چوان وش السيلندر او چوان الكولاس او الكازكيت
عشان تضمن نجاح تركيب چوان وش السيلندر اهم حاجة اهم حاجة النضافة
وفكرة وطريقة التركيب في كل المحركات سواء 4 سيلندر او 6 سيلندر واحدة واساسيات ومبادئ ثابتة

اولا: بتفك كل ادوات التغذية وخراطيم الماء والاسلاك وخراطيم البنزيين وسير الكاتينة وتتاكد ان في علامات علي طنبورة السير العلوية والسفلية ولو مافيش علامات باستخدام مفك اعمل علامة فوق وتحت

ثانيا : بتفك مسامير الوش وتخرج الوش خارج المحرك وبالنظر لو لقيت اي تآكل في الوش او صبابات معووجة بسبب انقطاع سير الكاتينة بتروح للخراط بيعمل اللازم من قياس الوش عشان لو مقفع اي غير متساوي بسبب السخونة او تغيير صبابات و يملأ الفراغات

ثالثا : ودي اهم نقطة لو الموتور حسيت انه بياكل زيت او قديم نسبيا اعمل طقم شنبر بالمرة ليه
لانك لو غيرت اويل سيل الصباب وعملت روديه هتحكم الموتور من فوق والشنابر تحت ضعيفة هتاكل زيت بعد وقت بسيط من تغيير الچوان نصيحة
ودا رابط عمل طقم شنبر للموتور
https://youtu.be/y1d3GXCyz6o

رابعا: هتشيل اي زيادات چوان بسكينة المعجون
وهتجيب صنفرة خشنة لازالة البواقي وصنفرة ناعمة في الاخر خالص للتنعيم والتنظيف وباستخدام البنزين

خامسا: تفتح مجاري المياه المسدودة بمفك وتمشط المسامير في البلوكة وتنظف ببنزين تاني وتسيب البنزين ينشف

سادسا: تجيب نفس تخانة الچوان اللي خارج من الموتور ولو الوش اتمسح تعرف من الخراط نحط چوان ولا 2

سابعا: تتاكد ان في ذنبة او جلبة او علامة او دليل او مارك علي البلوكة عشان دي اللي بتثبت الچوان وتخليه مايتحركش من مكانه

ثامنا : تفرش جومالكة او لزق چوان علي البلوكة والوش وتركب الچوان علي المجاري المظبوطة للموتور وماتعكسش الجوان عشان ماتحصلش كارثة
عايز تحط زيت حط زيت مافيش مشكلة

تاسعا : تربيط المسامير بعزم ايدك مرة وتستني وتاني وتالت ورابع وبعد يومين مشي تربط
ودا ڤيديو لطريقة التربيط
https://youtu.be/SZLlIqAtvk0

واخيرا : تركب سير الكاتينة علي نفس العلامات وتلف الموتور مرة او اتنين وتتاكد انها مظبوطة علي العلامات والمكنة مش قافشة وقفل كل الوصلات والخراطيم
وفي بعض السيارات هتخلف تقسيمة كهرباء
وانا بعمل حاليا فيديو عن ظبط التقسيمة وهي كالتالي
1342
يعني بتطلع اول بستم فوق وتخلي شاكوش الاسبراتير السلكة بتاعته مع البوجيه رقم 1
ومع عقارب الساعة البن اللي بعديه مع بوچيه رقم 3
وبعديها بوچيه 4 وبعديها بوچيه 2
ودور وادعيلي

وعشان تتفرج براحتك علي اي ڤيديو من خلال تطبيق اليوتيوب بدلا من متصفح الفيس بوك
عملتلك الشرح في اللينك دا
https://youtu.be/MDecjNTt-fI
...............................................................................

لا تنسي الاشتراك بالقناة وتفعيل زر الجرس
رابط قناة ( صلح بنفسك مع جون JOHN SAMUEL )
وتهتم بالميكانيكا والكهرباء والتبريد والتكييف والالكترونيات و غيرها
https://www.youtube.com/channel/UCt-GYxDFDMQf5ORJwEGsgrQ/videos?disable_polymer=1

الجروب الخاص بنا

اعطال السيارات وطرق اصلاحها
https://www.facebook.com/groups/489922481159033/
........................................................................
رابط الحساب الشخصي
https://www.facebook.com/profile.php?id=100001035087209

#طريقة_تركيب_وتغيير_چوان_وش_السيلندر_فيات_ريجاتا
#طريقة_تركيب_چوان_كولاس