ازاي تكوني اقوي من النرجسي

إعادة برمجة عقلك عشان تكوني اقوى من النرجسي
عايزة تكوني اقوى من النرجسي ؟
لازم تعملي إعادة برمجة لمخك عشان تكوني قوية فعلا ، ازاي الكلام دة ؟ نفذي الخطوات اللي حقولها لك ، جربي ومش حتخسري حاجة
١- كوني واعية ومدركة لافكارك ، دة بيسموه ماوراء المعرفة ، اللي هو انك تفكري في تفكيرك او افكارك ، يعني ايه يعني تفكري انتي فكرتي صح ولا غلط في المواقف والتجارب اللي بتمري بيها
حاجتين مهمين جدا جدا مفروض تلاحظيهم في تفكيرك
(١) طول الوقت وبشكل ثابت ومستمر انتي بتحكمي ع الأمور وع الناس وعلى نفسك ومتقدريش توقفي دة بمعنى انك بتقيمي كل حاجة بتحصل وكل حد وحياتك ونفسك وتصرفاتك وبما انك ضحية نرجسي فانتي بتحكمي على نفسك بشكل قاسي وغير عادل
(٢) كمان طول الوقت بتتوقعي ، ايه اللي حيكون ، ايه اللي حيحصل ، ايه اللي النرجسي حيعمله ، ايه اللي حيقابلك في شغلك ،.....
مجرد انكتدركي انك بتفكري كدة ادراكك دة بيديكي القدرة على انك توجهي افكارك في الاتجاه الصحيح ، يعني لو بتفكري غلط تصححي أفكارك وتغيري طريقة تفكيرك ولو كنتي طول الوقت تحاكمي نفسك وتقسي عليها وتلوميها توقفي دة وتفكري بطريقة إيجابية وتشجعي نفسك ، كمان ميبقاش كل توقعك وحش يعني متوقعة انك تفشلي انك تمرضي ان اولادك يطلعوا عاقين ان الدنيا حتكون أسوأ ، حتبدأي تغيري اتجاه تفكيرك من السلب للايجاب .
٢- معلومة مهمة جدا احنا عارفينها من حديث شريف لكن اول مرة اشوفها في علم النفس : دكتور بول جينكيز بيقول ايه ؟ بيقول انك لازم تفهمي ان الاحداث اللي بتحصل معانا كلها في الحياة لاهي وحشة ولا هي حلوة (دة من وجهة نظر علم النفس ) يعني ايه الكلام دة.، يعني العواقب او الاحداث اللي بتحصل مهما كنتي شايفاها وحشة هي مش وحشة وبرضه مهما شفتيها كويسة فمش شرط انها تكون كويسة . كلام غريب شوية ، ححكي لك الحكاية اللي حكاها دكتور بول
مزارع عنده حصان قوي وجميل وكل جيرانه يقولوا له جميل حصانك انت محظوظ بيه وهو يقول لهم ايه اللي عرفكم ان وجوده شيء جيد ، شوية والحصان خرج ومرجعش والناس جت تواسيه وهو يقول لهم مين عرفكم ان هروبه شيء سيء وبعد كام يوم رجع الحصان ومعاه حصان في قوته وجماله بس بري ومحتاج يتروض ، والناس جت تبارك لهوبرضه قال لهم نفس الكلام عرفتو منين ، المهم ابن المزارع شاب فتي ومروض شاطر للخيول البرية واخد الحصان الجديد يروضه ووقع من عليه وانكسرت رجليه الاتنين كسر مضاعف والناس جت تواسيه كالعادة ورد نفس الر كالعادة ، بعد فترة جه الجيش يجمع الشباب عشان يدخلوا الحرب ولما لقوا الولد بيعرج ومكسور سابوه ما اخدوهوش الحرب . يعني اللي بنشوفه خير ممكن يكمن فيه الشر واللي بنشوفه شر ممكن يكمن فيه الخير (عسى ان تكرهوا شيئا وهو خير لكم ) كمان بقى الحديث الجميل اللي اقوى من كلام دكتور بول بيقول ايه ( عجبا لأمر المؤمن ، ان امره كله خير، وليس ذلك لأحد الا المؤمن ، ان اصابته سراء شكر فكان خيرا له وان اصابته ضراء صبر فكان خيرا له ) طبقي الحديث ع القصة لو كان المزارع مسلم ، الحصان قوي شكر الحصان هرب صبر الحصان بقى اتنين يعني لما هرب مكنش شر كان خير لانه رجع بواحد كمان ،
طيب قصتنا المشهورة بتاعة الملك اللي وزيره كان يقول له دايما لعله خير على أي حدث يحصل ، ولما حصل حادث للملك وقطعوا له اصبع والوزير قال له لعله خير غضب وسجن الوزير وبرضه الوزير قال له لعله خير وبعدها طلع رحلة صيد وتاه من حراسه واخدته قبيلة بتعبد صنم وكانوا عايزين يذبحوه قربان للصنم ولما اكتشفوا ان عنده اصبع مقطوع يعني قربان ناقص سابوه ومدبحوهوش ولما رجع خرج الوزير من السجن وقال له فعلا قطع صباعي كان خير طيب وسجنك خير ازاي ؟ قاله لو مكنتش سجنتني كنت زماني معاك في رحلة الصيد وكان زمانهم دبحوني بدالك لاني سليم معنديش صباع مقطوع فوجودي في السجن كان خير
في النهاية نفهم من الحكايتين دول ايه ان أي احداث بتحصل لنا مننفعلش معاها بشكل يؤذينا ويضعفنا لأننا مش عارفين أصلا الحكمة منها ايه وايه اللي حيحصل بعدها والاحداث دي بتمهد لايه حييجي بعدها ، متحكميش ع الاحداث لانك مش عارفة الحكمة منها وحتعرفي بعدين امال تعملي ايه ، تقولي لعله خير ومع الوقت حتفهمي الحكمة ، طيب ايه القوة في كدة ؟ القوة انك مش حتحزني الحزن اللي يؤذيكي ومش حتنهاري مع الاحداث ومش حتكوني ضعيفة لان الحزن الشديد مهلك والانهيار عمره ما ودانا للقوة بالعكس الانهيار ضعف ، رسخي جواكي ان ربنا مش عايز لك غير الخير هو مخلقكيش عشان يعذبك حاشا لله هو خلقك عشان تحبيه وهو بيحبك أصلا وكل حاجة بيعملها لك خير لكي حتى النرجسي ممكن يكون الخير كله لو صبرتي وكنتي من الصابرين اللي بيدخلوا الجنة بغير حساب ولهم من ربهم المزيد ، كل دة قوة ولا مش قوة ؟
طبعا النرجسي عكس كل اللي قلته دة تماما ، النرجسي مش منتبه لافكاره نهائيا ولاعمره يقدر يتحكم فيها ولا يفكر فيها أصلا ودي نقطة ضعف عظيمة فيه ، وكمان النرجسي متشائم وعمره ماحيشوف الأمور من منطلق لعله خير بالعكس ممكن يسجنك زي الملك لو قلتي له لعله خير عشان عنده صداع ، يعني دي نقاط ضعف عنده فعلا وعشان كدة عمره مابيسعد ولا بيشوف أي حاجة إيجابية وعايش في تعاسة وطبعا ضعيف ، ذاكري النقطتين دول كويس والحلقة الجاية حقولك كمان ثلاث نقاط ان شاء الله

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress