ليه التكييف بيعمل ريحة كمكمة في الغرفة في الأجواء متوسطة الحرارة؟

اهلا بكم في فيديو جديد ومعكم هاني

التكييف في الاجواء الحاره او شديده الحراره بيخلي الجو في الاوضه جميل جدا وما فيش فيه اي رطوبه او ريحه كمكمه او كتمة طالما كانت الاوضه نظيفه والتكييف نضيف

اما في الاجواء متوسطه الحراره اللي هي بين 30 ل 38 بتلاقي كثير ريحه الاوضه فيها كمكمه ومكتومه، خاصه بالليل لما يكون درجه الحراره في الغرفه بدون تشغيل التكييف 29 او 30

مع ان هو هو التكييف وهي هي النظافه وهي هي الظروف

ما عدا بس اختلاف درجه الحراره مع ان بديهيا كده المفروض يشتغل بكفاءه اكثر في درجه الحراره القليله، لا مش صح الكلام ده على فكره

طب ليه بقى بنشم ريحه الكتمة او الكمكمه دي في الاوقات دي

السر كله بيكون في ان التكييف بيفصل فترات اطول من الاوقات اللي فيها درجه الحراره عاليه
ده طبعا في التكييفات العاديه

ولو درجه الحراره تحت المتوسطه التكييف الانفرتر بيفصل كمان وقتها وهتلاقي ريحه الكمكمه او الكتمه في الاوضه معاه خاصه لو كنت عامل درجه الحراره 25 او 26 هتخلي التكييف يفصل فترات اطول وطبعا استهلاكه في الكهرباء هيكون قليل جدا لكن مش هتحس بقيمه التكييف ولا كفاءه تشغيل

طب ليه لما التكييف بيفصل الكتمه بتزيد

لان الكتمه دي سببها زياده الرطوبه في الجو في الغرفه وبالتالي لو الكمبريسور بتاعه فصل هيخلي الكويل بتاع الوحده الداخليه يبقى اقل بروده بسبب توقف دورة الفريون عن الحركة

وبالتالي مش هيحصل تجميع او تكثيف لجزيئات الميه اللي بتعدي مع الهوا وهو شغال خاصة مع وجود عدد اكبر من الناس في الغرفه المقفوله

لان نفسنا داخل خارج مليان ثاني اكسيد كربون وميه، وقتها بتزيد الرطوبه في جو الاوضه لحد ما التكييف يبدا يشتغل تاني ويقللها واحده بواحده لكن ممكن بسرعه يوصل لدرجه الحراره المطلوبه ويرجع يفصل قبل ما يخلص كل الرطوبه اللي اتجمعت في الاوضه

المشكله دي موجوده في التكييفات كلها عموما بس الانفرتر بيكون نسبه الكتمه دي اقل بكثير عن العادي خاصه لو عملته على درجه حراره تحت ال 25

طيب علشان تحل المشكله دي قدامك حلين

الحل الاول انك تشغل وضع الدرايش لان الوضع ده بيشغل المروحه على ابطا سرعه والكمبروسر بيفضل شغال علشان يزود تبريد بروده الكويل وقتها هيجمع كل الرطوبه اللي موجوده في الغرفه على هيئه ثلج على الكويل وبعد شويه الكمبروسر هيفصل خالص والمروحه كمان هتقف خالص لحد الثلج ده ما يسيح وينزل في دوره الصرف بتاعه التكييف يرجع يشتغل ثاني من جديد بنفس الطريقه دي

اما الحل الثاني
وهو انك تنزل درجه الحراره درجه او اثنين او ٣ عن المعتاد بتاعك في الاجواء الحاره او شديده الحراره يعني لو انت بتعمل التكييف على 26 في درجات الحراره اللي فوق الاربعين، يبقى لما تنزل تحت الاربعين هتحتاج تنزله ل 25 او 24 علشان يشتغل فتره اطول وبالتالي يقلل نسبه الرطوبه اللي موجوده في الاوضه ويمنع ريحه الكتمه اللي بنشمها خاصه لما نخرج بره الاوضه ونرجع ندخل ثاني

وبكده نكون وصلنا لنهايه حلقتنا لايك بقى الفيديو ولو لك اي سؤال اكتبه لي في تحت في التعليقات والسلام عليكم ورحمه الله وبركاته