لو عندك مشكلة مع العربية الصبح في الدوارة وبتغيب معاك او البطارية بتفضى من كتر المحاولات الخائبة يبقى لازم تعرف ان السبب في العربيات القديمة تلاتة
الاولى الكربيراتير
وبيكون اما البيكات بتاعة البنزين او الهوا مش بنفس مقاس الكتالوج
او كاوتشة الرداخ فيها مشكلة ومحتاجة تغيير
او مسمار الهوا مش مظبوط
مسمار الهوا بقى بيتربط للاخر وبعدين تفكه لبره ٣ لفات او لفتين ونص اللفة منهم ٣٦٠ درجة كاملة
وكمان استك مسمار الهوا لو مقطوع او متاكل لازم تغيره
السبب التاني هو كربنة البوجيهات
يعني الحرق ضعيف والخليط مش بيتحرق بشكل كامل
والمشكلة دي لها اسباب كتيرة
اهمها ان البوجيهات نفسها مش مظبوطة
يعني الخلوص بتاعها واسع او ضيق عن الطبيعي، واغلب العربيات خلوصها ٠.٧ مم
وكمان كابلات البوجيهات لو مشرزة او محمصة وبتسرب كهربا تضعف الشرارة وتسبب كربنة البوجيهات، وهنشوف ازاي تعالجها بنفسك وتختبرها
بعد كده عندنا الاسبراتير
ممكن تلاقي الابلاتين محتاج صنفرة
وممكن يكون محتاج يوسع شوية لان الشرارة بتطلع في اللحظة اللي الابلاتين مفتوح فيها، فلما تكون فتحة الابلاتين ضيقة يبقى وقت الشرارة قليل وبالتالي لازم نعملها زي الكتالوج ٠.٤ مم
بعد كده هنلاقي وش الاسبراتير والشاكوش
هنحتاج نصنفر كل حاجة معدن متاح الوصول لها بسلك مواعين مش بصنفرة
ونقفل ونظبط الكهربا بتاعة الاسبراتير تمام ونقدم سنة صغيرة كمان.
تالت سبب هو عيب في الموتور
زي التاكيهات
او الصبابات مش محكومة او كاوتشة الصبابات بتنزل زيت جوه غرف الحريق
او الشنبر بيفوت زبت لفوق جوه غرف الحرق
اظبط كل حاجة من دي وانسى موضوع تأخير دوارة العربية في الصباح