تعليم صيانة سيارات: https://www.youtube.com/playlist?list=PL-EyPJanfjJ0LOwf4nT1sBkXRZyH8MkVs
لو عربيتك سرعتها بطيئة او بتقطع معاك مهما تدوس بنزين هتلاقي كل
الاسباب والعلاج معانا في الفيديو ده
ومعاكم هاني من قناة افكار جديدة جدا.
اهلا بيكم من جديد ومبدئيا كده لو كنت لسه جديد على القناة اضغط على زر الاشتراك وفعل علامة الجرس عشان يجيلك اشعار بكل فيديو جديد بنعمله.
السرعة العالية هي من اكبر اسباب الحوادث، والأخطر كمان انها بتزود الضرر فى حالة حدوث حوادث لا قدر الله
وعشان كده بنصح الناس دايما انها تمشي بسرعه معقوله وبلاش السرعات العالية او غير المسموح بها قانونا.
لكن برضه في اوقات استثنائية بنحتاج السرعه العاليه في بعض الحالات حتى لو انت من الناس اللي بتمشي دائما بهدوء.
علشان كده هنتكلم في الفيديو ده عن اسباب بطئ العربيه او ايه هي الاسباب اللي تخلي العربيه بطيئه وما تمشيش بسرعه او ما تمشيش بالسرعه اللي المفروض تكون عليها لما تدوس بنزين بدرجة معينة...
وطبعا الاسباب دي كثير ومتعدده هنحاول نحصر اغلبها او المهم والشائع منها ونقول العلاج او الحل بتاعهم والاعراض اللي ممكن تكون مصاحبة لكل عطل.
اول سبب عندنا هي مشاكل الكهرباء في العربيه ولما باتكلم عن الكهرباء بيكون قصدي كهربة الموتور مش الكهرباء المسؤولة عن النور والإشارات والفوانيس والكلاكس لان كهربة الموتور الهدف منها هو انها تعمل شراره قويه في البوجيهات، في اخر المطاف، علشان تعمل حرق لخليط الوقود اللي تم سحبه لغرف الحرق او السلندرات.
فلما الشرارة دي تكون ضعيفه يبقى الحرق هيكون ضعيف وانفجار الخليط برضو هيكون ضعيف وبالتالي حركه المكابس او البساتم هتكون ضعيفه والعربيه هتمشي ببطء عن العادي بتاعها وكمان هتستهلك بنزين اكثر من المسموح به، وهتطلع عادم اكتر من العادي، عشان كده اول حاجه لازم تراجعها هي كهربة الموتور.
وكهربة الموتور شامله كل حاجه من اول البطارية لحد البوجيهات مرورا ب الموبينة والاسبراتير ومحتوياته وكابلات البوجيهات وكل كابلات او توصيلات في العربية خاصة كابلات خرج ودخل الموبينة.
وممكن المشاكل دي باختصار كده تكون
ضعف في البطارية او الدينامو او السير بتاعه
ممكن تكون ضعف في الموبينة، خاصة لما تسخن
تحميص او تشريز في كابلات البوجيهات بسبب تشققات او اتساع.
ضعف الكوندنسر او وسع اوضيق خلوص الابلاتين عن 0.4 مم او لو كان لادع
نقط التوصيل النحاسية في وش الاسبراتير متأكسدة او مش ثابتة والشاكوش مش طايلها كويس.
وأهم عرض يأكدلنا وجود مشاكل في كهربة الموتور هو كربنة البوجيهات، فك الاربع بوجيهات وشوف السن بتاعهم حارق ولا مكربن زي الشكل ده او ده.
ثاني حاجه هي الكربراتير او الرشاشات الكربراتير في العربيات القديمه والرشاشات في العربيات الحديثة
بالنسبة للكربيراتير لازم يكون بكات البنزين والهوا بنفس المقاس اللي مكتوب في الكتالوج علشان العربيه تديك الكفاءه الكاملة وتمشي بافضل قدره وبأقل استهلاك وقود.
ممكن كمان ضعف طلمبة البنزين يخلي العربية تقطع او تبطل او تكون ابطأ من المعتاد،
فلتر البنزين لو مكتوم او نوعه رديء هيعمل معاك بطء او تقطيع في السرعات العالية.
وكمان فلتر الهوا لو مكتوم او مليان غبار واتربة يعمل ضعف في الحرق.
ممكن بعد كده نلاقي الفرامل سبب المشكلة لان الفرامل لو قفشه او تقيلة شويه على العجل هتخلي العربية ما تمشيش معاك بالسرعه المطلوبه ودايما عايزه تقف مكلبشه في مكانها حتى لو فرامل اليد، ممكن العطل يكون في السيرفو او اي خزنة فرامل لو أستك بستم الفرامل بيقفش.
وكمان لو ضغط هوا العجل او الإطارات اقل من العادي هتلاقي العربية اضعف وابطأ.
وكل الاعطال دي لها فيديوهات مخصوصة عملية على القناة تقدر تشوفها واكتر منها كمان، وهسيبلك رابط قائمة الصيانة في الوصف اسفل الفيديو.
بعد كده ممكن حاجات تكون لها علاقه بالموتور سواء بقى تاكيهات اوكامات او طقم شنبر او جوان وش السلندر.
او حتى الزيت لو لزوجته اقل او اعلى من الطبيعي هيعمل تقل في حركة القطع الميكانيكية في الموتور او الفتيس أو الكرونة
والزيت ممكن يفقد خواصه لو عدى عليه وقت طويل
او اختلط مع الميه
او اختلط مع البنزين
او تم فقد جزء كبير منه
واعراض الحاجات دي بالترتيب كده
سخونة في الموتور
صوت نقر مع السخونة
رجرجة في الموتور حتى وهو سخن
وجود دخنة بيضا في الشكمان وتعريق زيت على سنون البوجيهات، زيادة او نقص في كمية الزيت على المقاس. وبرضو هتلاقي فيديوهات عملية تخص اغلب النقط دي على القناة.
برضو الشكمان لو مكتوم يخلي الموتور اضعف بكتير ويسخن كمان بزيادة، فلازم تتأكد انه سالك كويس جدا، لكن لو الشكمان مخروم ميأثرش على حاجة عملية في العربية.
بعد كده بقى طقم الدبرياج اللي هو عباره عن اسطوانه وديسك وبليه لو فيهم تاكل كثير هيخلي العربيه سرعتها تقل كثير حتى في الطلعه هتبقى ضعيفه وبتقطع بل ممكن تطلع على الغيار الرابع او الخامس و في المطالع بقى لو انت طالع كوبري هتلاقي العربيه سرعتها قلت معاك خالص، وكمان ممكن تشم ريحة شياط وانت ماشي.
شوف بقى المشكلة ظهرت امتى معاك والاعراض المصاحبة لها ايه،
عشان تقدر تحدد السبب او الاسباب اللي عندك، وطبعا لازم تبدأ بالأسهل عشان متصرفش كتير وترجع تلاقي مفيش نتيجة والحل يطلع بسيط في الاخر.
انا كده خلصت كلامي بس لسه مخلصتش شغل
لما تعرف المشكلة عندك افتح بقى فيديوهات الشغل العملي واتعامل بنفسك في عربيتك واظبطها صح بأقل تكلفة.
وختاما شكرا لمتابعتكم وأتمنى اكون ضيف خفيف عليكم والى اللقاء في حلقة جديدة والسلام عليكم ورحمة الله وبركاته باي باي.
#العربية_بطيئة
#قناة_هاني
#أفكار_جديدة_جدا