نوع نرجسية زوجك : النرجسي الخبيث
الناس اللي دايما تسأل اعرف ازاي اذا كان زوجي نرجسي خبيث ، حقولك ثمن علامات بتميز النرجسي الخبيث ، ترجمة فيديو لدكتور تود جريند
١- اول علامة في النرجسي الخبيث انه بيكون حاد الذكاء واكيد انتي حتحسي دة فيه بيكون لماح جدا بيفهم بسرعة جدا متفوق في دراسته ، وبيتقدم فيها بسرعة
٢- طبعا ذكاءه بيساعده على انه يتفوق في التعليم وممكن جدا يوصل للدكتوراه والزمالة والكلام الكبير دة وطبعا بيكون متفوق جدا في عمله وبيكون في مراكز مرموقة في الدولة واحيانا مراكز سلطوية بتزود قوته، او صاحب بزنس عظيم
٣- غالبا بيكونوا اثرياء وطبعا الثروة بتساعدهم يهربوا بالمصايب اللي بيعملوها لانهم بيقدروا يشتروا السلطة واللي فيها بالثروة دي ، ويستغلوها في اصطياد ضحاياهم طبعا
٤- بيكون خليط بين النرجسي الظاهر والخفي وبيكون الظاهر اكتر ، يعني ايه الكلام دة ؟ النرجسي الظاهر بيكون باين للناس شراسته وقوته وحزمه وفي نفس الوقت ممكن يكون مكروه بين الناس وياخدوا حذرهم منه اما لو اتقمص شوية من النرجسي الخفي اللي هو حنين وضعيف ومتواضع وبيحب الخير للناس وكمان بيتكسف ، فيعمل توازن بين القوة والضعف ويبان كنموذج للرجل كما ينبغي ان يكون شديد في المواقف اللي تستدعي الشدة وحنين لما الموقف يستدعي حنية زي مااحيانا نقول فلان دة يبان مرعب بس لما تقرب منه تلاقيه طيب وحنون ، اهي دي الصورة اللي بيصنعها النرجسي الخبيث لنفسه عن طريق الخلط بين الظاهر والخفي
٥- تلاقيه بيكون مهتم جدا بالقرود الطائرة وبيظهر معاهم التعاطف بشكل يبدوا كأنه فعلا حنون ومتعاطف وممكن يوصل للبكاء من كتر ماهم بيصعبوا عليه ، وطبعا دة عشان لما يحتاج حد يدافع عنه او يقنع ضحيته انه طيب لازم يكون مقتنع انه طيب عشان يؤثر في الناس ، وكمان هو من علاماته انه لما بيؤذي بيكون عارف انه بيؤذي وقاصد ولما تعاتبيه يقول لك والله مكنتش اعرف ان الحكاية دي حتزعلك لو كنت عارف مكنتش عملتها .
٦- كمان بتلاقيه بيكيل بمكيالين الاعلى منه بيعظم له وبيعامله بلطف وادب ومثالية ويسمع له ويبص له وهو بيتكلم حتى لو اعلى منه في قوة الشخصية بس ، اما الاقل منه والضعيف بيعامله اسوأ معاملة خصوصا لو مش ادام الناس .
٧- بيستخدم اقصى درجات سلطته في اي حاجة ومع اي حد مهما كان ضعيف ومش محتاج منه كل السلطة دي ، وبمجرد ما يوصل للسلطة او الثروة بتلاقيه بيتحول للاسوأ وبتزيد نرجسيته .
٨- النرجسي الخبيث انتقامي يعني مبيفوتش حقه ولازم ينتقم من اي حد عمل فيه حاجة عمره مايتسامح ابدا ، وعادة بيعمل جو ارهابي سواء في الشغل عشان اي حد يخاف يشتكيه لا ينتقم منه ، او في البيت فضحيته متقدرش تعارضه او تخالفه ولا تفكر حتى .

دكتور تود بيكرر كلام دكتور راماني ان النرجسية اصبحت وباء في العالم كله وبيقول انها اصبحت خطر لازم فعلا نحاربه وبيقول من اهم مخاطرها انها مش بتتعالج وان النرجسي غالبا بيكون مقتنع بنفسه وعاجبه نفسه بالشكل دة لانه معندوش وعي ديني ولا اخلاقي وعنده استعداد يعمل اي حاجة عشان يحقق اهدافه
بيقول كمان ان النرجسية ممكن لو استمرت تنموا بالشكل اللي حاصل دة ممكن تؤثر على اقتصاد بعض الشركات لان وجود النرجسيين في السلطة بيطفش العمالة الجيدة وبيهربوا ويروحوا اماكن عمل هادية ومستقرة ، وبيقول كمان من مخاطر النرجسية انها الاعيب خفية منقدرش نقننها ولانعاقب اللي بيعملها

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11