اخر ميعاد لعمل الملصق الالكتروني
وتكلفة عمله وطريقة او خطوات عمله.

من قناة أفكار جديدة جدا معاهم هاني

السلام عليكم ورحمه الله وبركاته اخباركم ايه يا رب تكونوا بخير وفي احسن حال.

حلقة النهار ده حلقة استثنائية لاني لسه عامل الملصق الالكتروني من ساعات قليلة وحبيت انقل تجربتي ليكم.

اولا كده اخر ميعاد لعمل الملصق ده يوم 21 نوفمبر يعني فاضل يوم 19 و20 و21 بس
والمخالفة بعد كده هتكون كبيرة وممكن توصل كحد اقصى 8000 جنيه فبلاش نتأخر عن كده

اما بقى الخطوات والتكلفة هنقولها في كام نقطة سريعة كده

اولا لازم تاخد عربيتك او العربية اللي هتعمل لها الملصق بتاعها معاك وانت رايح المرور وتركنها بريبة من بوابة المرور، ويكون معاك رخصة العربية وبطاقتك
ولو العربية مش بتاعتك خد معاك التوكيل
او لو ملهاش توكيل معاك يبقى تاخد بطاقة صاحبها.

ثانيا هتدخل المرور وتسأل على الشباك المسؤول عن الملصق الالكتروني وبالنسبة لمرور المنصورة الشباك رقم 9 اللي هو اصلا مسؤول عن ترخيص العربيات الملاكي ، والافصل تروح متأخر بعد الساعة 3 او 4 العصر عشان المرور ميكونش زحمة زي الصبح لانهم شغالين لحد 8 مساء.

هتصور البطاقة والرخصة كل واحدة منهم صورة.

هتسلم الموظف الرخصة وصورة الرخصة والبطاقة وصورة البطاقة وهيكتب رقم تليفونك كمان وتستنى 10 دقايق او ربع ساعة او اكتر او اقل حسب الضغط والدور بتاعك

ثالثا الموظف هينادي اسمك ويسلمك بطاقتك وورقة بيضة عليها رقم تسلمها للخزنة وياخد الرخصة والصور ومش هتشوفهم تاني ابدا
ابدا

رابعا هتنزل بقى عند الخزنة وتسلم الموظف الورقة البيضة وهو هيقولك اسمك هاني
هتقوله اه
عشان تبقى عارف يعني انه هيعرف كل حاجة عنك من الرقم اللي مكتوب في الورقة دي

هيقولك ادفع 100 جنيه او اكتر حسب عدد السنين اللي باقية في الرخصة بتاعة العربية

هتدفع ال100 جنيه وانت زي الباشا وتقعد تستنى برضو ربع ساعة او اكتر شوية لحد ما ينادوا اسمك تاني او اسم صاحب الرخصة

خامسا هتخرج مع موظف معاه ملصقات ومعاكوا كل اللي اتنده اساميهم وتخرجوا بره المرور يلزق كل واحد فيكم ورا التاني، يلزق العربيات مش الناس عشان محدش يفنمني غلط

هيدخل يقعد على كرسي السواق
يفك اللزقة ويحطها من جوه في نص الازاز من فوق قدام مراية الصالون تقريبا
ويسلمك الرخصة الجديدة اللي مكتوب فيها على الضهر من تحت ناحية اليمين م. الكتروني
وتحتها ارقام بالاحمر.