حلقة خاصة عن النرجسي الخفي والخفيف والضعيف والمتوسط
النرجسي بني آدم مش وحش ومش طول الوقت قاعد يخطط لك ولا موارهوش حاجة غير انه يغيظ فيكي ، لا هو عامل زي الأسد لو شبع حيبقى قط اليف ولو جاع حيبقى حيوان مفترس ، طيب نوضح اكتر
احنا فاهمين جزئية غلط هي اللي بتصوره وَحش وعايز يفترسنا ، لا هو عنده مشكلة هي اللي بتخليه يعمل اللي بيعمله اللي هي احساسه بالنقص دة بيخليه يحس انه عديم الفايدة وان مفيش امل انه يبقى انسان كويس وطبيعي ودي حاجات بتكون على مستوى اللاواعي ودة بيخليه بيقاوم التغيير في نفسه لانه شايف ان مفيش امل وبعدين مش بس كدة دة كمان مش بيقدر يتقبل نفسه وبيحس انها اصلا وحشة وكل الناس حترفضها لو عرفتها وبالتالي لما بيغلط بيخاف يعترف بغلطه عشان الناس حترفضه وتبعد عنه وبعدين لو انتي واجهتيه بغلطه بينكره ومستحيل يعترف بيه احسن تعرفي انه اد كدة سيء فتسيبيه او انه يطلعك اتي السبب في الغلط او يرميه عليكي ويعمل لك اسقاط او أصلا يقول لك انك فهمتي غلط او انه مقالش كدة اللي هو يعمل لك جاسلايتينج لا وممكن يخاصمك ويعمل لك صمت عقابي عشان تحرمي تواجهيه بغلطه تاني او يعمل لك غضب نرجسي عشان يحاول يقنعك انه مش غلطان او يخليكي تنهاري وبعدين يصالحك ويغطي على غلطه والموضوع او الغلط اللي عمله يتنسي ولو كل دة مجابش معاكي نتيجة يروح بقى لدور الضحية ويبدأ يستعطفك،، وكل دة عشان داخليا خايف تسيبيه.
وفي نفس الوقت هو مش قادر يتقبل انك احسن منه واقوى منه ونفسيتك احسن من نفسيته ودة بيغيظه ويحسسه بضعفه اكتر فيعمل ايه يدور لك على اي حاجة يضايقك بيها عشان تغلطي وتبقي زيه وحشة فيرتاح ، عشان كدة بنلاحظ ان النرجسي بيحب جدا يغيظ ، زي مابيقولوا كدة كياد ، وكل دي بتكون حاجات من اللاواعي مش كل الوقت بتكون هو مدركها عشان كدة بقول انه مش وَحش ابدا زي ما احنا فاكرين دة قط بس بري ومش واخد ع الناس ، دة لما بيكون في المستوى الأول من أطياف النرجسية او خفي او ضعيف ، اما اللي في المستوى التاني فبيكون اسد لو جاع حياكل أي حد ادامه ولو شبع حيبقى لطيف
طيب واحنا نعمل له ايه دة بقى ازاي نشبعه من غير مانيجي على نفسنا ولا ياكل لنا دراع ولا رجل ؟
حنديه الخدمة العادية جدا اللي كل زوج بيطلبها من زوجته أي زوج سوي او غير سوي ، وفي نفس الوقت العلاقة الحميمة اذا كانت مهمة بالنسبة له نديهاله اما الوقود بقى ودة اهم حاجة فدة لازم يكون بحساب وباسلوب فتات الخبز لان هو دة اللي ممكن لو زاد عن حده ينقلب لضده ، ليه لانك لو اديتيه وقود إيجابي كتير وقربتي منه اوي حيقلب عليكي وحيديكي خبطة جامدة عشان يبعدك ودة قلناه كتير قبل كدة ، والوقود السلبي برضه لو زودتيه هو حيحس انك ضعيفة جدا ودة بيحسسه بضعفه زي ماقلنا قبل كدة وطبعا مجرد ماحس بضعفه حس بالعار بسببك فيقلب عليكي، عشان كدة لازم تدي الوقود بحساب وبحكمة وشوفي حلقة امتى تدي وقود إيجابي وامتي تدي وقود سلبي ،
كل دة انا بقوله ليه واصلا عملت الحلقة دي ليه ؟ عشان أقول لك انك مش عايشة مع وحش حياكلك لو غمضتي عينك لا خالص غمضي ونامي واسترخي ومتخافيش منه ودة عشان تعرفي تعمليه لازم تكوني تعافيتي من ادمانه ، كمان عايزة أقول لك ان هو مش كل نفس يتنفسه بيكون قاصد يضايقك او يغيظك او بيكون مخطط له لا هو انسان وبني ادم بيتصرف ساعات بدون ماياخد باله ، طبعا الكلام دة مش بغرض الدفاع عنه لا بغرض تطمينك وتهدئتك عشان مينفعش تعيشي طول الوقت متغاظة ، شوفي حالة من الحالات بتقول ايه ؟
انا متأكدة اني مبقتش احبه لكن مش بقدر اتجاهل استفزازه ، وده طبعي اصلا مع اي حد مبعرفش حد يغيظني ومخدش حقي او اللي بيقرفني بخرجه من حياتي ، بالذات لما يبقى قاعدلي وبيأذيني نفسيا فعلا ،وبما اني مش عارفة اعمل ده فمتغاظة اكتر ، صعبان عليا نفسي وحاسة اني مش عارفة اخد حقي زي ما انا عايزة ،

دي حالة زوجها نرجسي خفي خفيف ضحية مستوى اول ، يعني سهل التعايش معاه جدا ومع ذلك دة احساسها ، ليه لانها كل نفس بيتنفسه بقت بتفسره انه عايز يغيظها ودة طبعا من ساعة ماعرفت انه نرجسي ، شوفوا هو ماتغيرش هو زي ماهو لكن هي اللي لما عرفت تفكيرها اتغير وبالتالي مشاعرها بقت سلبية اكتر (شوفوا حلقة التشافي ٩ بنتكلم فيها على تأثير تفكيرك وتفسيرك للموقف على مشاعرك ،مهمة جدا جدا الحلقة دي )
حاولي تفهمي شخصية النرجسي ومستواه وحاولي تكوني واقعية وتتفهمي انه انسان مش طبيعي اه بس مش وحش مش موراهوش حاجة غير انه يغيظك خصوصا الأنواع اللي ذكرتها في اول الحلقة ، الأنواع دي ممكن تعيشي معاهم حياة شبه طبيعية لو انتي فهمتي اكتر وغيرتي أسلوب تفكيرك من سلبي الى ايجابي


جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress