ازاي النرجسي بيتصرف لما يفشل في الحصول على الوقود النرجسي ؟ وحيعمل ايه لو انتي منعتيه عنه ؟؟
حيتصرف بالظبط بالظبط زي مدمن المخدرات لما نمنع عنه جرعة المخدر . شفتي المدمن لما يسحبوا المخدر من جسمه بيحصل له ايه ؟ هو دة اللي بيحصل للنرجسي لو انتي سحبتي منه الوقود النرجسي ، بس افهمي حاجة مهمة مش معني انك تسحبيه او توقفيه انك تعامليه المعاملة الرمادية البسيطة لا الحكاية مش سهلة يعني محتاجة مجهود منك عشان تكوني باستمرار اعصابك هادية ومحتاجة تكوني قوية جدا عشان متخافيش من ردود افعاله ولازم تكوني مستقلة عنه ماديا عشان ميهددكيش ويخنقك لان دة بيديه وقود ، لازم تكوني واثقة من نفسك وواثقة انك علي حق عشان ميهزكيش ويقول لك ربنا حيعاقبك فتخافي وتتراجعي عن حقك ومجرد التراجع دة بالنسبة له ضعف منك وخوف فبرضه وقود ، يعني عايزة اقول لك ان منع الوقود دة موضوع كبير ولازم تكوني خلصتي مرحلة التشافي والتعافي ودخلتي لنفسك قرش تسندي عليه يعني تكوني مستغنية عنه تماما ، في الحالة دي بس حتقدري تمنعي الوقود عنه تماما وتوصليه لمرحلة سحب المخدر دي وانتي اصلا ساعتها مش حتحتاجي توصليه لكدة لانك حتحسي انك اقوى منه وانك تقدري تسيطري عليه بانك تلاعبيه بالوقود زي ماعو كان بيلاعبك بالمشاعر او بالعلاقة الحميمة او بالمصاريف ، طبعا الكلام هنا للناس اللي عايزة تستمر في الزواج ومضطرة عشان اولادها او عشان اي ظروف عندها اما اللي عايزة تسيبه فتوصله عادي لعله يهرب هو ،
طيب هو النرجسي ازاي بيوصل لكدة وايه اللي بيحصل لما بيقل الوقود او بيخلص خالص ؟ هو بيدخل في دورة اكتئاب بتكون اعراضها : بطء الحركة واضطراب النوم ( اما ينام كتييير او مينامش خالص) ، اضطراب الاكل ( برضه ياكل كتير او مياكلش خالص ) وبيكون حزين وفاقد الاحساس بلذة اي شيء ممتع في الحياة ، وبيتعرض لتقلبات مزاجية عنيفة ، وغضب شديد مع عدم تحكم في النفس اثناء الغضب دة . واذا الموضوع طول يعني قعد فترة طويلة من غير الوقود بيحاول يلجأ لإدمان موازي زي المخدرات او الكحوليات او الافلام الاباحية او الجنس او قيادة خطرة تهور يعني اثناء القيادة ، او ادمان التسوق يوصل للتسوق القهري ، وكل دة طبعا هروب من عدم وجود وقود ، وكل دة بيكون له مقدمات انتي بتحسيها بتلاقيه ساكت معظم الوقت ووشه مفهوش اي تعبيرات كأنك عايشة مع تمثال او روبوت ، منفصل تمام عن العالم ومتنح ومذهول بدون اي سبب ، بيكرر كلامه ومش بيركز وتايه وسرحان طول الوقت في احلام اليقظة اللي بيقدر يعيش فيها مع الوقود الوهمي ،
وطبعا بما انك انتي والعالم كله مقدرتوش تفهموا وتقدروا عظمته وتفرده وووو فانتم متستاهلوش التواجد معاه فانتي بيعمل لك صمت عقابي والعالم هو بينسحب منه عشان يعاقبه ، وبيتقوقع داخل نفسه ويبدأ يدي لنفسه الوقود النرجسي بنفسه ويبدأ يتعامل مع العالم الخارجي عن طريق الرسايل والتليفونات اذا اضطر ويفضل كدة فترة بعدها بيحاول يسعى للحصول علي وقود باي شكل فيبدأ بتخويفك وممكن يلجأ للعنف اذا هو متعود علي كدة وبتلاقيه مكشر وفظ وبيجز على سنانه طول الوقت وتحسي ان فيه حاجة حتحصل او انه حينفجر في اي لحظة ودة بيكون تصرف مقصود لانه شايف ان مكنة الوقود اللي هي انتي عطلت ومحتاجة تتصلح فيحاول يصلحها طبعا زي مانتي عارفة حياخد منك وقود سلبي .

طيب ايه بقى احساسه الداخلي في الوقت دة ؟؟ جلد للذات بلارحمة تفتكري ليه؟ لااا اوعي تفكري انه زعلان ولا ندمان عشان كسر لك سنة ولا ايد ولا عشان رعبك وخلاكي ترتعشي وتبكي وتنهاري لا لا خالص هو بيجلد ذاته عشان حس انه مدمن الوقود وانه اعتمادي وانه محتاج لك وانه مجبر على التعامل معاكي عشان الوقود وبالتالي انتي مفروضة عليه ودة اسوأ حاجة ممكن تحصل له زي ماقلنا ،
في الحالات القصوى من الحرمان من الوقود زي السجن مثلا او المرض او اي سبب قهري ، النرجسي بيوصل للفصام او البارانويا ( جنون العظمة) واحيانا افكار انتحارية ،

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest
الكتب :
narcissistic supply
narcissistic drug