ازاي تعرفي النرجسي من موقف واحد ؟ عايزة تتأكدي انه نرجسي؟ اتخانقي معاه ، متختلقيش النزاع ولا حاجة دوري على اي حق من حقوقك المهدورة وطالبيه بيها مثلا
تقدري تعرفي الشخص انه نرجسي في حالة اذا كان في نزاع مع اي حد في اي مكان . في الحالة السوية لما بيحصل نزاع بيكون عبارة عن نوع من المناقشات والجدال الطبيعي حوالين موضوع النزاع والناس ممكن تحكم حد في الموضوع وبعد مايخلص خلاص بيرجعوا طبيعيين مع بعض وحبايب وخلصت الحكاية ، اما في حالة النرجسي فالنزاع عبارة عن توتر وانفعالات قد تنتهي الى قطيعة ابدية ، ايه اللي بيحصل لما النرجسي يدخل في نزاع مع حد ؟
١- بتتفاجئي بغضب مفاجيء ملوش اي سبب ولا مبرر منطقي ، لمجرد البدء في الاختلاف بيحصل غضب بسرعة غير متوقعة وطبعا دة بيعكس خوف النرجسي الداخلي
٢- مش حيحاول يسمع لك ولا يفهمك لانه من جواه بيقول انتي مش مهمة وانا ميهمنيش مشاعرك ومش عايز وجع دماغ
٣- اول مايحصل نزاع بتلاقيه وجه لك الاتهامات اللي ملهاش حصر وتلاقي نفسك بتتفاجئي باتهامات قذرة ملهاش اي علاقة بموضوع النزاع او اي حاجة قديمة حصلت من عشرات السنين او اي سر او غلط قديم انتي امنتيه عليه يبدأ يقول لك انتي اصلا فيكي وفيكي و طبعا اي غلط بتلوميه عليه بيحدفه عليكي فورا
٤- طبعا بيهاجم باقصى سرعة ( الهجوم خير وسيلة للدفاع، دة مبدأه ) ويبدأ بقى يحقر فيكي ويقلل منك ومش بعيد يشتم والفاظ نابية وبعضهم طبعا ممكن يضرب كنوع من الارهاب والاستقوا عشان يشوش الدنيا علي موضوع النزاع اصلا
٥- من اهم علامات النرجسي في النزاع المحادثات الدائرية اللي احنا بنقول عليه اللف والدوران ، تلاقيه يروح فاتح موضوع تاني خالص ملوش علاقة بموضوع النزاع وغالبا بيكون اتهام او تقليب موضوع قديم حصل بينكم وانتي كنتي غلطانة فيه او مش غلطانه بس هو حيقولك انك انتي اللي كنتي غلطانة عشان تدافعي عن نفسك وتتحولي من مهاجم لمدافع ويخرج هو من موقف الدفاع .
٦- اذا حاولتي تعاتبيه زي البني ادمين الطبيعيين وبحب وهدوء وبدأتي تحطي اقتراحات لحل النزاع بياخد موقف دفاعي عنيف جدا ويرفض كلامك تماما وبيعتبر انك بتفرضي عليه وعايزة تتحكمي فيه ومبنفعش انتي تقولي له يعمل ايه
٧- طبعا اثناد المناقشات الدائرية بقلب الحقائق ويحكيها بالعكس تماما ويحطك في موقف المعتدي وهو المظلوم وطبعا دة بيحصل اكتر لو جيبتوا طرف ثالث يحكم بينكم ، يعني علامة خطيرة تعرفيه بيها في النزاعات انه كداب وبيقلب الحقيقة
٨- لما يحس انه خلاص حيخسر الجولة بيروح للصمت العقابي ولو اتعامل معاكي اثناء الصمت العقابي بيتعامل بقرف ومريسة وتحقير وازدراء
دكتور كارتر بيقول ان في حالة النزاع انتي بتكوني بتمثلي تهديد في منتهي الخطورة على النرجسي ( هو بيكون شايف كدة )لانه مقتنع من جواه انك لازم تكوني موافقاه على كل حاجة لان هو بس اللي بيفهم وان له السلطة والاحقية في كل شيء فلما انتي تعارضيه فدة معناه انك بتشككي في السلطة والاحقية وقبلهم في مستوى فهمه وادراكه وان كدة حيكون فيه حد بيفهم اكتر منه وبيعرف اكتر منه ودة كلام في منتهى الخطورة عشان حيكشف الخواء والفراغ اللي جواه

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11