#حوادث_الطرق
#حوادث_السيارات
#اسباب_الحوادث
اساسيات لتجنب الحوادث.
٢ نصيحة تجنبك الحوادث
١- خليك ماشي مع الطريق.
يعني الطريق الضيق او الزحمة امشي عليه بالراحة وبهدوء وفي جنب ثابت متمشيش في النص ولا تقضيها رايح جاي يمين وشمال ومتتخطاش العربيات إلا وقت اللزوم
٢- اياك تسرع فجأة او تهدي فجأة إلا لضرورة وعينك تلمح اللي وراك لو هتهدي، وتضرب كلاكس او نور للي قدامك لو هتعدي وطبعا تعدي من على شمال العربية اللي قدامك مش من على اليمين.
٣- في الشبورة او الامطار في قواعد تانية وفي فيديو مخصوص على القناة للتغلب عليهم هتلاقيه قدامك دلوقتي على الشاشة، افتحه وشوفه واضغط على سهم الرجوع ده عشان ترجع تكمل الفيديو بتاعنا ده تاني
٤- متتخطاش عربية في دوران او طريق ضيق وزحمة إلا لضرورة وتكون شايف كويس الطريق قدامك وتكون العربية اللي انت بتتخطاها سرعتها قليلة بحيث انك تقدر تعديها بسرعة، وتكون عربية واحدة مش اتنين او عربية نقل بمقطورة.
٥- استخدم فرملة الموتور مع الفرامل في حالة احتياج الوقوف الاضطراري الفجائي، يعني تسيب البنزين وتدوس فرامل وانت على الغيار المناسب للسرعة.
٦- اياك تعتمد على العربية اللي قدامك في كشف الطريق الجديد، لانك متعرفش هو عارف الطريق ده او لا.. ومركز او لا.. سهل تلبس في مطب من وراه، او تخبط في عربية ظهرت قدامك فجأة.والطرق الجديدة عليك امشي بهدوء عليها واعتمد بس على نفسك.
٧- مرايات واشارات وكشافات العربية الامامية والخلفية اهميتهم كبيرة وتصليحهم لازم يكون آني.
٨- الكشف على ضغط وكفاءة وصلاحية الاطارات امر مهم جدا.
٩- في حالة انفجار اي اطار ممنوع استخدام الفرامل، ولازم تمسك الطارة بقوة وتعتمد على فرملة الموتور.
١٠- النور والاشارات والكلاكس مش بس وسيلة لكشف الطريق لك لكن وسيلة لكشفك على الطريق.
١١- السرعة العالية مهما كانت عربيتك حديثة ومهما كنت سواق محترف مش هتضمن اخطاء الغير، ولا أعطال العربية المفاجأة، ولا كسور وانعطافات الطريق الفجائية.
١٢- اهم نقطة هي النظر في المرايات قبل الفرملة عند المطبات لان حوادث كتيرة بتحصل بسبب كده وحصلتلي انا شخصيا من فترة بسيطة، فلو لقيت حد وراك جاي بسرعته لازم تاكل المطب وتاخد الجنب التاني.
١٣- اياك تمشي عكس ولو حتى متر حتى لو مش هتاخد مخالفة، حتى لو هتاخد مكافأة
١٤- اياك تركن شمال او تركن في دوران او طريق سريع مفيش فيه رصيف، او طريق سريع وضيق الا لضرورة او تعطل في العربية ولازم تشغل الانتظار وانت راكن ولو معاك اطفال تنزلهم من العربية
١٥- عينك قدامك مش جنبك حتى لو بتكلم اللي جنبك، مش لازم تشوفه وانت بتكلمه ولا يشوفك واعتبر انك بتكلمه في التليفون، وبلاش تبص في التليفون وانت سايق.
١٥"_ كل شوية خدلك لمحة في المرايات عشان تفضل شايف كل اللي حواليك ومتوقع الخطر قبل حدوثه، خاصة لما تيجي تهدي او تنقل على جنب الطريق التاني.
١٦- حزام الامان مهم جدا وبيفرق خاصة مع اللي جنب السواق لانه بيتفاجيء بالحادثة
١٧- اي عطل في الفرامل لازم يتصلح ولو حصل فجأة وانت ماشي على سرعة يبقى تنقل لغيار اقل وتسيب ديبرياج وتهدي واحدة واحدة بالغيارات لحد ما العربية تبطل وتقف وتشوف الفيديو ده
https://youtu.be/3KVX8E1uU5Y
١٨- بلاش تدوس فرامل بقوة الا لضرورة لان كتر الدوس بقوة بيعجل تعطلها.
١٩- متمشيش ورا عربية نقل ولا جنبها ولا قدامها، ولا ورا عربية محملة بضاعة ولا ورا توكتوك ولا تاكسي قدر الامكان، لان نسبة كبيرة من سواقين النقل بياخدوا برشام او حشيش مع كامل الاحترام للجميع، بس ده امر واقع ومفروض علينا وكمان بيمشوا على طرق جديدة كل يوم ومش حافظين الطريق
٢٠- متتخطاش عربية في دوران ولا تتخطى عربية بمقطورة الا والطريق فاضي خالص وتقلب نور وكلاكس وانت بتتخطاه
٢١- الاشارات والمرايات والكشافات والكلاكس مش منظر ولا لعبة، لازم تعرف تستخدمهم صح مش تلعب فيهم علطول ولا تطنشهم وتعتبرهم مش موجودين.
٢٢- لما تتخطى حد راكب موتوسيكل او عجلة او طفل ماشي لازم تخلي بينك وبينه مسافة كبيرة لان لا قدر الله ممكن يقع قدامك فجأة.
٢٣- متسوقش وانت عايز تنام او واخد علاج للبرد او للحساسية او اي مهديء لانك مش بس بتعرض حياتك للخطر، حياة ناس كتير غيرك امانة في ايدك قدام القانون وقدام ضميرك
٢٤- لو اتفاجئت بمطب هدي قبل منه قدر الامكان وبعدين سيب الفرامل وكل المطب والعربية معدولة على الطريق متاكلش مطب وانت كاسر الدريكسيون لازم العربية تكون زي السهم متجهة للأمام في حالة المطبات المفاجئة.
٢٥- اوعاك تسابق حد مهما كنت راكب او مهما كان راكب، الشطارة انك توصل بأمان مش انك توصل بسرعة
٢٦- افحص كويس الكاوتش بتاعك وزيت الفرامل والنور كل يوم خاصة قبل السفر والمساحات لازم تكون شغالة قبل دخول فصل الشتا
٢٧- لو في حد واقف مستنيك او بتدور على محل معين او شارع او بيت يبقى تشغل انتظار وتاخد يمينك وتمشي على الهادي
٢٨ متعتمدش على المرايات لوحدها لان فيها نقطة عمياء
٢٩.ممكن حد يفتح الباب ويخرج من عربيته او حتى من بيته من غير ما تلحق تفاديه وانت معدي جنبه، يعني لازم تاخد بالك حتى وانت معدي جنب بيت او محل خاصة في الشوارع الضيقة
٣٠.اوعاك تتخطى اي حد من اليمين الا لضرورة وتاخدها خطف
٣١. هدي السرعة وسيب البنزين في المنعطفات، يعني الدورانات
٣٢. في طرق نهايتها تقاطع ناقص، يعني ٣ اتجاهات بس مش اربعة لازم تبقى متوقعها وشايفها من بعيد.
٣٣. وبمناسبة التوقعات لازم تتوقع ان العربيات اللي ماشية ممكن تقف فجأة او تكسر عليك فجأة واللي واقفة ممكن تمشي فجأة والسريعة ممكن تبطأ والبطيئة ممكن تسرع برضو فجأة
لازم تعتبر كل الناس اللي على الطريق مجانين وانت الوحيد اللي عاقل، لازم تعتبر كل الناس مساطيل وانت اللي فايق، لازم تعتبر كل الناس لسه بتتعلم السواقة وانت اللي معلم، لازم كلنا نمشي بالمبدأ ده ويكون مبدأنا حماية أرواح غيرنا قبل ارواحنا