هنتكلم النهارده عن اولى العربيات الجديدة اللي في المبادرة، لادا جرانتا.... والحلقة الجاية هنختار العربية اللي هتاخد تعليقات اكتر منكم.

السلام عليكم ورحمة الله وبركاته
اهلا بيكم مع حلقة جديدة من مبادرة احلال السيارات، ومعاكم هاني من قناة افكار جديدة جدا.
بداية كده لو انت من المهتمين بمجال السيارات يبقى شرفنا باشتراكك في القناه واعمل لايك وشير للفيديو لما يعجبك.

لادا جرانتا
العربيات اللادا ماركة روسية معروفة ومحبوبة ومنتشرة جدا شوارع المجتمع المصري، عشان كده حبيت اني ابدأ بها سلسلة الحلقات الخاصة بسيارات المبادرة. اللي هناخدهم عربية عربية وبعد كده ممكن نعمل فيديو مجمع عن الكل.

وندخل في الشرح علطول
واول حاجة لازم نعرفها هو ان سعر العربية في المعارض حوالي 150 ألف جنيه للفئة الاولى.

بعد كده هنتكلم عن بعض مواصفاتها الخارجية والداخلية.

اولا طول العربية 4.26 متر تقريبا وعرضها 1.7 متر وارتفاعها 1.5 متر
وزن العربية الصافي من 1075 الى1160 كجم
اما الوزن الاجمالي فهو 1560 كجم
سعة خزان الوقود 50 لتر
بالنسبة بقى للسرعة القصوى فالعربية تقدر تتخطى ال 170 كم في الساعة

اما سعة الشنطة فهي 480 لتر والسعة دي كبيرة جدا ومن اهم مميزات لادا جرانتا.

العربية اللي في المبادرة هتكون من الفئة الاولى وهي فيها نظام مانع الانزلاق في الفرامل abs ونظام توزيع الكتروني للفرامل EBD ونظام مساعد الفرامل BAS.

اما موتور العربية فهو 4 سلندر بسعة 1600 سيسي قوته 87 حصان وعزم 140 نيوتن/متر والفتيس 5 سرعات مانيوال.

اما الفئة التانية من نفس العربية فيها موتور بنفس السعة وعدد السلندرات 4 سلندر بس قوته 98 حصان وعزم 145 نيوتن/متر وهو اقوى من موتور الفئة الاولى لانه 16 صباب مش 8 بس.

بالنسبة بقى لمنظومة الحركة، فالعربية بتتحرك عن طريق الجر الامامي، والعربية بتنزل بجنوط 14 بوصة، والكاوتش مقاساته 175مم عرض على 65 مم ارتفاع

العربية عندها القدرة على الوصول لسرعة 100كم من وضع الثبات خلال 11.4 ث

اما متوسط استهلاك البنزين فهو 6.8 لتر لكل 100 كم متر، يعني 14.7 كم في اللتر او 294 كم في الصفيحة.

اما عن كماليات العربية
طبعا فيها مكيف ممتاز حسب شهادة ناس كتير جربتها.
وباور الدريكسيون كهربا
فبها طبعا سنتر لوك
الازاز الامامي كهربا و فتح الشنطة بالكهربا
ونظام عزل للضوصوء مش متميز لكنه مقبول
مذيب للضباب في الازاز الخلفي
لمبات في الازاز الخلفي مع الفرامل
والازاز الخلفي فيه فاميه بالنسبة للإصدارة المتجمعة في مصر

والكاسيت داعم لنظام aux وبلوتوث وسماعاتها مش قوية

بالنسبة بقى لانظمة الامان
لادا جرانتا فيها
اتنين وسائد هوائية للسائق واللي جنبه
ونظام مانع السرقة، بس انت ونصيبك.
أحزمة امان امامية وخلفية ثلاثية التثبيت
نظام تثبيت كرسي الاطفال
نظام امان للاطفال في الابواب الخلفية.
دعامات فولاذ للأبواب.
صاج العربية قوي مقارنة بمثيلاتها من العربيات الحديثة

عيوبها بقى
الازاز الخلفي عادة مش كهربا، لكن في رأيي انه افضل لزيادة الامان للأطفال

الكنبة الخلفية غير مريحة والصالون عموما ضيق نسبيا، خاصة لو راكب معاك ناس حجمها كبير.

ارتفاعها عن الارض، وان اعتبرنا الارتفاع ده ميزة في شوارع مصر.
العفشة ناشفة شوية وده بيخليك تحس بالمطبات والطرق المكسرة، وبرضو قوة العفشة من مميزات العربية وتخليها تتحمل حتى وان تعبت اللي سايقها.

مفيش كاميرا خلفية
والعربية عموما مش ناعمة زي العربيات الاعلى منها لكن هي انعم من الاقدم منها.
صوت الموتور عالي نسبيا بالنسبة للعربيات الاحدث برضو وغالبا كل موديلات اللادا القديمة كده.
وفي كماليات كتيرة مش موجودة في العربية، لكن هي كويسة والافضل في الفئة السعرية بتاعتها

واكيد لما تركبها بعد ما كنت متعود على عربية قديمة عمرها من 20 ل 40 سنة هتحس بفرق كبير جدا.

ختاما بقى دي الالوان اللي العربية نزلت بها.
وكلمة اخيرة
لو انت بتفكر بشكل عملي وميهمكش الرفاهية ويهمك توفر فلوس او ظروفك المادية مش مظبوطة ومشاويرك مش طويلة يبقى العربية دي مناسبة ليك جدا

وبكده نكون وصلنا لنهاية حلقتنا النهار ده وقريب جدا هنعمل حلقة جديدة عن عربية جديدة من عربيات المبادرة.
لايك بقى قبل ما تخرج والسلام عليكم ورحمه الله وبركاته.