علامات العلاقة السمية
فيه حلقة عن علامات الشخص السمي ، الشخص دة ممكن يكون سمي لاي حد يمر بيه سواء في علاقة معاه او مجرد عابر في حياته ، و ممكن يكون مسالم مع الناس لكن بيكون سمي في العلاقات الخاصة بس ودة بنشوفه غالبا في النرجسي الخفي والعلم بيقول ان العلاقة بتنشط سمية الشخص اللي من النوع دة (طبعا انا مش عارفة ليه ومبحثتش )
طيب ايه بقى علامات العلاقة السمية دي ؟
١- الجدال : الجدال مفتاح العلاقة السمية ، ١) اذا الجدال حصل بسبب موضوع عقيم ومفيش له حلول فدة مؤشر سيء ، ٢) واذا الجدال انتهى بخروج احد الطرفين من الغرفة بدون ماتخلص المحادثة خصوصا لو كان اللي خرج دة مش تحت ضغط فدة نوع من انواع التلاعب خصوصا لو كان الجدال بدأ يتجه في الاتجاه الصحيح ناحية الحل ،
٣) اذا الجدال استمر ساعات وايام واسابيع وشهور فدة علامة سيئة
٤)اذا حصل زعيق وصراخ بسبب ان احد الطرفين فقد السيطرة او مفتقد للمنطقية في كلامه
٥)اذا الجدال دخل في سكة انتي عملتي كذا من كام سنة يعني بدأنا نقلب في اللي فات (خصوصا اذا تم الاعتذار عنه بشكل صحي ) وبدأ احد الطرفين يوصل للتاني ان انت عمرك ما حتتحرر من الذنب اللي اذنبته في حقي او حق اي حد وبالشكل دة العلاقة تفتقر للتسامح
٦)التهديد بالترك او الطلاق اثناد الجدال … كل دي علامات بتدل على ان دي علاقة سميه
٢- المشاعر السلبية : احساس احد الطرفين انه الافضل له انه لو كان الطرف التاني يختفي من الحياة يموت او يغيب او اي حاجة المهم انه يختفي من ادامه ، ودة طبعا بيوصل للطرف التاني وبيحسه وبيكون له ردود افعال لاشعورية بتزود العلاقة سوءا ،، لما بتكون العلاقة الحميمة بدون مشاعر ولا احساس بالقرب الروحي الى جانب القرب الجسدي … لما احد الطرفين يكون عنده شعور بعدم الامان في حال مشاركة مشاعره واحساسيه مع الطرف الاخر لان المشاركة دي حتستخدم ضده لاحقا ، طبعا المشي على قشر بيض مشاعر سلبية سيئة جدا ،، لو احد الطرفين حس انه مرتاح اكتر وحر اكتر طول ما الطرف التاني مش موجود في المكان
٣- لما العلاقة يتخللها من وقت للتاني اتهامات بالخيانة بدون ادلة لاحد الطرفين او اتهامات بانه مستغل سواء جنسيا او ماديا
٤- لما يكون احد الاطراف مش متعاون ابدا ولا بيقدم اي مساعدة للتاني ، وساخر باستمرار وعلطول ينفجر غضبا ومفيش لطف ولا حنية ولا تعاطف ، وبيكون مندفع ومتوتر ومستاء معظم الوقت
٥- التواصل السيء : التواصل السيء معناه انك تتكلمي في موضوع وهو ميسمعش او لو سمع يرد بالدخول في موضوع غيره تمام ولا كأنك كنتي بتتكلمي اصلا ، او ان في وسط خناقة تنهاري وتبكي وهو يستمر في الصراخ ولا كأن حد ادامه ، ولما تحاولي تقفلي الحوار وهو يرفض ويفضل مستمر فيه ، لو انتقدتيه ينتقدك عشام يحطك في وضع المدافع ، طبعا كل اساليب التلاعب عبارة عن تواصل سيء ( الجاس لايتينج والبليم شيفتينج ، وقلب الترابيزة ….) ، التواجد في نفس الغرفة لساعات طويلة من غير ولا كلمة ولا جملة حوار وكل واحد ماسك حاجة شاغلاه ، دة تواصل سيء
٦- الخيال المفرط زي ان واحد منهم يتخيل ان التاني مات ويبدأ يحسب حساباته المادية على اساس الخيال دة
٧- التلاعب : صرف المال لايلام الشريك ،، الصمت العقابي ،،، محاولات عزلك عن الناس ، ايحاءه لكي انك متقدريش تعيشي من غيره او محدش بيحبك اده

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11