دخان ابيض ولا اسود كربون ولا بخار ولا رذاذ ولا حنفية واتفتحت.
شكمان العربية بيوضح وبيكشف كتير عن حالة الموتور وحالة الأدوات او المغذيات اللي حوالين الموتور، وده هيكون موضوع حلقتنا النهاردة من قناة افكار جديدة جدا ومعاكم هاني.
قبل اي حاجة لازم نعرف الاول وظيفة شكمان العربية.
شكمان العربية بيقوم بمهمتين اساسيتين
الاولى انه بينقل العادم اللي طالع من غرف الحرق من قدام في الموتور إلى الخلف خارج العربية عشان يمنع دخول العادم جوه صالون او كابينة العربية.
المهمة التانية انه بيقلل جدا من شدة الصوت الخارج من الموتور وكمان بينقل الصوت الباقي ده خلف السيارة بعيد عن أسماع الركاب.
يبقى بيقلل الصوت وبيقلل او بيمنع العادم.
طيب مهو كلنا عارفين الكلام ده جبت ايه جديد يعني.
يبقى كده ندخل في موضوع الحلقة احسن ونتكلم عن طريقة معرفة حالة الموتور من الشكمان
مرة والعربية مطفية
ومرة والعربية شغالة
نبدأ والعربية مطفية
اولا كده الموتور الطبيعي المظبوط هتلاقي الشكمان بتاعه نضيف الا بعض الرواسب الكربونية البسيطة.
اما بقى لو لقيت رواسب كربونية تقيلة وكثيفة يبقى في مشكلة عندك في منظومة الحرق سواء كانت عربيتك قديمة او حديثة، كربيراتير او انجيكشن.
طيب لو لقيت رواسب لزجة او متحجرة؟
دي غالبا بقى بتكون زيت محروق ومعنى كده ان المكنة خفيفة ولازم تحلها وتغير طقم الشنبر او حلقات البساتم في اسرع وقت، ومن هنا ليوم التغيير لازم تتابع مقاس الزيت باستمرار.
طب الكلام ده ينفع يعرف حالة الموتور التراكمية، يعني مينفعش نحدد منه الحالة بعد عمليات الاصلاح ولا في حالة الاعطال المفاجئة.
بمعنى اوضح، لما تصلح مشكلة منظومة الحرق في الموتور الكربون القديم جوه الشكمان هيفضل موجود برضو لفترة.
ولما تصلح طقم الشنبر برضو الزيت القديم مش هيروح بين يوم وليلة
وكمان لما يظهر عطل مفاجيء مش هيعمل اثار واضحة في الشكمان قبل مرور ايام من التشغيل.
يجي بقى دور الملاحظة والعربية شغالة
اولا كده الشكمان ممكن يطلع منه 6 حاجات
بست حالات مختلفة ناخدها واحدة واحدة بالتدريج من العادي للخطير.
الحالة
الاولى هي خروج هوا ساخن بدون اي لون او رطوبة
ودي الحالة العادية للموتور وهو في درجة في الحرارة المثالية للتشغيل ومفيش قلق منها اطلاقا.
التانية خروج بخار ميه خفيف او كثيف او رذاذ ميه، الصبح او بالليل او حتى بالنهار في اوقات الرطوبة العالية، من الجو، خاصة اول تشغيل الموتور.. والحالة دي برضو طبيعية ومفيش اي قلق منها نهائيا.
التالتة خروج دخان اسود خفيف او كثيف
وده معناه مشكلة في منظومة الحرق واصلاحها غير مكلف وان كان محتاج فحص دقيق من شخص متخصص، وبرضو مفيش منها خطورة على الموتور وكل مشكلتها ضعف في قدرة الموتور واستهلاك زايد في الوقود.
اما بالنسبة لرابع حالة
هي بقى في خروج ميه بكميات كبيرة وبضغط شديد ولمسافة بعيدة وبتكون طول الوقت، وبيصاحبها نقص مية التبريد وخلط الزيت بالميه، ودي حالة حرجة جدا لازم علاجها فورا لانها بسبب تهتك في جوان وش السلندر وعدم علاجها في خطورة كبيرة على كل اجزاء المحرك.
الخامسة خروج دخان ابيض او ازرق في اول ثواني او دقايق من تشغيل العربية
المشكلة دي وان كانت بسيطة بس لازم ضروري تتابع مقاس الزيت كل فترة.
لان المشكلة دي بتكون بسبب جلد الصباب او كاوتشة الصبابات مش حاكمة كويس وبيدخل منها زيت والزيت ده لو الصباب مفتوح بيدخل غرفة الحرق ويتسبب في خروج دخنة بيضا او زرقا اول الدوارة ولو الصباب مقفول الزيت بيدخل لما يتفتح واحدة واحدة ويعمل دخنة برضو بيضا او زرقا لثواني او دقايق قليلة.
اما الحالة
رقم 6 الاخيرة
فهي خروج دخان ابيض او ازرق في كل وقت وبيزيد مع زيادة سرعة المحرك وبيصاحبه نقص شديد في الزيت وصعوبة في تشغيل السيارة كل وقت ودي برضو حالة حرجة ولازم علاجها بأسرع وقت
وبكده نكون وصلنا لنهاية حلقتنا ومتنساش تعمل لايك للفيديو قبل ما تخرج
ولو اول مرة تشوف القناة اعمل اشتراك وخد لفة كده واتفرج على الفيديوهات العملية عندنا، ولو عندك اي استفسار سيبه في تعليق وانا هرد عليك في اسرع وقت ممكن
ولو عندك فكرة عايز نعمل عنها حلقة مخصوص سواء عملية او نظرية، اكتبها برضو في التعليقات
والى اللقاء في حلقة جديدة والسلام عليكم ورحمة الله وبركاته.