لكل زوجة نرجسي : تعملي ايه لما تفتقدي حب الزوج
سؤال من جروب ادرس عدوك النرجسي وكمان اختنا ريحان الجنة من اليوتيوب سألت نفس السؤآل بس قالت تعبير جميل عجبني ازاي اعصفور ينام جنب الحداءة والشمس ببهجتها ونورها ودفئها تعيش مع خفاش بيحب الليل بظلمته وكآبته
ممكن رأيك يا دكتور...
أعمل ايه في الفترة اللي بتيجي عليا بحس اني منهارة من جوايا ونفسي ان حد يسمعني ويحس بيا، ان تكون حياتي الزوجية طبيعية واحس فيها بشريك يبادلني الشعور بالامان والحب واحس بطبعيتي واحتياجي الفطري كأنثى اني محتاجة ده ،،،!!
حضرتك قولتي ف التعافي اننا نحضن اولادنا او نربي اي حيوان اليف وبعمل كده فعلا بس مش عارفة اقدر اوصف لحضرتك اننا منعنا نفسنا قبل الزواج من معاصي كتير علشان ربنا يكتبهالنا مع أزواجنا وللأسف حضرتك قولتيها صراحة "هتأخدي كل حاجة...إلا الحب"!!

شوفي حبيبتي الحب كمشاعر حب تاخديها من اللي حواليكي من اولادك ومن امك اذا كانتي مش نرجسية من اختك من صديقتك ، من سيدنا النبي ، حبي سيدنا النبي وقربي منه حييجي لك في الرؤية وحياخدك في حضنه ويطبطب عليكي وساعتها حتحسي انك مسنودة ولكي اب وحتحسي انك شبعتي من الحب كله قربي له وصلي عليه طول الوقت واقرأي عنه واسمعي سيرته حتتعلمي الحب اللي بجد واوعي تقولي احتياج الزوج وحب الزوج غير ، الحب أصلا اتخلق فينا عشان نحب ربنا ونحب اللي يحبه ربنا المشكلة ان الاعلام رسم لنا حب الزوج على انه احسن واقوى حب في الدنيا ودة اكبر غلط ، حب سيدنا اكبر واكبر فاكرين الصحابية اللي كانت بتسأل عن النبي عليه الصلاة والسلام بعد انتهاء غزوة احد وقالوا لها ان ازوجها واخوها وابوها استشهدوا وهي برضه بتسأل على النبي عليه الصلاة والسلام لحد ماشافته بعينها واتطمنت وقالت كل مصيبة بعدك هينة، شوفوا الحب ازاي ياجماعة قربوا من سيدنا واتعرفوا عليه حتنسوا الدنيا وأهلها وحتنسوا المصايب اللي عندكم عشان هو حييجي لكم في الرؤيا وحيطبطب عليكم صدقوني حبه وحب ربنا حيغنيكم عن أي حب في الأرض ،اما الزوج وحب الزوج فاستعوضي ربنا فيها وتخيلي لو كنتي ارملة كان حيبقى الوضع ايه كنتي حتعيشي تربي اولادك وحتصبري وتحتسبي ، فاعتبريه كدة واحتسبي واطلبي العوض من ربنا كل يوم والحي على ربنا وزني وكل يوم وكل وقت تطلبي العوض وحتشوفي حيعوضك ازاي ، لما تحسي انك عايزة حد يسمعك روحي لوكيلك واحكي له اقعدي بالليل لوحدك وكلميه وقولي له انا محتاجة زوج وانت اللي كتبت علي الاحتياج دة انت عوضني او خلصني من الاحتياج دة يارب وهو حيدبر امرك وحيعوضك ، هو سامعك طول الوقت وهو اللي حيثبتك بس انتي كلميه كتير وانتي متيقنة انه حيجاوبك


سؤال من تعليقاتكم : انتي بتقولي كوني قوية وتجاهلي وبعدين ترجعي تقولي اذا كنتي قوية هو حيطلقك ؟
شوفي انتي لو كنتي قوية بزيادة وحسستيه انك اقوى منه وحسستيه بضعفه بتنشطي عنده الشعور بالعار ودة أسوأ شعور ممكن النرجسي يحسه واذا استمريتي كدة كتير مع إيقاف الوقود النرجسي لانك اقوى منه يعني مش حيقدر ياخد منك وقود سلبي ولانك أصلا قرفانة منه فمش حياخد منك وقود إيجابي فبالتالي منعتي الوقود عنه ودة الاحتياج الأعظم للنرجسي ، فانتي بتسهلي عليه انه يدور على مصدر وقود تاني ويسيبك ، القوة اللي مفروض تكوني مبيناها عشان يطلقك لو انتي اخدتي قرار الطلاق وعايزة تخلصي ومش عارفة ، هي انك تحسسيه انك اقوى منه مش قوية زيه ، تحسسيه انه مش فارق معاكي وانك مش عايزاه وانك مش مهتمة بيه ولا بزعله ولا بخناقاته ولا باي حاجة تخصه
لكن القوة اللي مطلوبة للتجاهل قوة مرنة قوة متخليهوش يقلب عليكي ، قوة فيها ذكاء ودهاء وتكوني قوية زيه قوتك اد قوته . شوفي حلقات التجاهل حتعرفي قصدي من القوة

سؤال عن ازاي انا بحافظ على النوم بدري وتنظيم الوقت،و أيام ماكان اولادي صغار وازاي وفقت بين شغلي وبين تربيتهم
عشان تنامي بدري لازم الأول تصحي بدري ومتناميش ابدا بالنهار والأولاد يصحوا معاكي عشان يناموا معاكي لانك اكيد مش حتنامي وهم صاحيين ، انا كنت ملاصقة لاولادي من اول مايدخلوا من المدرسة لحد مايناموا ، اما بنذاكر او بنتفرج على كرتون او بناكل او بنلعب اذا هم مش معاهم أولاد عمهم ، ولما كبروا شوية كنت بنفس الطريقة بس بدل ماكنا بنتفرج على كرتون كنت اقعد اتفرج عليهم وهم بيلعبوا ع الكمبيوتر ، وكنت لازم اقعد معاهم يوم في الأسبوع نتكلم في أي قيمة من قيم الحياة او اسمع لهم ، كان كل واحد فيهم عنده مشكلة بيجي لي يحكي واسمع له واحاول احل ، كنت حريصة جدا من صغرهم اني احضنهم ويحضنوني والحمد لله لحد اليوم اصغرهم داخل ع الثلاثين ولسة بيحكو لي وبيلجأوا لي بالرغم من انهم ماشاء الله يحلوا مشاكل الناس وعندهم حكمة وذكاء بفضل الله الا انهم بفضل الله علاقتهم بي زي ماهي ،الله يهدي شباب المسلمين جميعا يارب


سؤال أخير من اليوتيوب ، باختصار هي عايزة تستمر معاه في بيته وتنتقم منه وهي معاه واحنا عملنا فيديو ازاي تنتقمي منه سواء معاه ولا سيبتيه هو هو مش حيختلف ، بس هي كمان بتقول امنع عنه الحلاقة الحميمة كنوع من الانتقام ولا ايه ؟ طبعا حفكركم انك لو منعتي الثلاث حاجات علاقة وخدمة ووقود حيمشي مش حيستفيد منك حاجة فحيمشي ، ثانيا كلنا عارفين ان منع العلاقة الحميمة عن الزوج لمجرد الانتقام حرام لكن اذا مثلا ضاربك اوشاتمك وشاتم اهلك وييجي يطلب علاقة بدون حتى مايعتذر فدة حرام عليه هو لان ربنا قال كدة قدموا لانفسكم ، والنبي قال لايقع احدكم على اهله كالبهيمة ، يعني من حقك ساعتها تقولي لا انا متضايقة ومش عايزة ، كمان اذا كنتي متأكدة مية في المية انه بيزني فمن حقك تمنعي نفسك عنه تماما ، واذا كنتي طالبة الطلاق وهو رافض يطلق برضه من حقك تمنعي نفسك عنه لان استحالت العشرة وانتي بتطلبي الطلاق ومدياله حق الزواج من غيرك والله اعلم اسئلوا دار الفتوى في الكلام دة للتأكد احسن ،بس كونك تمنعي العلاقة لمجرد الانتقام بدون توفر الشروط اللي قلتها اعتقد انه حيكون حرام ، اتأكدوا
جروب ادرس عدوك النرجسي