#أفكار_جديدة_جدا #تكييفات #اضرار_التكييف
كيف تحمي نفسك من مخاطر المكيفات
اهلا بيكم في قناة افكار جديدة جدا ومعاكم هاني
التكييف او المكيف اصبح جهاز اساسي في بيوت كتير مننا رغم ارتفاع أسعارهم مؤخرا، خاصة اخر كام شهر
لكن ما تزال في علامات استفهام كتير حوالين التكييف وأضراره على الصحة العامة خاصة للأطفال
في الفيديو ده هنعرف ازاي نتعامل مع التكييف وناخد كل مميزاته بدون أي أضرار تذكر
بس الأول كده شرفنا باشتراك القناة واخر الفيديو متنساش تعمل لايك اذا حسيت انك استفدت ولو بمعلومة واحدة جديدة ومفيدة
أولا كده اياك ثم اياك تشغل التكييف وانت مش قاعد في الغرفة الموجود فيها التكييف ده
لأن في ناس بتحب تشغل التكييف وهي بره وبعدين تدخل الأوضة وهي متلجة، وده بيعمل صدمة وأكبر سبب لدور برد محترم متعرفش حدوده ايه، لانك كده مش هتتكيف انت هتتبستر، يعني مينفعش تدخل أوضة فيها تكييف شغال على درجة حرارة أقل من 27 والجو بره مثلا 35 أو 40
خاصة الأطفال
يعني لو هتدخل غرفة مكيفة وانت حران او عرقان لازم التكييف يتقفل الأول دقيقتين تلاتة، ودرجه حراره الاوضه تكون قريبه جدا لدرجه حراره بقيه الشقه او درجه حراره المكان اللي انت جاي منه اصلا، وبعدين تدخل براحتك وتشغله تاني وانت جوه، عشان يبدأ في خفض الحرارة تدريجيا، وما يحصلكش بستره زي المره اللي فاتت
ثانيا لو انت عرقان بغزارة ممنوع تدخل غرفة مكيفة ألا لما تتخلص من العرق ده الاول
ثالثا لو هتخرج من الغرفة المكيفة مفيش مشكلة انك تفتح الباب وتخرج مرة واحدة فجأة لأن الانتقال من البرد للحر مفيش فيه خطورة عمليا
أنما لو هترجع تاني للغرفة المكيفة دي يبقى لازم تطفي التكييف قبل دخولك بدقايق ولو بسيطة،
خاصة الأطفال يا جماعة، لو الطفل خارج يبقى تطفي التكييف وتفتح الباب لمدة ٤ او ٥ دقايق قبل رجوع الطفل تاني الغرفة، ولما يرجع شغل المكيف تاني من جديد، ايوه هيزود شويه في استهلاك الكهرباء بس صحه ولادنا اهم بكثير من اي تكلفه زياده
اما بقى لو انت مصمم تدخل وتخرج بدون اطفاء المكيف
يبقى حاول تطس وشك بشوية ميه قبل الدخول مباشرة واشرب بق ميه باردة
ولما تدخل الغرفة المكيفة حاول تحبس نفسك كام ثانية جواها على ما جسمك يبدأ يحس انك في مكان بارد
رابعا النوم في التكييف
عشان تنام نوم امن ومريح في المكيف لازم تعمل الخطوات دي
أول خطوة متنزلش الحرارة أوي، يعني من 25 ل 27 حلو جدا
تاني خطوة متخليش الهوا بتاع التكييف عالي، يعني خلي المروحة بتاعة التكييف على الهادي أو المتوسط
ثالت خطوة متخليش مروحة التكييف موجهة للسرير وانت نايم لأن كده هتجيبلك برد علطول وهتصحى تعبان ومكسر
خامسا بقى وأخر نقطة وهي اقتصادية لأن التكييف لو تجنبنا أضراره العضوية مش سهل نتجنب اضراره المادية
ومعروف انه بيسحب كهربا كتير وده أكبر سبب بيخلي ناس كتير تنفر منه
عشان كده انا بنصحك بالتكييف الانفرتر لانه بيشتغل بسلاسة وهدوء عن المكيف العادي
وكمان لازم يكون مناسب لحجم الغرفة
ويكون مفيش فيه مشاكل فنيه عشان ميهدرش طاقة كبيرة في الفاضي
وتكون الكهربا مظبوطة
ولازم الغرفة تكون مقفولة بدرجة كويسة، مش مقفولة بإحكام أوي برضو، يعني كفاية تقفل الأبواب والشبابيك عادي، متقفلش الفراغات اللي تحت عقب الباب او فتحة المفتاح.
ولو الفيديو عجبكم اوعدكم بفيديو تاني هنتكلم فيه عن طريقة توفير الكهرباء للمكيفات
دي باختصار كل النصايح اللي اقدر اقدمها لكم في منع او تقليل مخاطر وأضرار المكيفات
لايك بقى وشير للفيديو والسلام ختام