السلام عليكم انامطلقه من النرجسي من 6 شهور وهو زميلي بالعمل وتم تشويه السمعه بنجاااح ساحق لان زواجنا كان سرى فى محيط العائلتين والاصدقاء المقربين فقط والان كثير من زملائنا يرونى انى انسانة سهله المنال بسبب احاديثه عنى ... والان انا مطمع لمعظم زمايلي اعانى من النظرات ومن التلميحات القذرة والعروض المشوهه للزواج بى .. قدمت استقالتى لكن تم رفضها وبسعى لطرح الاستقاله مره اخرى ... محاصره فى العمل ومحسوب عليه النفس الضخكة والحركة حتى لما باخد اجازة يبقى علقت واحد فى السر تعبااانه اوووى تراودنى فكرة الانتحار لكنى مؤمنه بالله ولا اريد ان اخسر اخرتى ..

الحلقة دي كنت عايزة اعملها من فترة وكنت مترددة لكن سبحان الله كل شيء بأوان
طبعا الحالة دي اللي فيها مكفيها والكلام مش لها خالص لكن الكلام للي لسة معملتش زيها ، هي ممكن اعمل لها حلقة لوحدها
انا هنا عايزة أتكلم عن اللي بتطلق ومعاها أولاد وعايزة تتجوز تاني ، حلو لحد هنا حلو جدا وانا اول المهنئين واسعد لها جدا ، لكن لما نحب نتجوز نتجوز صح يعني ايه ؟ يعني عندي حالات كتير جدا بعد ماخرجت من تجربة قاسية مع النرجسي وبتفكر تتجوز بتخاف النرجسي ياخد منها الأولاد وبالتالي بتتجوز في السر في نطاق الاسرة والأصدقاء وبعضهم في السر اكتر ومتعرفش الأولاد عشان متجرحهمش والبعض الاخر تقول لا انا حتجوز في السر عشان ممكن يطلع نرجسي وابقى ظلمت نفسي وتتحسب علي جوازة فتخلي الجواز عرفي عشان تعرف تسيبه بسهولة وبدون خساير ، وأهلها وأهله يكونوا عارفين وبس عشان الخبر مايوصلش للأولاد ،
طيب خلينا نشوف كدة من منظور الاسرة هو دة جواز ولا علاقة حميمة؟ انا اسفة انا عارفة ان الكلام حيجرح ناس كتير وناس بحبهم جدا وبخاف عليهم لكن لازم نفوق ونشوف احنا بنعمل ايه في نفسنا . طيب هو دة لو علاقة حميمة مش اسرة ودفء وحب وتماسك يبقى ازاي بنعتبره زواج ؟ وبعدين انا مش حتكلم عن التشتت اللي بتكوني فيه والتوتر والتصرفات اللي بتعمليها كأنك بتسرقي وخايفة اولادك يحسوا وانتي نازلة تقابليه او وانتي رايحة له شقتة الزوجية اللي هي مافيهاش ريحة الزوجية أصلا ، احساسك في المرحلة دي هل فيه شيء من الإحساس بالأمان والدفء ولا هي نزوة وتعدي ؟ طيب انتي مش بتحسي انك عايشة تكدبي على اولادك ؟ ولحد امتى حتعيشي كدة ؟ ولا انتي عاملة حسابك انها فترة وحتسيبيه وعلى غرار زواج المتعة كدة ؟ وهل زواج المتعة دة حلال أصلا ؟
طيب سيبك من كل دة تفتكري الراجل اللي حيوافقك على الزواج بالطريقة دي حيكون راجل؟ حيقبل الزواج بدون مسئولية وبدون زواج هو مقابلات ولعب وخروج وشوية ونروح ؟ فين الانس والدفا والاحساس بالأمان انك نايمة ملء جفونك في حراسة زوج انقرض انا اعارفة ، وطالما الزوج دة انقرض يبقى اللي حيقبل بالجواز بالطريقة دي مش عايز زوجة وروح وحب دا عايز جسد وبس ، وطبعا البيه حيكون متزوج او مطلق هو كمان ، طيب البيه المطلق دة لما هو مطلق يعني معندوش أي مشكلة انه يعلن زواجه ليه يقبل انه يبقى في السر وليه يقبل انه يتزوج عرفي ، انتي كل دة مش بتفكري فيه ازاي ولا فاكرة انه من كتر مابيحبك مش قادر يقول لا ، لو هو قال لك كدة يبقى هو كداب لان اللي بيحب حد بيحافظ عليه وبيضمن له حقوقه ، الراجل اللي بيتجوز عرفي وفي السر وبورقة بيكون ضامن انك ملكيش عنده أي حق وعشان كدة بيقبل او بيطلب الجواز العرفي ، وطبعا بيستغل انك مطلقة وانك محرومة وان لكي ظروفك واولادك واو ا وا ، لكن هل هو يقبل ان اخته تتجوز عرفي او بنته ولا ساعتها حيقيم الدنيا ويخربها ؟
فكري قبل ماتاخدي خطوة تندمي عليها طول عمرك
الحالة اللي منزلة البوست دة اذت نفسها اد ايه بالزواج في السر بالرغم من معرفة أهلها وأهله ، استفادت ايه طيب وازاي بقى وضعها دلوقتي في شغلها ودي اقل الخساير اللي ممكن تحصل لها لان لو فيه أولاد بيتعرضوا للتنمر وللصدمة فيها هي كمصدر وحيد للامان بعد ما ابوهم اتخلى عنهم واو ا وا
المشكلة العظيمة ان اللي بتخرج من علاقة نرجسية بتكون عرضة لعلاقة نرجسية اكتر من الأول وخصوصا اللي بتتسرع ومش بتدي نفسها فرصة كافية للتعافي والرجوع للسوية ، هي بتكون مكسورة وضعيفة وجعانة حب وجعانة امان واستقرار ودي طبعا بتكون صيد سمين للنرجسي التعلب اللي قاعد يدور على مصدر جديد للوقود واحيانا للفلوس كمان . في النهاية يا حبيبتي لايصح الا الصحيح ، انا ماتكلمتش عن حكم الشرع ولا رأي الدين في النوع دة من الجواز لانه دة مش تخصصي لكن دوروا علي شيخ بيتقي الله صح وافهموا منه أنواع الزواج وايه اللي حلال وايه اللي حرام وايه شروط الزواج والغرض منها عشان تعرفي انتي ماشية صح ولا ....
اللي اقدر أقوله لكي انك بتؤذي نفسك وبتؤذي اولادك واتحدى أي حد ان اللي يوافق ع الزواج بالطريقة دي يكون انسان محترم وبيتقي الله وبيريح زوجته وبيستمروا ازواج لاخر العمر ، أصلا ازاي حيستمروا ازواج لاخر العمر في وضع غير مستقر وضع مش طبيعي مش واخد الوضع الطبيعي للزواج ، مستحيل مستحيل الراجل اللي يوافق على الزواج بالطريقة دي يكون انسان محترم ولا يكون بيحبك فعلا لانه مش حيقبل الكلام دة على بنته ولا اخته ويقبله عليكي فهو انسان مش محترم مش حيصونك ومش هو دة الراجل اللي نفسك انه يعوضك عن حياتك اللي ضاعت مع النرجسي ، مش حقول انه غالبا بيكون نرجسي لكن حتى لو مش نرجسي فهو اناني ومش بيحبك ولا بيقدرك لانه عارف انه بيؤذيكي وبيهدر حقوقك او بياكلها وعادي جدا وراضي ولا ضمير ولا رادع . فكري كويس قبل ماتاخدي خطوة تندمي عليها