكبر مشكله او على الاقل بالنسبه لي كانت اكبر مشكله هي ان العربيه مش معايا وفضلت مش معايا تقريبا ثلاث شهور على ما خلصت

رغم ان التكلفه عليت عليا عن المتوقع شويه ورغم اني تعبت واتبهدلت فيها وما كنتش عايش حياتي الطبيعيه عادي لكن عدم وجود العربيه معايا كان اكبر من كل المشاكل دي

طيب لو الزمن رجع بيا لورا، اشدها ولا لا رغم انها طلعت احسن بكثير مما كنت اتوقع ورغم انها كلفت اكثر شويه مما كنت اتوقع بس الموضوع مش هاقدر احسمه بشكل قاطع لاني برده ممكن لو كنت بعت وكملت عليها واشتريت غيرها ما اخدتش نفس النتيجه اللي اخذتها بعد ما خلصت عربيتي وشدتها...

لكن بالفعل غياب العربيه عني فتره طويله متواصله هو اكبر مشكله تخليني افكر قبل ما اعمل التجربه دي ثاني و اشتري عربيه ثانيه مكانها احسن و تقضي معايا فتره وقبل ما اشدها برده هي كمان اكون مكمل عليها وبايعها.

بس برضو لازم نشوف العربية بتاعتنا بعد التعب والمصاريف والعطلة هتقدر تستمر معايا فترة قد ايه.

وطبعا ان شاء الله لو استمرت فتره طويله يبقى الشد احسن من اني اشترى حاجه ما اعرفش جواها ايه.

بس انت برده فكر ودورها في دماغك قبل ماتقرر علشان متاخدش قرار وترجع تندم عليه.

ولو عندك معلومة جديدة اكتبهالنا في تعليق عشان تعليقاتكم هي الجزء المكمل للحلقة.

وفي اللحظة دي نكون وصلنا لنهايه حلقتنا لايك بقى وشير للفيديو قبل ما تقفل والى اللقاء في حلقه جديده والسلام عليكم ورحمه الله وبركاته