#صرف_الوقود
#استهلاك_البنزين
#توفير_البنزين

العربية بتاكل بنزين كتير، اعمل ايه.

كان لنا فيديوهات سابقة عن الاسباب والعلاج
لكن الفيديو ده هقولك ازاي تبدأ تتعامل وتحل المشكلة بأقل التكاليف.

لان في ناس بتبدأ بالحاجة الصعبة المكلفة وتخلي الاسباب السهلة في الاخر وبيطلع العطل من الاسباب السهلة.

لازم تبدأ الاول بالكشف عن الاسباب غير المكلفة او اللي تكلفتها بسيطة.

في ناس بتروح تغير ديسك واسطوانة وبيطلع العطل مثلا من الموبينة.

وناس بتغير موبينة وبوجيهات وكابلات مرة واحدة وبيطلع العيب من الفرامل مثلا.

عشان كده هبدأ معاك خطوة خطوة لحد ما تحل مشكلتك.

اول خطوة هتاخدها انك تركز مع كل نقطة توصيل بنزين في دورة البنزين في العربية، من اول التنك وغطا التنك لحد مدخل البنزين في الموتور مرورا بطلمبة البنزين والفلتر والخراطيم.

لازم تتأكد ان مفيش تسريب او ترشيح بنزين في اي مكان من الاماكن دي.

طيب هتتأكد ازاي؟
هتدور العربية وتاخد لفة وتتأكد ان مفيش بنزين مرشح، خاصة في اماكن التوصيل، اللي هي وصلة خرطوم البنزين في التنك
او دخل وخرج الطلمبة
او دخل وخرج الفلتر
او داخل وراجع الكربيراتير او داخل الرشاشات، او الكربيراتير بيشرق او الرشاشات بتسيل بنزين.

وكمان تتأكد ان مفيش تراب محمر على نقط التواصل دي كلها وانها كلها نضيفة.

وكمان تتأكد ان العربية بتدور معاك بسهولة بعد فترة يومين تلاتة ركنة، لان التسريب بيفضي دورة البنزين وقت الركنة، وبالتالي بيكون البنزين غير حاضر في وقت الدورارة بعد فترة ركنة.

لو لقيت تسريب سهل تعالجه وهتلاقي فيديوهات على القناة لعلاج المشاكل دي

اما بقى لو
لقيت مفيش تسريب؟

يبقى نتنقل للخطوة التانية، وهي انك تحل كل بوجيهات العربية واحد واحد، وتتأكد من كذا حاجة.
اولا انها مش مكربنة زي الصورة دي ولا حارقة زيت زي الصورة دي.

لقيتها مكربنة يبقى تتأكد ان خلوص البوجيهات مظبوط زي الكتالوج، اللي غالبا بيكون بورقة فيلر ٧٠ او ٨٠.

وتتأكد ان كابلات البوجيهات حاكمة على البوجيهات كويس جدا ومش محمصة او بتشرز او بتكهرب.

وتتأكد انها حاكمة في الموبينة او الاسبراتير كويس جدا وبايتة مكانها صح.

كابل الكهربا اللي واصل للموبينة اللي هو موجب الموبينة لازم يكون مربوط كويس ومش متأكسد ولا محروق من السخونة.

بعد كده اطلع مشوار صغير كده ١٠ كم ولا حاجة ويكون بالليل بس حاول تقلل استخدامك للفرامل، يعني يكون مشوار سالك وطريق مفتوح.

بطل العربية بقة وانزل بس جس حرارة الجنوط الاربعة.

الطبيعي تكون حرارة الجنوط الامامية اعلى من الخلفية، وكل اتنين جنب بعض بنفس درجة الحرارة تقريبا، وتكون الحرارة محتملة على ايده، يعني لو ايدك اتلسعت من جنط يبقى عندك مشكلة في فرامل العجلة دي ولها اسباب متعددة ممكن نسردها في فيديو مخصوص، لكن غالبا استك الخزنة بيكون السبب وهتلاقي شرح طريقة تغييره في الفيديو اللي هيظهر قدامك فوق دلوقتي.

البطارية لازم تكون قوية هي وشحن الدينامو عشان شرارة الموتور تكون قوية كفاية.

هوا العجل لازم يكون مظبوط ومش زايد او ناقص.

كده فاضل معاك طقم الديبرياج
دور العربية واديها اخر غيار سواء كان الرابع او الخامس وجرب تطلع بيها.

لو عرفت تطلع بالعربية يبقى عندك مشكلة وتآكل في طقم ديبرياج العربية، اما لو العربية بطلت يبقى هي تمام.

وقبل حل كل المشاكل العضوية او الجوهرية اللي في العربية لازم تبدأ تتعود تظبط طريقة سواقتك وكمان تختار الطريق السالك لو حتى كان اطول من الطريق المكسر