ازاي تعرفي النرجسي من واقع الحياة ومن العشرة ؟
للمرة الخامسة تقريبا بديكي علامات تتأكدي منها انه نرجسي او لا
١- حياته الخاصة غير حياته العامة خالص ، يعني هو برة بيت البيت شخصية وجوة البيت النقيض
٢- معاملته معاكي حلوة لو عايز منك حاجة (علاقة حميمة ، فلوس ، دهب ، خدمة له ، خدمة لأهله ، حيتفشخر بيكي ادام الناس في حفلة او زيارة او …… ) اما لو مش عايز منك حاجة فمش شايفك اصلا ودي بتكون احسن معاملة
٣- عمره مايعترف بغلطه يا اما يعمل اسقاط ويلبسك انتي الغلط او يعمل ازاحة لوم ويجيب لك اي غلطة قديمة يغير بيها الموضوع
٤- طول الوقت يدي نصايح محدش عايز يسمعها ويتدخل في اللي ملوش فيه وينصح ، وطبعا بيكون مقصود بيها توجيه النقد
٥- معندوش التفكير المتعمق في نفسه وصفاته وداخله لانه مش عايز يشوف ضعفه ولا يفتكره فمش بيحاول يفكر اصلا
٦-ميت الف تعليق عشان يفكرك بالتزاماتك اللي ممكن تكون اصلا مش التزاماتك انتي هي التزاماته هو او مش من حقه يتدخل فيها لكن من باب التحكم والسيطرة والموافقة لخطته الحياتية
٧- بيصنف الناس على حسب انتمائاتهم واتجاهاتهم ، اللي يتفق معاه في تفكيره وانتمائاته واتجاهاته فهو من شلته ومحبوبينه واللي يختلف معاه في اي حاجة من دول بيكون بمثابة عدو او واحد جاهل او دون المستوى وطبعا بيخرج من رحمته ، هو معندوش ثقافة الاختلاف او نتعلم من اختلافنا واختلافاتنا لا خالص
٨- عايش نص وقته في احلام اليقظة والخيال المريض بتاعه ، طول الوقت بيحلم بانجازات لاهو ادها ولا عنده امكانياتها و لا يقدر يعملها اصلا ، وفي نفس الوقت مش بيحاول ينفذها ولا يجتهد عشان يحققها
٩- هم بينجذبوا جدا للناس والنشاطات اللي تجلب القوة والسلطة والثروة ، عشان كدة تلاقيهم يسعوا بجد للسلطة والمراكز وبعضهم بيوصل لها واللي مش بيعرف يوصل بيحاول يعمل علاقات مع الناس اللي في السلطة واصحاب النفوذ والثروة ، ودايما بيسعى انه يكون الاحسن والاقوى والاشطر والافضل في كل شيء في اي مكان يتواجد فيه
١٠- ضعف المشاعر بالنسبة لهم قوة وبيشوفوا المتعاطفين ناس ضعيفة وهايفة ودايما يشوف ان اظهار التعاطف مع الناس خطأ جسيم لان الناس محتاجين تحكم وسيطرة مش تعاطف وطبعا دة بيبان اكتر في النرجسي الظاهر اما الخفي فبيخبي الكلام دة بس بيظهر في بعض المواقف زي الثورات مثلا
١١- طبعا كدابين وبيفضلو يكدبوا ويخبوا ويراوغوا لان الحياة بالنسبة لهم منافسة
١٢- دايما يستخدموا تهديدات مستترة او مش واضحة يعني يقول لك احسن لك تفكري تاني ، خدي بالك من اللي بتقوليه ، طيب جربي ….. لانهم اجبن من انهم يهددوا تهديدات صريحة يتحاسبوا عليها بعدين
١٣- في موضوع الفلوس هم في قمة المبالغة اما بخل مبالغ فيه او اسراف مبالغ فيه ، عطاء قهري وتسوق قهري او جوع وشحتفة ، وممكن بخيل جدا عليكي وكريم جدا برة و الفلوس بالنسبة في كل الحالات بتمثل القوة عشان كدة بقولك اشتغلي واللي بتشتغل متديش فلوس بدون مقابل
١٤- بيخاف من المواجهة ومبيعرف يواجه واذا واجهتيه بيرد عليكي بغضب غير مبرر
١٥- اهمال مبالغ فيه للمشاعر والاحاسيس ولالام اللي حواليه ( حالة جوزها كان بيقول لها سيبيها توجعك ونامي ، مغص كلوي)
١٦- حرامي معلومات وآراء وصفات احيانا ، يسرق افكارك وينسبها لنفسه ، يسرق طريقتك في المعاملة مع اولادك وينصحك بيها بعدين ، يحفظ كلامك ويرجع ينصحك بيه او يتمنظر بيه ع الناس على انه كلامه ، يتعلم منك ازاي يظهر التعاطف مع الناس من باب التمثيل
١٧- طول الوقت مكتئب وزعلان وميعرفش يضحك ولا يبتسم ووجوده بيجلب الكئابة والاحساس بعدم الامان والتوتر وطول ماهو معاكي انتي ماشية على قشر بيض
١٨- بيكيلو بميت الف مكيال مش مكيالين اتنين بس ، كل موقف وله مكياله وحكمه والمبدأ المناسب لمصلحته هو وكل حاجة مسموح بيها له لكن مش مسموح بيها لكي ولا لغيرك
١٩- مفيش اصلا مبادئ حقيقية في اي منحى من مناحي حياته
٢٠- طبعا مفيش احترام لاي حدود

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11