#المواصلات
#العربية_القديمة
#العربية_القديمة_المواصلات

تشتري عربية قديمة ولا تقضيها مواصلات

معاكم هاني من قناة أفكار جديدة جدا

حلقتنا النهارده هنعمل مقارنة فيها شيء من الحيادية بين المواصلات والعربية القديمة والجديدة.

نبدأ بالمواصلات
مميزاتها وعيوبها
اولا المميزات

مصاريفها غالبا اقل من مصاريف العربية الخاصة، خاصة لو بتتحرك لوحدك او بتسافر كتير لوحدك، ومبتركبش تكاتك او تاكسيات او طبعا اوبر.

منتاش مسؤول عن أي اعطال بتحصل في الطريق، ولو حصل عطل بتنزل تركب عربية تانية عادي.

مش هتدور على ركنة كل شوية ولا حد يقفل عليك ولا هتتسأل عن رخصة قيادة او رخصة عربية.

دي كانت النقاط الإيجابية في المواصلات

النقط السلبية بقى اكيد كلنا عارفينها وتقريبا كده ملهاش حصر.

مثلا
المواصلات مش موجودة طول الوقت ولا لأي مكان، يعني ممكن تروح مكان ومتعرفش ترجع منه

الانتظار للتحميل من اسوأ عيوب المواصلات
خاصة في الاجواء الحارة، او لو وراك مشوار مستعجل.

مش هتقدر تتحكم في السواق او الركاب
بيسوق بمزاجه بطيء او سريع
بيدخن او يمنعك عن التدخين لو انت مدخن، وممكن تلاقي نفسك اتدبست في خناقة بسبب حاجة ممنوعة انت عايز تعملها وحد اعترض عليك.
او حاجة ممنوعة حد غيرك عملها وانت معترض عليه.

متعرفش تنزل تجيب طلب وانت راكب
لو معاك شنط ممكن تحاسب عليها زيادة، وممكن تنساها وتنزل، بل كتير مننا بينسى تليفونه او محفظته في المواصلات، وابقى قابلني لو رجعتلك تاني.

كتير المواصلات بتنزلك في مكان ابعد من المكان اللي انت رايحه سواء قبله او بعده وبتقصيها مشي او تركب توكتوك او تاكسي عشان تكمل طريقك.

مش سهل انك تاكل او تشرب حاجة وانت راكب مع ناس.

لو معاك زوجتك او اطفالك هتتبهدلوا في الطلوع والنزول من مواصلة للتانية وكمان اختيار العربية مش سهل لانك محتاج اكتر من مكان فاضي وجنب بعض، وفي ناس عندها تناحة منقطعة النظير وتلاقيه رافض يقوم من مكانه ويتنقل مكان تاني كانه اشتراه او هيقعد فيه للأبد.

منتاش ضامن السواق فايق او لا والعربية سليمة ولا ممكن تتقلب ولا تولع لا قدر الله.

طيب العربية القديمة بقى
مميزاتها وعيوبها

نبدأ بعيوب العربية القديمة الاول

اعطالها كتير جدا لو انت مش مهتم بها وايدك مش فيها علطول
لانك شاريها مستعملة ومتعرفش ايه ممكن يعطل فيها وايه الحاجة اللي تم اصلاحها قريب.

مصاريفها اكتر من المواصلات عموما، خاصة لو انت بتتحرك بيها لوحدك، ومصاريفها مش مقتصرة بس على الزيت والبنزين، لا في ترخيص وفي صيانة دورية وممكن كمان تكون واخد جراج ايجار لها، وممكن تاخد مخالفات، والاسوأ هو صيانة ما بعد الحوادث الفجائية، والكلام ده عام على كل العربيات القديمة والجديدة، بس القديمة اعطالها اكتر.

كتير بتتعب عشان تلاقي ركنة وانت رايح مشوارك، وطبعا الكلام ده ينطبق على العربيات كلها برضو.

خلصنا عيوب العربية عموما والعربية القديمة خصوصا.

ندخل بقى على مميزات العربية عموما والقديمة خصوصا وحبيت اني اختم الحلقة بالشق ده.

الخصوصيه والحرية
يعني محدش حاطط وشه في تليفونك ولا بيسمع مكالمتك مع حد او كلامك مع حد قاعد معاك، تدخن براحتك او تسوق في جو نضيف.
تركن ترتاح او تدخل حمام او تقف تشتري طلبات، تلبس كمامة او لا، تاكل او تشرب براحتك، بس مش براحتك اوي عشان تركز في الطريق، تفعد في الكرسي اللي يريحك وتتنقل براحتك انت او اي حد معاك، تسوق بسرعة أو ببطء، تقفل الشباك او تفتحه، تسغل التكييف او تطفيه، تركب معاك اي حد قريب او غريب ، يعني واخد كل حريتك.

بتتحرك براحتك اي وقت ولأي مكان بدون قلق ومش خايف العربية تفوتك او المواصلات تقفل، حتى لو نص الليل.

بتوفر وقت الانتظار على ما العربية تحمل
يعني بتطلع مشوارك بالدقيقة بدون قلق، الا ان العربية تعطل او الطريق يبقى زحمة.