@sasamh
الاستعداد للسفر بالعربية
كل واحد معاه عربية أيا كان نوعها بيحتاج يسافر بها في وقت من الأوقات
انا هاني ودي قناة افكار جديدة جدا
الفيديو السابق اتكلمنا فيه عن العدد وقطع الغيار المطلوب تواجدها معاك في العربية طبعا لازم تتفرج عليه لانه اساس حلقتنا النهارده
بس هقولك على الحاجات دي باختصار كده
هتاخد معاك عجلة او اتنين استبن
سير دينامو وموبينة وطقم بوجيهات وكودنسر للعربيات القديمة وفلتر بنزين وجركن زيت لو عربيتك بتاكل زيت، وجركن ميه، وممكن جركن بنزين بس تخليه ورا في الشنطة في مكان امن
ومفتاح بوجيهات ومفك قلاب ومفاتيح ٨ و١٠ و١٢ و١٣ و١٥ و١٧ و١٩ مشرشر وبلدي
وبنسة كلابة ومفتاح فرنساوي
بكرة سلك لعمل اي توصيلات كهربا
شريط لحام او شكرتون
قصافة. او بنسة لقطع الاسلاك
بعد ما عرفنا أننا محتاجين عدة وقطع غيار معينة هنشوف مع بعض ازاي نفحص السيارة قبل السفر
اول حاجة هنفحصها هتكون حوض العربية بالكامل
اول حاجة هنفحصها في الحوض هتكون السيور
سير الدينامو وسير الكاتينة ولو عندك باور كمان تفحص السير بتاعه.
سير الكاتينة بتفحصه بالنظر وتكون بتغيره في ميعاده
اما سير الدينامو هتفحصه برضو بالنظر وكمان هتمسك طنبورة الدينامو وتجرب تلفها بقوة والعربية مطفية، ان لفت معاك يبقى السير مرخي او محتاج تغيير.
بعد كده تفحص السوائل كلها
أهمها للعربية طبعا زيت الموتور، تتأكد انه مش ناقص بإنك ترفع المقاس والعربية مركونة في مكان مستوي وتكون باردة وتتأكد ان الزيت في المستوى الآمن على المقاس
واهم سائل لك انت. هو سائل الفرامل او زيت الفرامل او زيت الباكم، لان ضعف او انهيار الفرامل المفاجيء أخطر عليك من اي مشكلة تانية، افتح القربتين بتوع الفرامل واتأكد ان الزيت في المستوى الطبيعي ومش ناقص.
تالت سائل تفحصه هو مية الردياتير، نقص الميه بيزود حرارة الموتور بشكل كبير وسريع.
فلازم تكون متأكد تن مفيش اي تسريب ميه
رابع سائل وهو الاهم على الاطلاق لانه خطر عليك وعلى العربية في الوقت نفسه، وهو البنزين.
راجع كل مواسير وخراطيم البنزين واتأكد ان مفيش اي تسريب او ترشيح، خاصة عند طلمبة البنزين ونقط الربط بين الخراطيم.
واي ترشيح يبقى هتغير الافيز وتقطع ١ سم من الخرطوم وتربطه من جديد بإحكام بس بالعقل عشان الافيز ميفوتش أو يكسر.
وبعد كده تتأكد ان طلمبات العربية كلها شغالة كويس، اهمهم طلمبة الزيت
افتح غطا الزيت في اعلى مكان في الموتور وبص بكشاف جوه والعربية شغالة سلانسيه واتأكد من تقليب الزيت، بس بلاش تزود بنزين والغطا مفتوح لتغرق نفسك زيت.
اعمل كده تاني بس مع الردياتير لكن هنا هتزود بنزين عشان تتأكد ان طلمبة الميه بتقلب كويس، وتتأكد ان مفيش تسريب ميه.
بعد كده هتتأكد من عمل المراوح بشكل سليم ، هتشغل الموتور يسخن وتشوف المراوح هتعمل ايه، لو في عطل يبقى لازم تعالجه الاول.
ازاز ومرايات ومساحات وكشافات واشارات العربية لازم يكونوا تمام جدا وواضحين عشان الرؤية لك وعليك تكون واضحة.
بعد كده تاخد لفة حوالين العربية وتتأكد انها واقفة كويس ومفيش ميول في اي زاوية، والأهم عينك على الكاوتشات الاربعة.
وبعدها تمسك الصليبة وتأكد ربط على كل مسامير العجل، لا قدر الله لو في عجلة سايبة يبقى انت هتزعل اوي.
هتعدي على ورشة الكاوتش اللي بتتعامل معاها علطول يراجع هوا الكاوتشات كلها والاستبن طبعا.
اوعاك تنسى تبص على الاستبن وتراجع عليه ولو معاك عجلة كمان خدها، خلي معاك ٢ استبن لو تقدر.
لو مشوارك طويل وانت مغيرتش زيت من زمان يبقى تغير قبل ما تطلع اضمن.
خلي معاك فلتر بنزين من نوع نضيف، بلاش ابو ١٠ جنيه ده خالص لان كتير بيجي جديد عطلان...
وكمان يكون معاك cutter وكام افيز صغير.
وكام افيز كبير لخراطيم و كيعان الردياتير.
ركز مع اصوات العربية وهي دايرة وركز اكتر مع اصوات العربية وهي ماشية خاصة في المطبات عشان تعرف العفشة تمام ولا لأ
عربيتك كده تمام
طب يلا بقى شوف نفسك تمام ولا لأ انت كمان
السواقة محتاجة نظر كويس، حتى لو لابس نضارة والازاز يكون مفيش فيه خرابيش ولا اتساخات.
ولازم تكون صحتك كويسة ومعندكش اي امراض تمنعك عن السواقة وتكملة مشقة الطريق وطوله، يعني مثلا مريض الصرع مينفعش يسافر ومينفعش يسوق اصلا حرصا على حياته وحياة الاخرين
صحتك كويسة وقادر تصمد طول الطريق
يبقى لازم تكون نايم كفاية وفايق جدا ونفسياتك مرتاحة، بلاش تسوق وانت متعصب او زعلان ومكتئب.
اشرب كوباية قهوة قبل السفر، خلي معاك ميه للشرب واكل خفيف، خاصة لو معاك اطفال.
البس لبس مريح عشان الطريق طويل خاصة في الصيف.
اوعاك تنسى رخصتك ورخصة العربية وبطاقتك.
الطريق الجديد عليك بلاش تعدي سرعتك فيه ال٨٠ عشان متتفاجئش بمطب او حفرة او منحنى، الحوادث بتحصل في لحظة.
وزع الناس اللي راكبين معاك صح في العربية ووزع الشنط او الاوزان اللي معاك بشكل متوازن، عشان العربية تمشي معاك ثابتة ويكون مفيش ميول او حمل زايد في احد الجوانب
افضل مكان لركوب الاطفال هو وسط الكنبة الخلفية عشان الامان والسلامة لهم.
خد وقت راحة كل ساعة كده او خلي حد غيرك يسوق لان السواقة لفترة طويلة بتقلل من تركيزك وانتباهك.
شنطة الاسعافات اهم من شنطة الاكل، بلاش تطنشها.
لو في حد بيتعب من السفر وبيصاب بدوار يبقى لازم ياخد علاج قبل التحرك بالعربية بنص ساعة على الأقل.
لو ركنت عربيتك في مكان غريب عليك ممكن تعمل له شير لوكيشن عشان تقدر ترجع له بسهولة تاني.
وكمان خلي كاسيت العربية شغال عشان تلاقي حتجة تسمعها وتسليك،، ايا كان اللي بتسمعه احسن من صوت الموتور وشكمانات وكلاكسات العربيات اللي حواليك.
في كمان على القناة فيديو مهم عن اسباب الحوادث، خليه برضو قدام عنيك.
لو عندك نصيحة مقولنهاش في الفيديو اكتبها في تعليق وهنعمل فيديو مكمل للفيديو ده
يلا بقى بسرعة دوس لايك و شير واشترك في قناتنا والى اللقاء في حلقة جديدة والسلام ختام.
كده خلصنا الفيديو لتاعنا