تخريد العربيات القديمة اللي مر على تاريخ صنعها اكتر 20 سنة، هنعرف مع بعض في الفيديو ده كل تفاصيل موضوع تخريد السيارات، وهنتكلم في الموضوع ده من منظور رسمي ومن منظور واقعي وعملي هقول فيه رأيي الشخصي.

أنا هاني ودي قناة أفكار جديدة جدا.

قبل ما نبدأ في الكلام عن تخريد السيارات القديمة هناخد نظرة سريعة عن موضوع تحويل السيارات لغاز او شرط ترخيص السيارات الجديدة بالغاز

اول نقطة كده هي تركيب غاز في سيارتك بالتقسيط الممل.
يعني لو انت حابب تركب منظومة غاز طبيعي في عربيتك هتقدم عليه بس لازم تكون عربيتك متوافر فيها شرطين
الشرط الاول وهو إن يكون تاريخ إنتاج السيارة قبل ٢٠ سنة.
الشرط التاني ان حالة الموتور تكون مش اقل من ٧٥٪.
يعني لو موتور عربيتك ٧٥٪ او اكتر وتاريخ انتاجها عدى عليه ٢٠ سنة يبقى انت خارج الشروط دي
وكذلك لو تاريخ انتاجها حديث اقل من ٢٠ سنة لكن حالة الموتور اقل من ٧٥٪ يبقى انت برضو خارج الشروط

انما بقى لو حققت الشرطين تقدر تركب غاز بالتقسيط وبتدفع مبلغ بسيط ١٠ ولا ١٥ جنيه مع كل تفويلة غاز، يعني لو بتفول كل شهر ١٠ مرات هتدفع من ١٠٠ ل ١٥٠ جنيه شهريا فوق سعر التفويلات لان التقسيط على ٥ سنوات وتكلفة الغاز من ٧٠٠٠ ل ١٢٠٠٠ جنيه حسب نوع العربية.

اما بقى شرط ترخيص العربيات الزيرو بالغاز فقط، فحسب الكلام الرسمي انه هيكون مطبق على العربيات اللي هيتم تبديلها بالعربيات اللي هتدخل تخريد بس، يعني العربيات اللي هتطلع من الحكومة بس،

مش العربيات المستوردة او اللي جاية جديدة عن طريق تاجر من بره.

ندخل بقى للنقطة التانية وهي تخريد السيارات القديمة اللي عدى عليها ٢٠ سنة

فعلا هيتم تخريد العربيات اللي عدى عليها ٢٠ سنة، وتم عمل صندوق مخصوص للموضوع ده، وهيبدأ يتطبق على عربيات الأجرة والميكروباص.

وبعد ٣ سنوات هيتم النظر للعربيات الملاكي كمان، بس منعرفش النظرة دي هتطبق قانون التخريد عليها ولا لأ.

ده تقريبا الكلام الرسمي اللي طلع من الحكومة والاعلام، لكن عمليا كده امتى ممكن نحقق موضوع التخريد ده وهل الدولة قادرة انها تطبقه على كل العربيات فعلا، هل الدولة تقدر تغير اسطول العربيات الحكومية اللي محتاجة تخريد من سنين طويلة؟! هل الدولة قادرة تدفع مليارات لكل اصحاب العربيات الاجرة والميكروباصات وتاخدهم بالتقسيط وبدون فوايد على سنين عديدة؟

هل الدولة تقدر تعمل كده مع ملايين السيارات القديمة في كل شوارع مصر!

وكمان العربيات اللي خارج التخريد السنة دي هتدخل تخريد السنة الجاية، يعني موديل ٢٠٠١ خارج التخريد سنة ٢٠٢٠ لكن في ٢٠٢١ هتدخل كل عربية انتجت في ٢٠٠١
وسنة ٢٠٢٢ هتدخل كل عربية انتجت في ٢٠٠٢ وهكذا يعني طريق طويل ملوش نهاية.

تفتكر دولة لسه بتحاول تقف على رجليها تعمل حاجة زي دي واكبر الدول متقدرش عليها!؟

وان افترضنا وحصل، هيحصل على مدار سنوات طويلة ملهاش حدود

والمفاجأة وقتها ان العربيات القديمة هتكون أغلى من سعرها الحالي، لان كل شخص معندوش عربية
ومحتاج يشتري عربية جديدة زيرو بالقسط هيشتري الاول عربية قديمة عشان تكون مقدم للجديدة وتسهل عليه عملية التقسيط بدون فوايد كمان، يعني مترميش عربيتك القديمة بتراب الفلوس لانها هتبقى ذات قيمة و اغلى بكتير ومطلوبة، ده طبعا لو افترضنا قدرت الحكومة على تطبيق قانون التخريد ده بشكل كامل، وانا شخصيا اتوقع ان استحالة يتم تطبيقه على الملاكي. الا اختيارا مش بشكل اجباري، بل تطبيقها هيكون له شروط وهتعتبرها الحكومة منحة مش اي حد ياخدها لانها ميزة كبيرة، وكمان الملاكي القديم شغال في اعتى واقوى الدول مش منطقي ان مصر تمنع حركتها في الشارع المصري وهي بتتحرك في شوارع اوروبا وامريكا.

انا كده خلصت كلامي ومنتظر تعليقاتكم واللي عجبه الفيديو واستفاد منه يدوس لايك ويعمل شير عشان يفيد غيره، واللي عنده اي اعتراض يسيب تعليق ونتناقش في كلامه... واللي لسه جديد في القناة ياخد جولة كده ويشوف الشغل القديم بتاعنا وطبعا يزيدنا شرف انه يشترك في القناة ويفعل علامة الجرس... وإلى اللقاء في فيديو جديد والسلام عليكم ورحمة الله وبركاته.