شيفروليه اوبترا 2021
تالت سيارة في مبادرة احلال السيارات المتقادمة في مصر
من قناة افكار جديدة جدا ومعاكم هاني
السلام عليكم ورحمه الله وبركاته
اهلا بيكم في حلقة جديدة من مبادرة احلال السيارات المتقادمة في مصر وعربية جديدة هنتكلم عن كل مواصفاتها العيوب بالمميزات
ونبدأ بسرعة عشان منضيعش وقت ونخلي كل ثانية في الفيديو ذات قيمة
اولا كده
مواصفات شيفروليه اوبترا 2021
اول حاجة هنعرفها هي سعر العربية اللي نزلت بأربع فئات مختلفة نسبيا في السعر والكماليات
الفئة الاولى سعرها 198 الف جنيه
الفئة التانية والتالتة والرابعة
203 الف 212 الف 218 الف
بعد السعر نتكلم عن المواصفات
شيفروليه اوبترا عربية سيدان او صالون او بالعربي كده عربية عائلية.
طولها 4.51 متر
وعرضها 1.73 متر
اما ارتفاها 1.46 متر
سعة الشنطة 410 لتر
قاعدة العجلات، اللي هي المسافة بين مركز العجلة الامامية ومركز العجلة الخلفية 2.64 متر
ارتفاعها عن الارض 17 سم والارتفاع ده معقول.
جنوط العربية 15 بوصة معاه كاوتش 195 مم عرض و60 مم ارتفاع.
وزن العربية بقى 1220 كجم
حجم العربية كويس جدا وصالونها واسع الى حد كبير.
العربية فيها نظام مانع انزلاق الفرامل abs وتوزيع الكتروني للفرامل على كل عجلة بالتساوي EBD
وكمان فيها 2 أير باج وسائد هوائية للسائق واللي جنبه
اما بقى موتور العربية فهو موتور قوي بسعة 1.5 لتر 1500 سي سي
وبيطلع قوة 110 حصان وعزم 147 نيوتن
وهو كده موتور متميز وقوي
ومعاه فتيس اتوماتيك 6 غيار
ونظام الحركة في العربية جر امامي
والعربية عندها القدرة للوصول لسرعة 100 كم من وضع الثبات خلال 13.2 ث
واقصى سرعة لها 170 كم في الساعة
وطبعا بلاش الجري بسرعة عالية
اما متوسط استهلاك البنزين 7.3 لتر لكل 100 كم يعني 13.7 كم في كل لتر بعني 274 كم في الصفيحة.
استهلاكها في البنزين معقول بس مش الافضل.
سعة خزان الوقود 54 لتر والكمية دي قادرة انها تمشي العربية 740 كم متواصل بلا توقف.
وفيها شوية كماليات حلوين جدا بالنسبة للفئة السعرية بتاعتها
كاسيت aux وبلوتوث ومعاه 4 سماعات
كشافات شبورة أمامية وخلفية هالوجين مش ليد
مرايات كهربا
ازاز كهربا للاربع ابواب
تكييف
سخان شبورة للازاز الخلفي
الكنبة الخلفية قابلة للطي لقدام لزيادة سعة الشنطة
احزمة امان امامية وخلفية
سنتر لوك لقفل الابواب وفتحها والشنطة كمان
اشارات نور في المرايات
جنوط سبور مقاس 15
يمكن تركيب كاميرا خلفية وشاشة بسعر 5000 جنيه
مميزاتها بقى
الصالون واسع
الشكل الخارجي أنيق
الموتور قوي
انظمة الامان مش كاملة لكنها احسن بالنسبة لغيرها في الفئة السعرية بتاعتها.
نفق الفتيس مش عالي زي إلنترا Hd
عيوب العربية بقى
اول حاجة هو عدم ثبات العربية في السرعات العالية،. والناس اللي جربتها قالت متزودش عن 120
تاني حاجة الصاج الخارجي خفيف وضعيف، وده من اهم عيوبها.
التكييف مانيوال، وان كان عادي في الفئة السعرية بتاعتها.
المسافة اللي تحت الكرسي مش عالية وبالتالي اللي راكب على الكنبة اللي ورا مش هيرتاح اوي خاصة لو كان طويل.
استهلاكها مش الاحسن في البنزين
في ناس كتير اشتكت من مشاكل في الدريكسيون ومشاكل في طنابير الفرامل.
الخلاصة العربية كويسة جدا بس محتاجة محافظة ومكان امن من الصدمات وكمان محتاجة واحد يسوقها بتأني وميزودش سرعة بها.
وانت ادرى واحد باحتياجاتك في العربية
وأهم حاجة انك تجرب بنفسك كل حاجة وبلاش تعتمد على فيديو شوفته مني او من غيري.
#مبادرة_احلال_السيارات
#افكار_جديدة_جدا
#شيفروليه_اوبترا_2021