العدة المطلوبة في العربية

في عدد وأدوات وقطع غيار لازم تكون مع كل واحد في عربيته هنعرفها كلنا مع بعض

السلام عليكم ورحمة الله وبركاته
اولا كده في حاجات ثابتة في كل عربية وفي حاجات متغيرة حسب مقاسات المسامير والصماوييل اللي في عربيتك.

وكمان مش معنى انك مبتعرفش تشتغل بإيدك انك تمشي من غير عدة، وارد جدا تعطل على الطريق وحد يقف يساعدك ويحتاج عدة وميلاقيش معاك.

ووارد كمان انك لما تعطل تتصل بحد يساعدك في التليفون او تشوف فيديو على يوتيوب بيشرح العطل وتحاول تطبق الخطوات بتاعتة ومتلاقيش معاك عدة، فلازم يكون معاك عدة لكل الاعطال المفاجئة والمحتملة.

وبداية كده لازم يكون معاك
فردة عجلة منفوخة كويس وحالتها مقبولة تنفع استبن، وتفحصها كل فترة، خاصة قبل السفر او المشاويير البعيدة

ولو معاك فردتين وطالع سفر بعيد يبقى تاخد الاتنين معاك احسن.

واكيد يكون معاك كوريك شغال كويس، وتكون بتعرف تستخدمه وعارف اماكن رفع عربيتك.

وكمان يكون معاك صليبة ودراع حديد يطول الصليبة عشان يزود عزم الفك والربط بها عشان تقدر تفك العجلة بسهولة.

لو معاك منفاخ كمان يكون احسن لكنه مش اساسي، واوعاك تسلف الفردة الاستبن لحد غريب على الطريق، ولو حصل يبقى لازم يكون بيتك قريب، وكمان تاخد الفردة اللي معاه عشان تجبره يقابلك ويسلمك العجلة بتاعتك.

بعد كده هتحتاج مفتاح متعدد، وليكن مفتاح فرنساوي لان في مسامير وصماوييل كتير ممكن ميبقاش معاك مفتاح لهم ويكون ده احتياطي... او لو كنت محتاج تمسك مسمار وصامولة بنفس المقاس في نفس الوقت.

بعد كده هتحتاج بنسة كلابة زي دي، ولها استخدامات متعددة ومهمة جدا، لدرجة ان واحد قريبي ركبها مرة مكان الدريكسيون لما الطارة اتكسرت منه وبقى بيحرك العربية بها.

وكمان لازم يكون معاك مفتاح بوجيهات، وطقم بوجيهات احتياطي ويكون شغال لان البوجيهات بتعطل فجأة وتوقف العربية بشكل كامل

هتحتاج كمان موبينة احتياطي ومفاتيح بحجم الصماوييل بتاعتها، عشان تقدر تحل القديمة وتركب الجديدة و غالبا بيكون مفتاح٨ مم و١٠مم واوقات ٧ مم والافضل يكون معاك مفتاح بلدي ومشرشر وبيبة من كل مقاس.

شريط لحام او شكرتون او اي لزق عازل لاي سلوك عندك في العربية.

الكربيراتير والاسبراتير وقطاوش البطارية بيحتاجوا مفاتيح ١٢ و١٣ وممكن كمان ١٠ مم

سير الكاتينة وسير الدينامو محتاجين مفاتيح ١٧ و ١٩ وممكن ١٨
والفرامل محتاجة ١٠ و٨

وكمان لازم لازم يكون معاك مفك عادة ومفك صليبة، او المفك القلاب. عادة وصليبة

مفتاح او ألانكيه لفك طبة الزيت.
بنسة تقطع وتقشر السلوك او قصافة وشريط لحام.

سلوك تطويل لاعطال الكهربا الفجائية

انبوبة معجون اسنان وبخاخة ميه عشان وقت الشبورة او المطرة تغسل الازاز بمعجون عشان تسهل عليك الرؤية.

ورق جرايد عشان تمسح بيه الازاز

علبة زيت باكم او سائل الفرامل حسب تسميتك له، عشان لو حصل تسريب للزيت تقدر تسعف نفسك بالزيت اللي معاك مؤقتا.

شمبر عجلة داخلي يكون سليم عشان لو اي فردة كاوتش ريحت معاك وانت بعيد عن بلدك تركبها ومتخليش فرصة لورش الكاوتش تشتغلك وتستغلك.

هتحتاج كمان سير دينامو، وشوية أفزان كبار لكيعان الميه، وافزان صغيرة لخراطيم البنزين.

جركن ميه ٤ لتر على الاقل لاي طواريء في تسريب المياه، والافضل يكون ميه خضرا او تكون ميه مقطرة من التكييف، وفي اسوأ الاحوال تكون ميه من الفلتر.

لازم يكون معاك مسامير وصماويل بكل المقاسات اللي في عربيتك، ٨ و ١٠ و١٢ و١٣ وغيرهم ويكون معاهم كمان كام وردة كمان.

لو عربيتك بتاكل زيت يبقى لازم يكون معاك جركن زيت احتياطي حتى لو زيت قديم اهو احسن من نقص الزيت وتتابع الزيت كل شوية وعينك على لمبة الزيت.

وكمان خلي معاك وصلة للبطارية عشان لو احتجت تدور العربية والبطارية نايمة، او حتى لو اي حد احتاج منك مساعدة.

حبل تجر به عربية اي حد او لو احتجت من حد انه يجر عربيتك، بس لازم تكون عارف ازاي تقطر عربية والاهم تبقى عارف ازاي عربية تقطرك.

خلي دايما تانك البنزين فيه بنزين بزيادة عن مشوارك، ولو المشوار طويل يبقى تحط بنزين لمجرد وصول التنك للنص عشان متتزنقش في طريق غريب عليك.

عايز اقولك خلي معاك ازازة بنزين اتنين لتر حتى، بس خايف اكون سبب في ضرر يحصل لك بسببها، لانها بلاستيك وسهل الشمس تسيحها وتعمل مشكلة، وكمان مفيش فيها خرطوم فايص عشان يعادل الضغط جوه الازازة، وهتلاقيها كل شوية تنكمش على نفسها ومطبقة وممكن تنكسر من انخفاض الضغط جواها.

والاخطر انها ضعيفة واقل خبطة فيها ممكن تنزل بنزين ومع اي شرارة يحصل اشتعال.
فبلاش تشيل بنزين خارج التنك وكفاية علينا المخاطرة بالتنك.

واخيرا خلي تليفونك مشحون بطارية ورصيد تحسبا لأي ظرف، وخلي دايما حد من اهلك عارف خط سيرك.

وختاما اضغط لايك واعمل شير للفيديو على اوسع نطاق عشان تنفع به اكبر عدد من الناس خاصة ان اغلبنا في اشد الحاجة للمعلومات دي... وبكده نكون خلصنا كل كلامنا ووصلنا لنهاية حلقتنا والى اللقاء في فيديو جديد والسلام افضل ختام