#سيارة_مستعملة #شراء_سيارة_مستعملة #عربية_مستعملة
لو هتشتري عربية مستعملة أيا كان نوعها
هتبص على ايه وتفحصها ازاي؟
وكمان بلاش تشتري عربية من مكان بعيد او مرور بعيد عليك لانك في الترخيص هتحتاج ترجع لمرور العرببة الاصلي اكتر من مرة.
وكمان لازم تشوف العربية اللي هتشتريها بالنهار مش بالليل.
واول حاجة بعد كده هتعمل بحث عن نمرة العربية على موقع نيابة المرور وتتأكد ان مفيش عليها مخالفات، وهسيبلك رابط الفيديو اللي فيه موقع نيابة المرور.. في الوصف اسفل الفيديو ده.
بعد كده تراجع رقم الشاسيه والموتور اللي في الرخصة وتطابقه على العربية وتتأكد ان مفيش اخطاء ولا حاجة متغيرة بين الرخصة والعربية.
بعد كده هتاخد لفة حوالين العربية من بعيد شوية وعينك شايفاها كاملة من كل الجوانب وتكون واقفة على ارض مستوية، لو فيها اي ميول او اعوجاج يبقى فيها مشكلة اما عفشة او سمكرة، وتكون الفواصل بين الابواب والشنطة والكبوت كلها متساوية من الجنبين
بعد كده تبص تحت العربية في كل مكان تقدر تشوفه خاصة الركب والشاسيه، وتكون منور كشاف الموبايل حتى لو بالنهار، وانت اصلا لازم تفحص العربية بالنهار، وتبص جوه الشنطة والكبوت بعد ما تفتحهم، وتشيل الدواسات وتشوف القوايم اللي ماسك فيها الباب عايزك تدور على اي مكان فيه بارومة، لان البارومة بتنزل كتير من سعر العربية.
خدت فكرة خارجية، طب يلا اركب كده وجرب وانت فاتح الكبوت، بس متدورش العربية، جرب دواسات العربية، البنزين والديبرياج، حاجة منهم تقيلة او بتقطع، طب الفرامل خفيفة ولا قوية وسليمة؟ جرب الغيارات كلها على الواقف وانت دايس ديبرياج، هل في غيار بيعض او بيرد تاني، واخيرا جرب تلف الطارة يمين للاخر وشمال للاخر ورجعها يمين تاني في النص، هل بتقفش معاك في اقصى اليمين او الشمال؟ هل فيها بوش؟
رجع المقاس تاني مكانه وخلي غطا الزيت مفتوح، وافتح معاه غطا قربة الميه وغطا الردياتير، هل الميه مطحنة ولا عادية... جرب تدور العربية وعينك على غطا الردياتير والقربة، هل في نطر ميه خارج منهم او فقاقيع كتيرة طالعة من الردياتير او القربة ولا دارت وبتقلب ميه عادي؟
لان قطع جوان الوش بيسبب دخول كبس الغرف لدورة المية... وصدا للبوجيهات
زود على خفيف كده، وشوف تحت غطا الزيت التقليب كويس ولا مفيش زيت طالع فوق للكامات، بس خد بالك عشان ممكن تغرق نفسك زيت.
اقفل الغطيان خدلك نظرة بتركيز على المكنة والكربيراتير وشوف هل في تسريب بنزين او ترشيح زيت على المكنة او الكربيراتير.
لو لقيت البوجيهات تمام وشكل السن محمر وحارق يبقى ركبهم تاني ودور العربية واتأكد ان الانوار والاشارات شغالة كلها، وجرب تديها كل الغيارات على الواقف، وبعدين تديها الغيار الرابع وحاول تطلع، طلعت معاك؟
يبقى عايزة طقم ديبرياج في اسرع وقت
مطلعتش وبطلت يبقى مبدئيا الطقم ده تمام
اديها الغيار الاولاني وجرب تطلع
بتطلع كويس ولا بتقطع؟
التقطيع له اسباب كتير اغلبه حميد
لكن طلعت كويس؟
بطلها تاني وجرب تدورها مرة واتنين وتلاتة، وجرب تضرب كلاكس وانت مشغل النور كمان عشان تتأكد ان البطارية كويسة.
اطلع بقى تاني بالعربية وامشي في طريق مكسر وركز مع حركتها على الطريق
امشي تاني على طريق مفتوح وشوف التسارع بتاعها وركز مع الصوت ولمبة الزيت..
وبعد ١٠ دقايق او ربع ساعة تابع مؤشر الحرارة
هل في تقطيع مع السرعة؟ غالبا مشكلته فلتر بنزين او تنضيف كرببراتير، بس لازم تطمن برضو.
العربية سخنت للطبيعي يعني ٧٠ او ٨٠ جرب بقى تطلع مطلع وانت على سرعة بطيئة مرة على الغيار الاول ومرة وانت على الغيار الاخير وركز هل صوت المكنة بيعلى مع الكباري والمطالع بدون ما السرعة تزيد، او السرعة بتنزل؟ هل العربية بقت بتقطع معاك في الطلعة على البطيئ كده طقم الديبرياج بدأ يزعل، خاصة لو في ريحة شياط ظاهرة، او ممكن تكون المشكلة في الموبينة، ودي سهلة.
طيب الغيارات كلها كويسة على الطريق ولا في غيار بيعض او بيرد او ينطر تاني؟
فرامل اليد اخبارها ايه
جرب تسيب الدريكسيون وانت ماشي بس مش على سرعة عالية وخلي ايدك قريبة منه.
جرب تفرمل وانت سايبه بس تكون مستعد تمسكه تاني، لو في حدف في العربية يمين او شمال مع الفرامل او من غيرها يبقى عندك مشكلة في زوايا العربية او فراملها او الركب،
اجري بسرعة عالية فوق ٨٠ دوس ديبرياج
ومور الفتيس وسيب البنزين وركز مع العربية من تحت، هل في رجرجة في الكردان؟ ده طبعا في العربيات الدفع الخلفي.
، انزل بص على العجل من جوه، بس لما تقف الاول، اوعى تنزل والعربية ماشية هل في زيت فرامل مسيل على الجنوط او مواسير وخراطيم الفرامل؟
جس حرارة الجنوط، هل في جنط اسخن من جنط ولا اللي قدام زي بعض والجنوط الخلفية زي بعض، وغالبا الامامية اسخن شوية من الخلفية
المكنة سخنت للحرارة العادية ولا رفعت معاك فوق ٩٠ او ١٠٠، طيب المروحة اشتغلت؟
لو المروحة مش شغالة جرب تعمل قفلة على حساس الردياتير وشوف المروحة هتشتغل ولا لأ. والموضوع ده له فيديو مخصوص على القناة.
جرب تدي للعربية غيار المرشدير وشوف الرجوع كويس والكرونة صوتها ايه مع الرجوع، لو فيها ونة خفيفة مع الرجوع بس وحلوة مع الحركة لقدام على كل السرعات مفيش مشكلة، اما لو في اي ونة في العربية في المشي لقدام يبقى بلاش منها وسيبها للي بيعرف يتصرف مع الاعطال دي.
لو كل ده طلع تمام واتفقت على السعر يبقى تاخدها على ميكانيكي يفحصها وسمكري يبص عليها وحد بتاع زيت يكشف على زبت الفتيس والكرونة والموتور.
ويلا بقى جهز فلوسك وصاحبها يجهز شهادة مخالفات رسمية ويجهز نفسه للتوكيل او عقد البيع المسجل، والدفع يكون وقت استلام التوكيل... وهيكون لنا حلقة مخصوص عن بيع السيارات ونقل الملكية والترخيص والفحص.
كده وصلنا لاخر الفيديو وبسرعة يلا قبل ما تقفل اعمل لايك وشير واشتراك في القناة وفعل علامة الجرس، وشكرا لمتابعتكم والى اللقاء في فيديو جديد والسلام عليكم ورحمة الله.