النرجسي شايفك ازاي وشايف ضرتك ازاي او بديلك
شوفي احنا اتفقنا قبل كدة ان النرجسي اما معندوش مشاعر ابدا او انه مجمد مشاعره ومش عايز يستخدمها ، المهم كدة احنا متفقين انه مش بيحب ابدا ودي مفروغ منها
طيب سيبك من موضوع الحب دة بقى وتعالي نشوف حكمه ع الأمور شكله ازاي ؟ النرجسي تفكيره سطحي معندوش عمق في أفكاره ولا غوص في أعماق نفسه واحنا قلنا الكلام دة قبل كدة كتير ليه معندوش دة ؟ لان هو بيخاف يبص جواه ويشوف الظلام اللي تراكم جوة بسبب تجاربه في الحياة وبسبب كمية الرفض اللي قابله في حياته سواء من والديه ان كان اتربى بعنف وقسوة او من اقرانه ومن مجتمعه اذا كان اتربى ع الدلع الماسخ ، المهم ان جواه سواد هو أصلا بيخاف يبص فيه وبالتالي عمره مابيغوص في أعماق نفسه ابدا انه طول الوقت بيحاول يداري نفسه دي اللي مش عاجباه فكل تفكيره ومجهوده منحصر في ايه في ازاي يداري نفسه دي ، طيب ازاي واحد بالشكل دة حيشوف اللي حواليه ؟ هو مش شايفهم أصلا هو شايف أي شيء واي حد عبارة عن حاجة حيستخدمها كدرع حماية كستارة يخبي نفسه فيها وأول حد بيكون بالنسبة الساتر دة هو زوجته عشان كدة اول ماينكشف لها او هي تكشفه للناس بينتهي امرها معاه تماما . طيب لما بتنتهي هي او يقرر ينتقم منها وبيروح لواحدة تانية ،التانية دي بتكون ايه هي كمان هي الستارة الجديدة اللي منتظر منها انها تخبيه برضه او بمعنى اصح تخبي نفسه السودا وفي نفس الوقت يستخدمها بقى في حاجات كتير ، انه يهدي نفسه ويحس انه مش مرفوض لانك انتي رافضاه فهي ترتب له مشاعره وتعوضه عن رفضك له ، وكمان ينتقم بيها منك وفي نفس الوقت حياخد منها الوقود اللي انتي منعتيه عنه والعلاقة الحميمة والخدمة كمان ، يعني هي بالنسبة له حاجة برضه بيستخدمها ولو لزم الامر حيرميها زي مارماكي وحيدور على غيرها قطعا .
طيب امال ليه بيدافع عنها وممكن تكون متزوجة وبتخون زوجها معاه ، وممكن تكون واحدة شمال وماشية معاه هو واصحابه ومع ذلك يفضلها عليكي انتي العفيفة الشريفة اللي راعيتيه ورعيتي بيته وأولاده ومش بعيد خدمتي امه وأهله وكنتي خير رفيقة ، ايه دة ازاي كدة ، ازاي بعد كل دة بيكون شايف ان الخاينة دي احسن منك؟؟؟؟
تصدقي بقى لو انتي لسة بتفكري كدة بعد كل اللي قلته دة يبقى حرام عليكي ، وتبقي لا تعافيتي ولا فهمتي أصلا يعني ايه نرجسي ولا يعني ايه اضطراب شخصية وانا أقوم اقفل القناة واستعوض ربنا في تعبي بقى
يعني معقولة انتي عارفة انه كداب كدب مرضي ومصدقة دة وبعدين تصدقيه لما يدافع عنها وتصدقي انه مقتنع انها احسن منك ؟ طيب تقدري تقولي لي هو ازاي شايف نفسه احسن منك؟ هل هو فعلا مقتنع انه احسن منك ؟ عارفة لو هو مقتنع انه احسن منك كان بقى انسان سوي وكان حيرحمك ويقول معلش العفو عند المقدرة ، معلش عقلها صغير ، معلش الست بتحتاج حنية ، معلش الست بتفكر بقلبها وكان بقى معاكي مختلف جدا جدا دة لو انتي يعني كنتي تاعبها في عيشته ، طيب امال ايه اللي بيحصل بقى
اللي بيحصل انه عارف انك احسن منه ومن أي واحدة مش تمام ممكن تعرفه وتمشي معاه وهو متجوز وهي عارفة انها حتخرب بيته وعادي مستمرة حتى لوكانت مش متزوجة ، وعارف انك وقفتي جنبه وانه مش حيلاقي زيك ابدا ، لكن المعرفة دي هي وجعه وهي مشكلته معاكي وهي دي اللي بتخليه يحقر ويسيء الادب وممكن يشتم ويضرب وبتخليه يعمل صمت عقابي كل اللي بيعمله معاكي لانه اكيد مش مبسوط انه مش عارف يكون زيك مش عارف يكون عنده سلام داخلي زيك ، مش عارف ميبقاش جبان ومش عارف يكون عنده اتصال بربنا زيك ، ومش عارف يكون عنده يقين بربنا زيك ، وطول ماهو شايف مميزاتك طول ماهو بيتعذب ويتغاظ اكتر ويقرفك اكتر ، اما الخاينة والشمال فهو شايفهم انعكاس حقيقي لنفسه ومتأكد انهم شبهه وهم دول اللي حيفهموه ويحققوا له كل طلباته بدون اعتراض ولا قيم ولا دين ولا أي مقاومة هم دول اللي الحياة معاهم حتكون سهلة وسلسة وجميلة وكلها معاصي وشرب ومخدرات وزنا وكل حاجة عايز يعملها حيعملها من غير ماحد يقرفه ويقول له لا ولا حرام ولا يفكره باخرته السودا
هو لما بيدافع عنها بيدافع عن نفسه فيها مش بيدافع عنها لانه زي ماقلت لك مجرد اداه في ايده فهو بيدافع عن صفاته وتصرفاته اللي هي بتعملها زيه بالظبط


جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة
https://youtu.be/fjcHyiJzwx8