متحوليش زوجك من نرجسي خفي لنرجسي ظاهر !!!!! طالما مش حينفع تسيبيه وعارفة انك مش حتقدري تهربي
يعني ايه الكلام دة ؟ احنا عارفين ان في دورة حياة النرجسي الخفي بيحصل تحول دائم بين الخفي والظاهر في دورة ابتهاج اكتئاب (اللي مشافتش حلقة دورة حياة النرجسي الخفي تشوفها) ، طيب يعني هو لما بيتحول ظاهر بتكون مرحلة قصيرة وبيرجع خفي تاني ، لكن ممكن يحصل حاجة تخليه يبقى ظاهر للابد !!! ايه هي ؟
لو انتي قفشتيه في كارثة وواجهتيه وتطاولتي عليه وعريتيه ادامك وادام نفسك وفهم انك فاهماه تماما ومش حيعرف يضحك عليكي تاني ولا يعمل لك هوفرينج (او حتى هو تخيل كدة من شدة رد فعلك على الكارثة اللي عاملها ) وحس ان دي النهاية بالنسبة لك في الحالة دي حيتحول لنرجسي ظاهر وولو ادامك انتي بس وحيكون سيء جدا وقليل الادب ولسانه حيطول وممكن يوصل لمد الايد ، لانه خلاص اللي كان بيخبيه منك انكشف فخلاص مش فارق بقى وخصوصا لو انتي بعد ما كشفتيه استمريتي معاه ودة بيكون أسوأ شيء ممكن يحصل لك مع النرجسي لانه كدة أمن شرك وعرف انك مفيش حدود خالص واي حاجة حيعملها حتفضلي متمسكة بيه فخلاص يخبي ليه بقى ( بعض النرجسيين بيوصلوا انهم يتصلوا ببنات هم على علاقة بيهم ادام زوجاتهم ويغازلوهم ادامهم عادي جدا ليه ؟ لانه عارف انها ملهاش حيلة ولا رد فعل ولا حتعرف تعمل حاجة) عشان كدة بنقول لو مش حتقدري تاخدي حقك وتاخدي موقف قوي بدون ماتغلطي يبقى تغافلي واعملي نفسك مش شايفة لانك لو انفجرتي وعريتيه حتخسري انه خفي وحيصبح ظاهر ولو برضه انفجرتي وعريتيه وما تركتيهوش فبرضه دة حيجرأه عليكي اكتر .
الحاجة التانية اللي تحول النرجسي الخفي لنرجسي ظاهر انك تعملي له له قعدة رجالة وتجيبي اهلك وأهله وتفضحيه ادامهم بالادلة وتحطيه في موقف ميعرفش يطلع منه والغلط لابسه وكدة اتفضح ادام دايرة معارفه اللي راسم نفسه وصورته لهم وبالتالي هو أصلا اصبح ظاهر والكل عرف حقيقته وهو مخسرش حاجة او خسر ومش حيعرف يرجع الصورة تاني فحيتحول لنرجسي ظاهر لامحالة وممكن جدا يتنقل من المستوى الأول للمستوى التاني في الاطياف (شوفي حلقات مستويات الشر عند النرجسي الخفي ) كل دة انتيب تعمليه من غير ماتقصدي وبتزيد الحياة مأساوية وقهر وظلم وعداء واعتداء منه عليكي وعلى اولادك وكل دة انتي ماكسبتيش أي حاجة ، ليه مكسبتيش لان القعدات مع النرجسي عمرها مابتعمل أي نتيجة لانه أصلا مش بيلتزم ابدا بكلمته فإيه لازمة القعدة ( بيحصل منها فايدة اذا انتي ابوكي لوا او وزير وحيقعد معاه يهزئه ويهدده ، في الحالة دي حيفضل خفي ، وخايف ولامم نفسه غير كدة انتي اللي بتخسري)
عشان كدة دايما أقول يا ستات متدخليش حد ابدا الا اذا خلاص اخدتي قرار تتركيه واذا بيضرب يبقى محضر في القسم مش تدخلي اهلك لان اهلك لو مش مراكز مش حيخاف ، مش حيخاف غير من الشرطة ، اما اذا اخدتي قرار الطلاق بس في الحالة دي افضحيه زي ما انتي عايزة وان كنت مش بفضل الفضايح لانها حتمس اولادك ، فالافضل في حالة الانفصال تتعاملي معاه عن طريق المحامي وتقفلي كل أبواب التواصل عشان تريحي نفسك

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress