#أفكار_جديدة_جدا
#تجديد_سيارة
#restoration
موقع الاحلال
https://www.gogreenmasr.com/ar
إحلال السيارات
كل معلومة عايز تعرفها عن إحلال أو تخريد السيارات هتلاقيها في الفيديو ده
من قناة افكار جديدة جدا ومعاكم هاني
من كام شهر طلعت أخبار من الحكومة المصرية بتتكلم عن نيتها لتخريد السيارات اللي مر عليها أكتر من 20 سنة
يعني اللي قبل موديل 2000
وحسب إحصائيات ادارة المرور المصرية ان عدد السيارات اللي مر عليها 20 سنة تقريبا مليون سيارة وعدد الميكروباصات 270 الف ميكروباص
رقم كبير جدا وصعب تحويله كله الا في فترة تتخطى ال10 سنوات لكن هو أقل مما كنت اتوقع.
ندخل في الموضوع علطول بقى، واخر الموضوع هقول رأيي فيه
أولا كده التخريد للأجرة والميكروباص هيكون اجباري اما العربيات الملاكي اختياري
عشان محدش يخاف يجدد رخصة عربيته او يصلح اعطال فيها، وكمان اصلا الاحلال ده فرصة حلوة ومش بسهولة هتعرف تدخل عربيتك احلال، فبلاش قلق او خوف، وبلاش تستعجل وترمي عربيتك برخص التراب.
المبادرة بقى هدفها استغلال كميات الغاز الطبيعي اللي عندنا وتوفير البنزين اللي بنحرقه كل يوم، وكمان عادم الغاز اقل من عادم البنزين.
طيب هو الاحلال ده شامل مصر كلها ولا بعضها؟
الاحلال هيكون على 3 مراحل
المرحلة الاولى
المحافظات اللي دخلت فيها هي
القاهرة
الجيزة
اسكندرية
القليوبية
السويس
البحر الأحمر
بورسعيد
لكن تم فتح الباب لكل المحافظات للي عايز يحول العربية غاز بالتقسيط
غاز مش احلال خليك مركز معايا.
المعرض بقى اللي اتعمل الاسبوع ده فيه البنوك والعربيات المتاحة بس
يعني هتروح عشان تتفرج وتعرف الشروط والخطوات المطلوبة.
لكن التقديم هيكون إلكتروني مش في المعرض.
ورابط الموقع هتلاقيه في صندوق الوصف
وهنعمل فيديو لطريقة التسجيل عليه
أو التعديل على البيانات بعد التسجيل.
المرحلة الاولى في المبادرة 3 سنين والموقع هيفضل متاح علطول يعني مش لازم تروح المعرض.
المبادرة تستهدف في الفترة دي 250 ألف سيارة من مليون و270 الف سيارة فوق سن ال20 سنة بين ملاكي وأجرة وميكروباص.
في المرحلة الاولى اللي مدتها 3 سنوات
أول سنة من المرحلة الاولى الدولة هتدعم 70 الف عربية 55 الف منها بين الأجرة والملاكي و15 الف ميكروباص
السنتين اللي بعدهم هتدعم 180 الف عربية
العربيات الجديدة المتاحة بقى
لادا جرانتا وسعرها في السوق 150 الف جنيه
هيونداي إلنترا hd سعرها 230 الف جنيه
أكسينت RB سعرها 205 الف
نيسان سنترا 266 الف
نيسان صني 180 الف
شفروليه أوبترا 198 الف
BYD F3
وكل العربيات دي تجميع محلي، يعني تم تجميعها في مصر
في عربيات تانية سوزوكي و mg5 وفيات لكن مش مؤكد وجودهم لأنهم مش موجودين على الموقع
وقبل ما تحجز عربية منهم أو من غيرهم لازم تسأل ناس كتيرة وخبيرة وتشوف ريفيوهات على العربيات كلها أو العربية اللي ناوي عليها
وممكن نعمل فيديوهات مقارنة بين كل عربيات المبادرة في فيديو منفصل عن قريب.
واحتمال اللي معندوش عربية كمان يقدر يشتري عربية من المبادرة بس لسه قيد الدراسة.
العمل بالمبادرة هيبدأ في شهر يناير بالنسبة للعربيات الملاكي
وشهر مايو بالنسبة للميكروباص
والسيارات الكينج لونج هتبدأ في شهر يوليو
نيجي بقى للشروط
باختصار كده
لازم رخصة العربية القديمة اللي هتدخل الاحلال تكون سارية وتكون باسمك انت مش مجرد يكون معاك توكيل
ومش لازم تكون بقالها سنة معاك
وكمان لازم يكون معاك رخصة قيادة، خاصة للملاكي ومهنية للأجرة
بس لازم يكون في حل في حال انتهاء الرخصة
مهو مش معقول الرخصة تخلص النهار ده واروح اجددها بكرة عشان ادخلها احلال بعد بكرة
يعني على الاقل يعملوا فترة سماح شهرين او تلاتة بعد انتهاء الرخصة وقبل دخولها احلال.
يكون سنك مش اقل من 21 سنة ولا ازيد من 55 سنة
وممكن بعد شوية الناس اللي فوق السن تقدم ويكون في حل او تعديل القانون لما فوق السن.
فترة السداد بقى اقصاها 120 شهر متضمنة فترة سماح 3 شهور
16733 رقم الخدمة لو عايز تعرف معلومات
عن المبادرة.
هل لازم تكون موظف أو متحتاج ضامن؟
لسه معنديش معلومة مؤكدة، بس غالبا هتحتاج ضامن لو وانت مش موظف.
طيب هي عربيتي القديمة هتتقدر بكام؟
قيمة السيارة القديمة حدها الأقصى 60 ألف جنيه
لكن محدش عارف سعر التخريد كام بالظبط
وكل عربية سعرها هيبقى مختلف عن غيرها.
كم نسبة الفيدة على العربية
الفايدة 3% في السنة على 10 سنين
يعني هتكون 30% على إجمالي صافي سعر العربية لان 3 في 10 ب 30
ودفع مقدم السيارة هيكون من الدعم اللي الدولة هتقدمه ليك لما تاخد عربيتك القديمة.
اما قسط العربية
غالبا هيكون الحد الأدنى فيه من 1500 ل 2500 جنيه شهريا تقريبا
وغالبا هتدفع انت تكلفة تركيب الغاز وممكن تدفع الترخيص كمان، لكني مش متأكد من النقطة دي
نفهم من كده ان هيبقى معاك عربية زيرو مكان العربية القديمة
عربية كل فترة تروح التوكيل لو حصل فيها اي عطل
مش هتعرف تمد ايدك فيها لو انت من الناس اللي بتشتغل بنفسها
ترخيصها اغلى كتير من العربيات القديمة ممكن يوصل اكتر من الضعف.
هتخاف عليها جدا من السرقة او اي خبطة وغالبا هتأجر جراج مخصوص لها
غالبا مش هتعرف تبيعها رسمي غير لما تخلص اقساطها
من الاخر لو انت شخص مقتدر وتعرف تصرف وتحافظ عليها يبقى هاتها
اما لو ماشي على قدك ومش ضامن ظروفك يبقى خليك مع عربيتك القديمة، اعطالها جايز تكون عددها كبير بس سهلة تتصلح ومصاريفها بسيطة،. انما العربية الحديثة ممكن لو خدت خبطة خفيفة تصرف تكلفة شد العربية القديمة بالكامل
يعني ممكن فانوس ولا مراية يكلفك اكتر من تكلفة شهرين تلاتة صيانة على عربيتك القديمة
وكفاية انك بتركن القديمة في اي مكان ومش خايف عليها من السرقة ولما بتكون على الطريق كل الناس بتخاف تخبطك لانك اقوى منها في الصاج الخارجي.
دي كانت تفاصيل المبادرة وبعدها رأيي الشخصي
#افكار_جديدة_جدا
#مبادرة_احلال_السيارات
#تخريد_العربيات_الملاكي