#افكار_جديدة_جدا #توفير_الكهربا
ازاي توفر كهربا في شقتك


عداد الكهربا بتاعك ايا كان نوعه سواء كان عداد قديم بالبكرة الدوارة او عداد ديجتال او عداد الكارت لازم تبقى عارف ازاي تتعامل معاه.

اما بالنسبة للعدادات القديمة اللي هي مش بالكارت فالتعامل معاها لازم يكون مختلف شوية لان زي ما كلنا عارفين أن محدش بيجي يقرأ العداد وبيحطوا ارقام من دماغهم قليلة شهرين تلاتة عشان يخبطوك خبطة جامدة في الشهر اللي بعدهم وتدخل شريحة عالية.

المهم بقى المشكلة دي لها ٣ حلول

الحل الاول وهو انك تسجل قراية العداد على موقع الشركة، كل شهر بين يوم ١٠ ليوم ١٥ وهسيبلك الرابط بتاع الموقع في الوصف أسفل الفيديو، وطريقة التسجيل لها فيديو على القناة هيظهر قدامك دلوقتي وهيكون كمان في الوصف، بس للأسف الحل ده بقاله كام شهر مش دقيق والقراية اللي بسجلها مبتجيش مظبوطة في الوصل، وبلاقي قراية اقل منها، عاملين معايا الواجب اخر حاجة، رغم اني بسجل القراية من اكتر من خمس سنين ومحصلش اي مشاكل قبل كده.. بس تقريبا كده مش ظابطين الموضوع معايا عشان اغير العداد لابو كارت لكن ده ميمنعش انك تجرب تسجلها على الموقع يمكن حظك يطلع احسن من حظي

اما الحل التاني فهو انك تسجل القراية في الشركة نفسها مش الموقع الالكتروني

يعني تاخد وصل قديم وتاخد قراية العداد والبطاقة وتطلع على فرع شبكة الكهربا الصبح قبل الساعة ١٢ وتدخل عند غرفة الحاسب الالي وتسجل القراية، والحل ده غالبا مضمون ومؤكد.

الحل التالت بقى وهو انك تريح دماغك وتغير العداد عشان تنسى موضوع التسجيل ده وتفكر بس في طريقة التوفير الحقيقية، وسيبك بقى من الناس اللي بتخوفك من العداد الكارت لانهم مش فاهمين.

نتكلم بقى باختصار عن خطوات مهمة جدا لازم تاخدها في تصرفاتك وشقتك عشان توفر كهربا.

اول خطوة ان كل أجهزة البيت تكون من نوع A يعني استهلاك اقل وكفاءة اعلى زي الصور دي كده، ولو هتجيب تكييف لازم يبقى انفرتر.

طبعا اغلبنا معندوش اجهزة A ولا انفرتر، بل اغلبنا عنده اجهزة عادية، واحب اقولك ان الفرق بين الاجهزة a وغيرها ممكن يتخطى ال٥٠٪ استهلاك.

لو حالتك المادية تسمحلك تغير كل الأجهزة ل A ....واحد ورا التاني وتبيع الأجهزة القديمة يبقى خير.

اما لو حالتك المادية متسمحش يبقى حاول تقتصد قدر الامكان وتابع النصايح دي بخصوص كل جهاز.

اولا كده السخان لانه اكتر جهاز بيستهلك كهربا في فصل الشتا بعد الدفايات لكنه اساسي.

لو تعرف تغيره لسخان غاز يبقى افضل
متعرفش يبقى سيبك من التخاريف اللي بتقول شغله طول الوقت عشان ميرجعش يستهلك كهربا تاني لما الميه تبرد
لان الحفاظ على درجة حرارة ثابتة بتستهلك طاقة اعلى بكتير من الوصول لها مرة او مرتين بس في اليوم. وكمان لما تحتاج السخان شغله بس بربع او نص ساعة قبل الاستخدام يدفي الميه بس مش يوصل للغليان... ولو تعرف تقلل الحرارة من الترموستات تبقى تمام اوي، وهنعمل عن الموضوع ده فيديو قريب جدا، تابع بس القناة.

وطبعا لو تعرف تغيره للفئة A يبقى افضل طبعا.

تاني حاجة الاضاءة
غير كل اللمبات ليد ومتزودش عن ١٢ وات وبلاش تشغل نور الشقة كله وانت صاحي، ولما تنام شغل نواسة او وناسة ايا كان اسمها عندك تكون ٣ وات في الصالة عشان تكون الاضاءة خافتة وتعرف تنام مرتاح.

تالت حاجة التلاجة والديب فريزر
لو تعرف تكتفي بالتلاجة يكون افضل، لو ضروري تشغل الفريزر يبقى حاول تطفيه خمس او ست ساعات في اليوم، في الوقت اللي مش محتاج تفتحه خالص، بحيث ان الاكل اللي فيه يفضل محتفظ بتجمده.

ولو تعرف تعمل كده في التلاجة كمان يكون افضل.

التكييف
لازم تقفل الغرفة كويس جدا وهو شغال وبلاش تنزل الحرارة اوي، يعني ٢٦ او ٢٥ حلو جدا ومتعليش سرعة المروحة كمان وبلاش تشغله الا وقت النوم طالما الجو مش حرارته مزعجة بالنهار.

الدفاية اما بتشتغل كتير بتقدر تسحل كهربا اكتر من التكييف كمان خاصة او دفاية ٢٠٠٠ وات فيما فوق
عشان كده الدفاية تشتغل وقت النوم برضو وبلاش تزود الحرارة اوي عشان صحتك قبل فلوسك وتكون سايب شباك او باب متوارب على خفيف عشان يجدد هوا الغرفة، وفي فيديو على القناة فيه تفاصيل اكتر عن الطريقة المثلى لاستخدام الدفاية ومقارنة بين انواع الدفايات كلها. هسيبه في الوصف برضو.

بلاس الدفايات الهالوجين ام شمعة لانها مبتفصلش لكن الزيت فيها ترموستات وبتفصل وتشتغل كل شوية

متشغلش المراوح على الفاضي خاصة لو هتخرج من البيت

المكوة والكاتيل والميكروويف.
التلاتة قدرتهم عالية بس شغلهم قليل
بس لو تهاونت بهم هتدفع كهربا كتير

يعني المكوة تشغلها وقت الحاجة بس وبلاش تنساها شغالة، ولو هترجع تكمل بعد ربع ساعة او ١٠ دقايق يبقى تفصلها احسن.

وكذلك الغلاية تشغلها وقت اللزوم وتعاير الميه اللي محتاجها بالكوباية الاول عشان تشتغل اقل وقت ممكن وتتأكد ان الغطا بتاعها محكم الغلق.

الميكروويف جهاز مهم في كل بيت لانه عنده القدرة على تسخين الاكل بمهارة عالية في بضع دقائق وبيطلع منه كأنه لسه نازل من على النار حالا خاصة المخبوزات، واستهلاك الكهربا فيه خفيف لان ٥ دقايق شغل كافية جدا لتسخين كمية معقولة من اي طعام.

المهم برضو انك تسخن الكمية المطلوب تناولها بس مش تسخن كمية كبيرة وترجع تبردها او تجمدها.

فرن الكهربا او البتوجاز الكهربا
بلاش تستخدمهم الا في الضرورة القصوى لانهم مجرمين حرب.

الكمبيوتر والسماعات والراديو استهلاكهم بسيط بس اللي انت مش محتاجة يبقى تقفله.

المكنسة والغسالة ملناش دعوة بهم لان اي حد بيستخدمهم عارف ازاي يشغلهم وامتى ومينفعش تقتصد فيهم الا بالحفاظ على هدومك نضيفة وارض بيتك نضيفة قدر الامكان.

بلاش بقى تنام قدام التليفزيون زي زمان لان الكهربا غليت ولسه هتغلى اكتر كمان

شاحن الموبايل
اكبر مصيبة ان في ناس فاكرة انه بيستنلك كهربا
الشاحن العادي عندنا بيكون ٥ او ١٠ وات
يعني عشان تاخد ١٠٠٠ وات وتبقى استهلكت كيلو وات محتاج ١٠٠ ساعة تقريبا
احسبها انت بقى على الشاحن بتاعك واعرف استهلاكه شهريا.