كيف نفرق بين النقد الصحيح او النقد المبالغ فيه ؟ احيانا اقول انا ظلمته اوقات اصبح احكي لا يوجد مرض نرجسية و هذا كلام فارغ و في بعض الاحيان اقول كل الازواج انانيين و يريدون فقط من يهتم بهم بعض الاحيان اقول هنالك ازواج اسواء هنالك تفكير زائد و تشتت بالافكار كيف نثبت على راي واحد؟ هنالك من نصحتني انت بمشاهدتك فيديوهات سوف تخربين بيتك انظري الى فلانه جميلة جدا و تعمل و زوجها يعنفها وصابرة تقول لي بمشاهدتك هذه الفيديوهات انت سوف تهدين اسرتك عندما تسمعين انه شخصية يفضل الهروب منها ان امكن و عدم التعايش معها اصبحت لا اعلم كيف اتخذ القرار الصحيح ؟

قبل أي كلام شوفي فيديو الثلاثين سؤال عشان تعرفي اذا الكلام اللي حقوله بينطبق على زوجك ولا لا
ازاي اعرف اذا النرجسي بينتقدني لمجرد النقد ولا هو فعلا فيه حاجة مش عاجباه فيا ومفروض اغيرها؟ او بصيغة أخرى ايه الفرق بين النقد النرجسي والنقد العادي؟
عشان تعرفي اذا هو فعلا نقد نرجسي ولا لا لازم تكوني عارفة نفسك أصلا وعارفة صفاتك وعارفة مميزاتك وعيوبك واوعي تقولي معنديش مميزات ولا تقولي معنديش عيوب ،محدش كله عيوب ومحدش كله مميزات فانتي لازم تقعدي وتكتبي كل حاجة حلوة انتي عارفة انها فيكي والناس دايما بتشركها فيكي وتكتبي كمان عيوبك والحاجات اللي كل اللي حواليكي بينتقدوها فيكي وتخلي الورقتين دول معاكي دايما وتقريهم كتير عشان تحفظيهم وتبقي مصحصحة له لما ينتقدك في حاجة تشوفي هي فعلا موجودة في العيوب ولا لا او موجود عكسها في المميزات ولا لا يعني مثلا من مميزاتك انك كريمة وهو بيقول لك انك بخيلة او من عيوبك انك مش بتتكلمي وساكتة طول الوقت ومش بتعرفي تعملي حوار مثلا وهو ييجي يقول لك انتي ثرثارة او رغاية ، في الحالة دي حتعرفي اذا انتقاداته حقيقية ولا افترا وتبلي عليكي ،
كمان حاجة تعرفي بيها ، الحاجة اللي ينتقدك فيها وانتي تنهاري وتدافعي عن نفسك وتبرري مشاعرك وتبكي وازاي تفكر كدة فيا وكل العبط دة وتلاقيه يكرر النقد نفسه تاني كل فترة تأكدي انه نقد نرجسي لانه بياخد بيه وقود .
حاجة ثالثة ،لوانتقدك بحاجة انتي عارفة انها فيه هو زي البخل مثلا فانتي لازم تتأكدي ان النقد نرجسي لانه اسقاط ،
كمان لو انتقدك عن طريق المقارنة بينك وبين امه او اخته او أي حد فدة كمان نقد نرجسي لانه تثليث
اما اذا انتقدك في حاجة كل الناس بتشهد ان فيكي عكسها زي مثلا كل الناس تقول عليكي ذكية او متحدثة لبقة وهو يقول عليكي غبية ومابتعرفيش تتكلمي لازم تعرفي ان دة نقد نرجسي طبعا صريح
النقد النرجسي سهل جدا تعرفيه المهم انك تكوني أصلا فاهمة النرجسي
اما موضوع مفيش نرجسية وكله كلام فارغ وبعدين كل الأزواج انانيين فدة كله تذبذب طبيعي جدا من اثر الصدمة
اما بقي بالنسبة للي بتقول لك شوفي فلانة الجميلة اللي كلها مميزات وزوجها يعنفها وصابرة ، بصراحة بغض النظر عن نوع التعنيف اللي بيعنفهولها ولو كان بيضربها الا ان دة كلام مش منطقي ومعناه ان انتي مفروض تتئذي انتي كمان زيها ومعناه انك مش مفروض تفهمي اللي النرجسي وتفضلي عايشة مذلولة ومهانة ويجي لك اكتئاب وامراض جسدية وعادي جدا تعايشي زيك زي كل الناس ودة مش معناه اني بقول لك اتطلقي لا اطلاقا انا بقول لك اتعلمي واعرفي تكتر عشان تعرفي تتعاملي مع النرجسي وتحفظي كرامتك وصحتك وتحفظي اولادك من اذاه يبقى لازم تشوفي الفيديوهات او تقرأي عشان تفهمي تتعاملي ازاي مع الشخصيات السامة اللي محيطين بيكي .
عشان تاخدي القرار الصحيح صلي استخارة وادعي ربنا ينور بصيرتك ادعي كتير كتير كتير عشان ربنا ينور لك الدنيا وتعرفي ايه الصح وايه الغلط