حلقتنا النهارده متميزة وف وقتها
هنتكلم ونشتغل عملي على عطل بيحير الكل في كل وقت خاصة في الشتا.

وهو تأخير دوارة العربية.

تابع معايا للاخر وهتطلع بالمعلومة المهمة وهتعرف سبب المشكلة عندك.

انا هاني ودي قناة افكار جديدة جدا

اهلا بيكم ويا رب تكونوا في افضل صحة وافضل حال.... وندخل بسرعة لموضوعنا.

اول حاجة هتعملها انك تعرف العربية بتاعتك بتتأخر في الدوارة بعد فترة ركن اد ايه و تركن العربية الفترة دي او اكتر منها.

بعد كده هتفك الاربع بوجيهات واحد واحد وتركز في كل واحد وتتأكد هو حارق زي الشكل ده كده
ولا مكربن زي الشكل ده
ولا عليه زيت زي الشكل ده
ولا مصدي زي الشكل ده

اولا كده لو مكربن هيخلي الشرارة ضعيفة ودوارة العربية وهي باردة اصعب او على الاقل هتدور وتبطل طول ما هي باردة وهتغلبك على ما تثبت في وضع السلانسيه

وسبب الكربون ده بيكون من الكهربا او الكربيراتير ويطول الكلام في الموضوع ده وهتلاقي فيديوهات تخص النقط دي كلها، في الوصف اسفل الفيديو.

كربنة البوجيهات
https://youtu.be/wKi9r2cR2ww

تنظيف البوجيهات صح
https://youtu.be/nxbhks0Y1Jk

تجديد كابلات البوجيهات
https://youtu.be/hm5BI1o4P1E

كل شيء عن الكربيراتير
https://youtu.be/q6qZGFl5vUE

مسمار الهوا
https://youtu.be/8S16j02qJhA

شرقة الكربيراتير
https://youtu.be/s4c5HulLiyw

كل شيء عن الاسبراتير
https://youtu.be/-lhsQBlJSiM

وش الاسبراتير
https://youtu.be/0O55-0kPq_Y

تقسيم الكهربا وظبط الاسبراتير
https://youtu.be/VhD9qRow8P8

الكوندنسر
https://youtu.be/R6reswz3aNg

الابلاتين
https://youtu.be/pAffSZNYi2o

اما لو كان سن البوجيهات عليها زيت
يبقى عندنا مشكلة في حلقات البساتم او الشمبر، ولازم تعالج المشكلة دي في اسرع وقت وتتابع مقاس الزيت يوميا.

اما بقى لو لقيت البوجيهات عليها صدا
يبقى عندك مشكلة اكبر وهي قطع او تآكل في جوان وش السلندر
ولازم تعالج المشكلة دي فورا حالا.

بعد ما عالجنا المشاكل ووصلنا لسن البوجيهات الاحمر الحارق والدنيا بقت تمام، او البوجيهات كانت حارقة اصلا من الاول.

هتفتح بقى غطا العمة
وتكارك بنزين والعربية تكون واقفة وتكون مدارتش من يوم او اتنين او تلاتة، حسب طبيعة المشكلة عندك.
وعينك جوه بوابة الكربيراتير على الرشاش
بيرش بنزين ولا مفيش؟
لو لقيت مفيش بنزين يبقى عندك مشكلة في حاجة من تلاتة

اما الكربيراتير نفسه مش مقفل كويس، بسبب نقص مسامير او عدم ربطها بشكل كامل، او سطح الكربيراتير مقفع

او جوان وش الكربيراتير مهري
او كاوتشة رداخ الكربيراتير مقطوعة وبيسرب منها بنزين.
او فلتر البنزين بيتكتم مع الركنة او الكربراتير نفسه مش سالك كويس.

او طلمبة البنزين بتسرب وبترجع البنزين للتانك ومبتعرفش تحجزه وقت الركود.

اما بقى لو لقيت الرشاش شغال كويس وبيرش معاك من اول تكة، يعني حوض الكربيراتير مليان والمجاري كلها سالكة والفلتر والطلمبة مظبوطين مبدئيا

وقبلها كانت البوجيهات محمرة وحارقة.

يبقى عندك مشكلة في الكهربا ممكن تكون في الموبينة او وش الاسبراتير او كابلات الاسبراتير، وهتلاقي فيديوهات تفصيلية وشرح عملي غاية في الدقة والوضوح لكل نقطة من النقط دي.

ومعلومة كده صغيرة قبل ما تنزل تحت تشوف الفيديوهات العملية لازم كابلات البوجيهات تكون حاكمة كويس في مكانها في مخارج الاسبراتير عشان ميدخلش منها رطوبة جوه الاسبراتير.

يلا بقى بسرعة انزل اشتغل في عربيتك بايدك واعرف حل مشكلتك ايه، وجرب السبب الاسهل الاول عشان متصرفش كتير على المشكلة بدون داعي.

وبسرعة كده نكون وصلنا لنهاية حلقتنا، وارجو قبل ما تخرج تكون عملت لايك للفيديو ولو كنت لسه جديد شرفنا باشتراكك في القناه
ولو عندك اي استفسار اكتبه في تعليق وقريب هنعمل كذا فيديو للرد على أسئلة الأعضاء.

وختاما شكرا لمتابعتكم والى اللقاء في حلقة جديدة والسلام عليكم ورحمة الله وبركاته.