ايه علاقة الدين بالنرجسية ؟
لو مكنتش عرفت النرجسي مكنتش عرفت كتير عن ديني وقربت لربنا اوي .. دة جزء من تعليق واحدة منكم وواحدة منكم برضه ردت عليها ( دخل ايه الدين في النرجسية ؟!!؟؟؟ وعلامة استفهام وعلامتين تعجب وكمان ثلاث علامات استفهام ، يعني للدرجة دي هي مش فاهمة عشان كدة عملت لها الفيديو دة مخصوص لان الفكرة دي مهمة جدا جدا ولازم كلنا نفهمها
احنا لما بنواجه كرب وطبعا مجرد معرفة النرجسي دي كرب ، فما بالك الحياة معاه ،فالمفروض ان الانسان لما بيواجه مصيبة او بيعيش في كرب بيدور على مصدر امان يلجأ له ، بيدور على حد يحميه وينجده من الكرب دة ، ولما بتكون زوجة النرجسي ملهاش حد ابويها متوفين واخواتها مشغولين في احوالهم او ان الاهل ضعفاء ماديا ومعنويا او انهم أصلا نرجسيين فطبيعي انها مش بتلجأ لهم ومبتلاقيش ادامها غير ربنا تلجأ له مهما كانت علاقتها بيه ضعيفة ومهما كانت ذنوبها كتير ومهما كانت مقصرة في الطاعة هي جواها حتة ولو ذرة بتقول لها ان لنا رب قوي وعادل وحنون ورحيم ومش بيخذل اللي يلجأ له فبتبدأ تدعي وتكلم ربنا وهي ممكن تكون متعرفش عن ربنا ولا عن دينها أي حاجة هي طلعت لقت نفسها مسلمة بالاسم وتقليدا لاهلها اللي اسمهم مسلمين وبس لكن ايه الصلاة وايه الصلة وايه المطلوب وايه المفروض وايه الممنوع والمنهي عنه كل دة هي ماتعرفش عنه حاجة ، ولما بتقول يارب هو سبحانه وتعالى بيفرح بيها فرحة عظيمة ، اكيد عارفين الحديث : ثبت عن رسول الله عليه الصلاة والسلام أنه قال: لله أشد فرحًا بتوبة عبده من أحدكم براحلته التي عليها طعامه وشرابه فأضلها في أرض فلاة، فاضطجع قد أيس منها، فبينما هو كذلك إذا هو بها قائمة على رأسه فلما رآها أخذ بخطامها وقال من شدة الفرح: اللهم أنت عبدي وأنا ربك أخطأ من شدة الفرح ، ايه العظمة دي ، ايه الحب دة ازاي العظيم القادر القوي الخالق مالك الملك يحبنا كدة ويفرح بعودة العاصي امال الطائع بقى ربنا بيحبه اد ايه ، اللهم اجعلنا من احبابك يارب ياكريم ، المهم لما ربنا يفرح بيها ويطبطب عليها ويشوف انها لجأت له فبيحب انه يخلصها من الذنوب والشوائب ويخليها عبد طائع سليم القلب فيبدأ يعلمها دينها ، ربنا هو اللي بيعلمها ؟ ايوة ما كل حاجة ربنا هو اللي بيعملها لك هو انتي تعرفي تتنفسي اذا هو مش حافظ لك جهازك التنفسي ؟ طيب ازاي بيعلمك ، بيوريكي سكة اخت طيبة طائعة لله تعلمك ، بيجيب ادامك ع اليوتيوب فيديو لشيخ وسطي مسلم اسلام حقيقي يعلمك دينك ويخليكي تحبيه وتاخدي منه ولما ييجي ادامك حد وحش ومنحرف في أفكاره الدينية يخليكي تنفري منه ومتحبيش تسمعي له ، هو بينقي لك وبيحاوطك وبيحميكي وبيساعدك وبيعلمك وبيعرفك ، ومن هنا بتتعلمي دينك وبتبدأي تسمعي عن دروس عن الفقه او ناس بتحفظ قرآن وتعلم تجويد على زوم وانتي في بيتك ولا النرجسي حابسك ولا غيره ( ومن ضمن مزايا كورونا ان كل الدروس الدينية بقت على زوم يعني بقينا نحضر دروس ماكناش نحلم نحضرها لشيوخ في بلاد مختلفة واحنا في بيوتنا بفضل كورونا طبعا ومنع الدروس في المساجد ،، وتحسبوه شرا وهو خير لكم) طيب مين اللي عرفنا بالدروس دي ومين وصلنا لها ؟ الحظ ولا القدر ؟ ولا مين ؟؟ فعلا كورونا والنرجسي كانو سبب في توبة ناس كتير ورجوعها لربنا وتعلمها الدين ، سبحان العالم العليم العاطي الوهاب .
كل دة عشان أقول لك في الاخر الجأي لربنا وادعي واستقوي بيه وثقفي نفسك دينيا عشان تعرفي حقوقك وواجباتك اسمعي للشيوخ الوسطية اللي مش متعصبة ولا متشددة ولا فاهمة الدين غلط وفاكرة ان ربنا خلق الرجل يعبد ربنا وخلق المرأة تعبد الرجل ، خدي بالك انتي بتاخدي معلوماتك من مين ، كان فيه تعليق معناه ان النرجسي ذاللني وكاتم انفاسي بس انا خايفة أقول لا له أكون مش بطيعه وربنا يغضب علي ، انا مش حفتي ولا حتكلم في المواضيع دي بس حقول لك ببساطة ، انتي ربنا خلقك وخلقه وقال لك حيحاسبك معاه يعني انتي وهو حسابكم مع بعضه هو حيشيل عنك أي غلطة خلاكي تعمليها ولا كل واحد حيتحاسب لوحده ؟ هل ربنا لما حيحاسبك يوم القيامة حيقول هاتوا النساء لوحدهم والرجال لوحدهم عشان النساء حيتحاسبوا بقوانين مختلفة ولا كلنا حنتحاسب بنفس الطريقة ؟ يعني هو لما يشتمك وانتي تردي له نفس الشتمة هو حياخد سيئة وانتي حتاخدي عشرة ولا الشتيمة وزنها واحد عند ربنا ولا احنا فاكرين ربنا حيكيل بمكيالين زينا حاشاه ؟
طاعة الزوج فيما يرضي الله وما لايرضي الله لاطاعة لمخلوق فيه واذاكي وذلك لايرضي الله ومفروض عليكي تقولي لا للأذى ومفروض عليكي تدافعي عن نفسك وعن صحتك وحياتك اسمعي الشيخ عمر عبد الكافي عشان تفهمي حقوقك وواجباتك وتعرفي امتى تتمردي وتقولي لا ولا تطيعي الزوج المختل . مش الزوج السوي احنا بنتكلم عن الزوج المختل عشان الأزواج الاسوياء ميفكروش اني بقوي الزوجات عليهم انا بتكلم عن الزوج المختل ، اللي شايف نفسه مختل هو اللي يزعل من كلامي صح؟

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress