زي ماخرجتي بدماغك ترجعي لوحدك مش حاجي اخدك
هو ينفع لما النرجسي يضربك او يطردك من بيتك ترجعي من غير ماييجي ياخدك
سؤال من جروبنا ادرس عدوك النرجسي
٥ سنين ونص ف عذاب مع نرجسى رغم انى دارسة علم نفس بس مكتشفتوش غير من شهرين طول منا عايشة معاه وانا حاسة انه مش طبيعى
ومع اخر مشكلتين ضرب وطردنى من البيت سابنى ٢٥ يوم وجه يشتكى بالكذب ورفض ياخدنى وقال اخوها يجيبها ولان اهلى محترمين وعيلة كبيرة معندناش طلاق
اخر مشكلة من اسبوع من وقت معرفت حقيقته وانا كل مشاعرى تجاهه كره وتجاهلته وتجنبت مشاكله لكن هو كان بيحاول يستفزنى باستمرار ومستقوى بمامته إللى بتسخنه عليا جر معايا واتهمنى ان سبب تغيرى ان بكلم حد والكلام امتد للضرب وغلط ف اهلى ودى اول مرة يغلط فيهم اخدت اولادى ورجعت بيت اهلى وبابا كلم خاله وادى اول مرة ندخل حد هو راح وسمع منهم وجه انهاردة لكن رفض يسمعنى وعايز يلملم الموضوع وارجع وكل دا ذلات لسان وتعهد انه ينزل عليه ويعقله
سؤالى هل أرجع؟ انا قولتله نفسيتى تعبانة وسبونى شوية قالى ع الخميس وع اساس ان اخويا اللى يرجعنى وانا هتجن من وقتها ورافضة ان أرجع بالوضع دا ياهو يجى يا خاله اللى يجى
ثانيا انا كرهته جدا ومش عارفة هتعامل معاه تانى ازاى ...رجوعى ع الولاد ونكون استنفذنا معاه كل المحاولات .رايكو ايه افيدونى بالله

شوفي حبيبة قلبي مبدأيا كدة الضرب لايمكن التعايش معاه حتكون نتيجته تشويه نفسي وجسدي لكي وتشويه نفسي لاولادك اللي انتي اصلا عايزة ترجعي عشانهم ،فإذا مش حتقدري تسيبيه لاسباب قهرية فعلا وتقدري تحتجي بيها ادام ربنا ساعة السؤال او انك عايزة مثلا تستمري معاه فترة لحد ماتشتغلي وتقفي على رجلك عشان تقدري تصرفي على اولادك وبعدين تسيبيه ، بس في نفس الوقت تكوني قادرة تمنعيه من انه يضربك بأي طريقة من الطرق اللي قلناها في الفيديوهات سواء انك تعملي له محضر او انك فعلا لو رجعتي ترجعي بشروط وتعهد مكتوب ، او انك تحسسيه ان مفيش امل ترجعي له وتذليه لحد ماترجعي عشان يبقى فاهم ان الضرب دة مش حيمشي معاكي تاني ، يبقى نتكلم في النقطة التانية واللي هي طريقة رجوعك ، مفيش حاجة اسمها اخوكي يرجعك انتي غضبتي لانه خاض في عرضك اولا وضربك ثانيا وشتمك وشتم اهلك ثالثا ، الطبيعي انك ماترجعيش اصلا لكن اذا حترجعي يبقى لازم هو اللي ينكسر وييجي ياخدك لكن لو حتموتي من الجوع انتي واولادك ،ولو عيلتك كلها حتقاطعك عشان مش عاجبهم الطلاق برضه ماترجعيش الا لو جه ياخدك ، لازم تبدأي تحطي حدود صحية لنفسك وخدي بالك عمر ما كان مصلحة الاولاد في البقاء مع اب نرجسي عنيف ، بكرة حيضربهم زي مابيضربك واللي جاي فعلا اسوأ اذا مقدرتيش تسيطري على موضوع الضرب دة ومش الضرب وبس السب والخوض في عرضك واتهامك بانك بتعرفي حد دة كمان لازم يترد عليه ولا تسمحي بيه ابدا ورده طالما انت شايف اني واحدة شمال سايبني ليه على ذمتك طلقني ، ولو طلع راجل وطلقك يبقى انتي الكسبانة
هو ليه مش عايز ييجي ياخدك بنفسه ؟
أولا زي ما قالت احدى عضوات الجروب انه خايف من المواجهة مع اهلك وخايف يبهدلوه ولو ان دي ممكن تتحل بانه يقول لك حاجي بس محدش يفتح الموضوع وحاخدك ونمشي او زي ما قلتي يبعت خاله او ابوه لو عنده اب
ثانيا ودة الأهم انه بعدين حييجي يعايرك لو عمل أي حاجة وحاسبتيه عليها ويقول لك انتي اللي رجعتي وانا مش عايزك وانتي ايه اللي رجعك ،
ثالثا عشان يكسرك ويحسسك انك ملكيش أي أهمية عنده ودة حيخليكي توصلي للشك فعلا في قيمتك واهميتك وبعدين شوية وتقتنعي من جواكي انك ماتستحقيش الاحترام ولا الحب وان هو الوحيد اللي حيقدر يتعايش معاكي عشان انتي مش كويسة وانتي ملكيش قيمة وبالتالي تفضلي ماسكة فيه ويعرف يسيطر عليكي كويس جدا
طيب انتي ليه تساعديه على كسرك والسيطرة عليكي
ايه اللي يرغمك على كدة ايه اللي يذلك وربنا خلقك كريمة معززة ليه ربنا يعزنا واحنا نذل نفسنا ، ونقول العيال والمصاريف والله والله النرجسي مابيرزق حد وطول ما الزوجة بتقول مش حسيبه عشان المصاريف طول ماربنا حيخليها في الذل دة لانها شايفة الرزق بيد النرجسي مش بيد الله ، دة بالنسبة للي تقدر تشتغل وأولادها في المدارس او عندها حد يقدر يراعي أولادها لو نزلت شغل يعني مش بنعمم لان فيه حالات فعلا متقدرش تشتغل ودي ربنا يعينها مفروض ماتبطلش تدعي ربنا يحررها من الذل دة

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة
https://youtu.be/2eSt2ySBVBM