ازاي تتعاملي مع النرجسي او أي شخصية مسيئة وتستمري معاه من غير ما تأثري على صحتك النفسية وتقدري تكوني سعيدة وحياتك (الشخصية بعيدا عنه ) حياة سوية
ازاي تقدري تمسكي اعصابك وتكوني هادية ومتنفعليش معاه لما يعمل لك جازلايتينج ويلف ويدور معاكي ويعمل لك اسقاط او يعيد توجيه اللوم عليكي ؟
حقولك كلام مهم جدا لازم تركزي فيه كويس لانه حينفعك في التعامل مع النرجسي وغيره، وغيره دي هي الأهم ، اطفالك اللي بقيتي بتنفسي فيهم غضبك من النرجسي وانتي مش واخدة بالك
طيب ايه اللي بيحصل لما النرجسي يستفزك ويسقط عليكي او يعمل لك جاس لايتينج ، بيحصل عندك غضب ، طيب تعالي نشوف مخك بيتعامل ازاي مع الغضب دة ؟
بيخلي جسمك يتحط في حاجة اسمها مود حارب او اهرب او تجمد ، ودة المود اللي برضه المخ بيحطك فيه لما تتعرضي للخطر ، ربنا خلقه عشان تحمي نفسك وتحمي حياتك يعني لو اتعرضتي لهجوم من أي شخص حيؤذيكي جسديا او حيوان مفترس حتلاقي نفسك اما تحاربي او تهربي وبعض الناس بيحصل لها شلل مؤقت بتتجمد في مكانها من كتر الخوف ، وفي الحالة دي لما الجسم يدخل في مود حارب او هرب المخ بيعمل شت داون للجزء الامامي في المخ ايه دة ليه ؟ لان الجزء دة بتاع التحليل والتفكير المنطقي والمشاعر ودول انتي مش محتاجة لهم في ساعة الخطر فمش عايزين تشويش وتعطيل لانه لو اشتغل الجزء دة حيعطلك عن انك تهجمي او تهربي ودة حيكون فيه خطورة على حياتك ، دة لو فيه عدو او وحش بيهاجمك ، طيب لما تكوني بقى بيحصل لك هجوم من النرجسي وتغضبي بيحصل نفس الكلام بيحصل شت داون للجزء الامامي للمخ واللي انتي في اللحظة دي محتاجة له جدا جدا عشان تفهمي بيقول ايه وتحلليه وتعرفي تتصرفي ازاي ، طيب نعمل ايه عشان نشغل الجزء الامامي تاني ؟ تهدي نفسك ! ازاي يعني وانا بتهاجم وعمال يغيظ فيا ويستفزني ؟ بالراحة بس كدة ، مش مطلوب منك غير انك تاخدي نفس عميييق وتخرجيه بالراحة مش تنفخي لا خدي كام نفس عميق وخرجيه ببطء وغيري وضعك يعني لو واقفة اقعدي ولو حاسة انك حتموتي من الغيظ بعد الشر عنك اعملي نفسك داخلة التويليت واغسلي وشك عشان تهدي لازم تهدي نفسك في اللحظة اللي بيهاجمك فيها ، في الأول حيكون الموضوع صعب وناس حتقول مستحيل خصوصا اللي بتعاني من العصبية أصلا ، لكن بالتدريج وبالتدريب حتلاقي نفسك هادية أصلا ومش بتتأثري بهجومه . دي كانت اول خطوة ودي تستفيدي منها في التعامل مع اطفالك لما يتصرفوا غلط وتغضبي وترعبيهم منك .
٢- فيه حاجة اسمها اعيدي تأطير التجربة . ايه بقى الكلام الغريب دة احنا ناقصينك ياست انتي ؟ حقولك بس متزعليش إعادة تأطير التجربة يعني انك تعملي لها في ذهنك شكل جديد اصح من الشكل اللي فيه حاليا ، ازاي يعني ؟ مثلا انتي كنتي فاكرة ان النرجسي شخص سوي ومفروض انه يحبك ومفروض انه لا يسيئ لكي ولا يستغلك ولما اتصدمتي وعرفتي انه شخص غير سوي ومش بيحبك وعايز يستغلك ويؤذيكي فهمتي نص الحقيقة وبعد ماكانت تجربتك مع النرجسي عبارة عن اتجوزت واحد مش بيحبني وانا مكنتش حلمه وهو حب مرة وخلاص ومش عارف يحبني و..... ودي طبعا صورة غلط للتجربة ،بقت الصورة الجديدة ايه انه شخص غير سوي ومجمد مشاعرة مبيستخدمهاش ومحبش حد قبلك ولا حيحب حد ابدا والمشكلة فيه مش فيكي ، كدة حصل إعادة تأطير للتجربة واتغير مفهومك من الصورة الأولى للصورة التانية ، طيب مش دة برضه التأطير ولا المفهوم اللي انا عايزاكي توصلي له ، التأطير الصحيح للتجربة واللي لازم تفهميه لنفسك ان مش انتي المقصودة شخصيا بالاهانات والاذى النرجسي دة مش موضوع بينك وبينه ولا هو كان بيختارك انتي تحديدا عشان ينتقم منك او عشان شخصك لا هو اختار الة تلبي له طلباته والاختيار قدرا وقع عليكي ، ولو مكنش وقع عليكي كان حيقع على غيرك يعني أي حد مكانك كان النرجسي حيعمل معاه نفس اللي عمله معاكي ، طيب ودة حيفيدنا في ايه ؟ حيفيدنا انك تفهمي ان أي حاجة بيقولها النرجسي تقلل من قيمتك مش انتي شخصيا المقصودة بيها ومش ششايفها فيكي أصلا هو عنده صفات محسساه بالعار ولو حس انها عندك انتي كمان حيقنع نفسه ان دة الطبيعي بتاع البشر ومش انا لوحدي اللي معاق كدة ( زي اللي والعياذ بالله بيشرب مخدرات لو لقى ولد نظيف وملوش فيه يفضل وراه لما يفسده عشان يبقى محدش احسن من حد ) هو دة السبب الرئيسي للاسقاط عند النرجسي ، انتي مفروض لما تفهمي الكلام دة تعرفي انك ادام انسان مختل عايز يخلص من صفاته السيئة فكل شوية يرميها عليكي فانتي ترميها ورا ظهرك ولا كأنك سمعتيها أصلا دة حيساعدك على تقليل الشعور بالغضب منه والكره الشديد له (طبعا مش عشانه هو لا عشان الشعور بالغضب والكره بيؤذوكي انتي وبيحطموكي انتي وبيعيشوكي في نكد رهيب واكيد كل اللي مرت بمرحلة الصدمة وتعافت حتكون حست بمرحلة الغضب والكره واد ايه الحياة مع النرجسي في المرحلة دي بتكون صعبة جدا نفسيا ، لكن لما بتتعافى ومشاعرها تتحيد ومتبقاش حاسة بأي حاجة ناحيته بتكون اد ايه مرتاحة وكأن جبل اتشال من على قلبها .
٣- حطي حدود مناسبة تسمح لك تكوني في مأمن يؤكد انك لايتم ايذائك تاني ابدا ، طيب ازاي ؟ عندك حلقتين بيتكلموا عن الحدود اسمعيهم لحد ما ادور على كتاب تمارين يعلمك ازاي تبني حدود صحية لنفسك ، الحلقة الأولى (ازاي يبقى لكي حدود واضحة وخطوط حمرا النرجسي ميقدرش يتعداها ) ،، التانية (ازاي تحمي نفسك من النرجسي وتبني حدودك)

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress