#أفكار_جديدة_جدا
#قانون_السايس
#قانون_السايس_الجديد
#السايس_في_مصر

قانون السايس الجديد

السلام عليكم ورحمه الله وبركاته و
اهلا بيكم في قناة افكار جديده جدا ومعاكم هاني.

مهنة السايس اللي منتشرة في كتير من شوارع مصر من زمان هي مهنة غريبة وغير رسمية ومفيش ليها قانون ينظمها، ولا مسؤول يحاسب السايس ده وكل السياس واخدينها اما بالحب او بالبلطجة، وان كان لها فوايد فأضرارها اكتر

لدرجة اني في مرة ركنت في مكان ودفعت للي واقف هناك اول ما ركنت، ولما جيت امشي لقيت واحد تاني جاي عايز فلوس، قلتله انا دفعت في الاول، قال مهو مش ليا، سيبته ومشيت بدون ما ارد عليه حتى.

يعني هو مطلوب مني أرش عليكم كلكم يعني ولا انتوا كام واحد، ولما انت صاحب المكان سايب غيرك يقلب الناس ليه؟

المهم ان القانون الجديد ده بقى مش هيأثر كتير على بلطجة وسرقة السياس القدام زي الحكومة ما صرحت بكده، ولا له اضرار زي ما ناس كتير فاكرة، لان اغلب الناس فاهمة غلط والحكومة كمان صعب تطبق قانون شامل بشكل مفاجيء، لكن القانون هيحاول يحل المشكلة دي بشكل تدريجي مع الوقت.

عشان كده هنتكلم عن الشائعات المغلوطة المثارة حوالين القانون ده وهنوضح الحقيقة للجميع.

وباختصار كده عشان محدش يتوه مني، الحكومة هتشري او هتأجر اراضي هي او شركات هتكون شريكة معاها بنسبة من الارباح، وتعمل الاراضي دي ساحات مخصصة للركن في كل المدن الكبيرة في كل محافظات مصر في الشوارع الرئيسية، لكن عمليا لسه لم يتم تطبيق القانون ده الا في اماكن قليلة في القاهرة والجيزة والإسكندرية، رغم ان تم تفعيله بشكل رسمي.
لان زي ما قولنا انه محتاج ترتيبات كتير وتجهيزات لساحات الركن واختيار السايس المناسب لكل مكان.

والقانون ده هدفه الاساسي تجهيز ساحات مخصصة للركن لتقليل الركن في الشوارع وتقليل الزحام، لكن منطقيا كده انا مش هروح اركن بفلوس واسيب ركنة مجانية، مش معقول ابقى طالع مشوار وهحتاج اقف كذا مرة اقوم دافع كل مرة ١٠ جنيه، انا كده اركب اوبر ارخص، بس برضو ده بيحصل كتير مع السياس القدام عادي.

والرسوم اللي هتدفعها بقى زي ما كلنا عارفين او عرفنا هتكون ١٠ جنيه للعربية الملاكي في حال الانتظار المؤقت، و٢٠ جنيه للنص نقل و٣٠ للعربيات الكبيرة، في حال الانتظار المؤقت برضو و٣٠٠ جنيه شهريا لو هتسيب العربية تبات كل يوم في ساحة من الساحات اللي يشملها قانون السايس.

يعني الرسوم دي هتدفعها في حال انك ركنت في ساحة من الساحات دي فقط مش على اللي راكن تحت بيته ولا راكن على الطريق في اي مكان او على الرصيف في الشارع.

يعني الرسوم دي هتدفعها للسايس الحقيقي اللي معاه رخصة من الحكومة ومنطبق عليه شروط مزاولة المهنة دي، وهتاخد وصل رسمي منه، ولو حصل خلاف معاه تعرف تاخد حقك منه ومش هتتعرض للبلطجة معاه لانه يعتبر موظف حكومي.

يعني لو ركنت خارج الساحات دي محدش هيطالبك بفلوس الا السايس القديم اللي كلنا متعودين عليه وعارفينه كويس، فلو مش عايز تدفع للحكومة حاجة متركنش عندهم لحد ما يجي وقت وميبقاش في موقف او ساحة خارج سيطرة الحكومة.

في معلومات كتير بخصوص الموضوع ده زي شروط الحصول على رخصة للسايس والسايس هيدفع ضرايب كام للدولة وزي عقوبة السايس في حال مخالفة القانون وكمان معلومات مالية اكتر وتوقعات نجاح او فشل الفكرة، بس كل ده هنشوفه مع بعض في حلقة مستقلة لكن هنعملها في حال زيادة تفاعل الناس على الحلقة دي، باللايك والشير والتعليقات، يعني لو مهتم بالموضوع اظهر اهتمامك بعمل لايك وشير، وختاما شكرا لمتابعتكم وإلى اللقاء في حلقة جديدة والسلام عليكم ورحمة الله وبركاته.