تعملي ايه عشان تخرجي من الإحساس بالضياع او تخرجي من الشعور بالحزن بعد الطلاق من النرجسي.

انا زوجي نرجسي عملي صمت عقابي بقالنا تقريبا ٦ شهور و انا واخده قرار ان اي وقت يحب يرجع فيه مش هرجع احنا كده الحياه بينا منتهيه و اهلي معايا في القرار ده بس هما مش عايزني ابدا و اطلب الطلاق لان متوقعين منه مشاكل كتيره
مشكلتي دلوقتي ان كل ما اقول انا اتعافيت ووقفت علي رجلي و مبقتش بفكر فيه باجي عند اي حاجه يعملها و انوجع قوي سواء خيانه تلقيح اي حاجه
و كمان دلوقتي لما بشوف او بسمع اي مشكله بحس بوجع رهيب كاني انا الضحيه و بدخل في اكتئاب و عياط
انا حاسه اني ضغط علي نفسي علشان اعدي اللي انا فيه و اتناسي لكن من جوايا في شرخ و الم رهيب
و مليون سؤال ومش قادره اطلع من الحاله د و لا حتي اتكلم مع حد و لا حتي اهلي علشان ميقلقوش عليا و باينه قويه قدام كل الناس بس تعبانه جدا و مش عارفه اللي انا فيه ده حله ايه و لا هيخلص امتى
شوفوا انا حاولت اقلل الكلام او اختصره لكن لقيت ان أقوله زي ماهو لاني عارفة ان كل واحدة فيكم حتلاقي نفسها على الأقل في جملة منه
خليني ارد على جملة جملة وبالراحة كدة . هو عمل صمت عقابي ست شهور دة مش اسمه صمت عقابي دة اسمه تخلي ورمي وشرعا من حقك تطلبي الطلاق بعد اربع شهور من الهجر ، هو فعلا أحيانا الصمت العقابي بيوصل لسنة لكن في الحالة دي بيكون أصلا النرجسي عنده مصدر وقود غيرك ومستغني عنك وعن خدماتك في الوقت دة لان هو مايقدرش يعيش من غير مصدر وقود فترة طويلة كدة ، أيا كان الوضع فهو رماكي (انا اسفة) وخلاص مش عايزك حاليا ، بس هو مش مش عايزك خالص لا هو راكنك ع الرف عشان هو مش ضامن المصدر الجديد ،بس اول ما حيتمكن من الصيدة الجديدة حيطلقك او حيخليكي كدة لحد ما تخلعيه عشان طبعا ميدفعش أي حاجة لكي ، انا ليه بقول لك الكلام السخيف دة هو انتي ناقصة تبكيت ؟ انا بقوله عشان تفهمي هو جواه ايه وبيعمل ايه فتفوقي وتشيلي من دماغك ان هو زوج من أساسه هو انسان ندل متخلي عنك وعن أولاده
انا مش بقول لك كدة عشان تقومي ترفعي عليه طلاق ولا تخلعيه لا طبعا انا بقول لك كدة عشان انتي تفكري هل دة انسان مفروض يفرق معاكي اذا بيخونك او لا ، هل يفرق معاكي رأيه فيكي ، هل لو وقف يهوهو سنة في الشارع تحت بيتك مفروض تتأثري أصلا ؟ هل دة شخص ينفع تتأثري بتصرفاته او تتوجعي منه؟ ماهو اذا انتي لسة بتتوجعي يعني انتي لسة ماتعافتيش تماما لسة محتاجة تشتغلي اكتر على نفسك
موضوع انك بتتأثري بأي حالة شبهك وبتدخلي في اكتئاب وعياط دة طبيعي جدا في الأول وبعد كدة بتتحسني والوضع دة بيتغير
حقول لك على طريقة تبدأي تعالجي نفسك بيها لحد ماتروحي لطبيب واللي متقدرش تروح لطبيب تجربها
هاتي كشكولك الخاص جدا ومحدش يوصل له وابدأي اكتبي المواقف العصيبة اللي مريتي بيها مع النرجسي احكي موقف موقف وبعد ماتكتبيه فكري فيه وفي الكلام اللي اتقال فيه وجاوبي ع الأسئلة اللي حقولها لك
١- هل اللي قاله النرجسي عنك كان حقيقي؟
٢- هل لو أي حد بيحب حد ممكن يقول له الكلام دة
٣- لو انتي مكان النرجسي كنتي حتتصرفي زيه ؟ اكتبي كنتي حتتصرفي ازاي
٤- الموقف دة اثر في نفسيتك ازاي
٥- ازاي تفاعلتي مع الموقف ؟
٦- لو الموقف دة اتكرر تاني دلوقتي هل حتتفاعلي فيه زي ما تفاعلتي وقتها
٧- بعد الموقف دة عايزة تقولي ايه للنرجسي اكتبي كل حاجة جواكي نفسك تقوليها له ، حييجي يوم وتقولي له اللي نفسك فيه او تلاقي نفسك مستخسرة فيه الوقت والمجهود
كرري كل الأسئلة دي في كل المواقف ويستحسن تختاري أسوأ عشر مواقف بس لانك مش حيكفيكي سنين تانية عشان تكتبي كل المواقف
بعد ماتخلصي كل المواقف اكتبي رسالة للنرجسي عبري فيها عن كل اللي جواكي وطبعا مش حتديها له انتي حتكتبيها على أساس في يوم من الأيام تديها له مش دلوقتي خالص
التمرين دة حيتعبك جدا وانتيب تكتبيه وحتبكي بكاء مرير لكن بعد ماتخلصيه الوضع حيتغير كتير
حكاية انك بتحاولي تباني قوية عشان اهلك مايقلقوش عليكي دة معناه انك ماتعلمتيش الدرس من النرجسي ، اهلك لازم يقلقوا عليكي لانهم لو مقلقوش مش حيعرفوا يساعدوكي ، انتي خارجة من تجربة شبه اللي مات له حد عزيز جدا مينفعش يخبي دموعه والا حيمرض جسديا ونفسيا و كمان اهلك لو شايفينك قوية مش حيشيلوا عنك بالعكس ممكن يشيلوكي حتى لو مش نرجسيين طالما انتي قادرة شيلي دة مبدأ كل البشر عدا المتعاطفة مبدأها طالما انا قادرة فانا اللي حشيل مش عايزة حد يقلق عليا مش عايزة حد يتألم عشاني ودة مبدأ منافي للفطرة غلط لازم اهلك يحسوا بيكي عشان يساندوكي لان انتي في مرحلة محتاجة للمساندة اكتر حاجة
مينفعش تكبتي مشاعرك وتسكتي لان انتي كدة بتخزني احداث مش محلولة وملفات مش مقفولة في مخك وهو دة اللي بيسبب الامراض النفسية ، الاحداث والمواقف المعلقة دي وانكارها أصلا بعد كدة بيؤدي لانك تنكري المشكلة من أساسه وتبدأي تنفصلي عن نفسك وتكوني شخصية جديدة سواء هزلية او مهملة او مكتئبة او ضعيفة او أي حاجة غير نفسك وتبقي استسلمتي زي النرجسي ما استسلم ، بس انتي عندك وعي وادراك وعلم وفهم انتي مش زيه فمتستسلميش زيه