النهاردة عايزة اقولك شوية ردود تساعدك على انك تتجنبي الاعيب النرجسي وتقفلي عليه سكة انه ياخد منك وقود سلبي وفي نفس الوقت ردودك متتسببش في الغضب النرجسي ، اللي هي تكتمه وتخليه ميعرفش يغلطك ولا يقولك متسيبينيش وتمشي وانا بتكلم ولا يقولك انتي ازاي بتكلميني كدة ولا انتي بتتجاوزي حدودك ولا أي حاجة من الكلام دة كله ، لكن الكلام هنا للنرجسي المتوسط والخفيف مش الثالوث ولا الخبيث ولا اللي بيمد ايده ،لان دول مينفعش أصلا التعايش معاهم وممكن الردود دي تستفزهم برضه يعني هم لما عايزين يخلوكي تنهاري برضه حيستفزوكي وحيخلوكي تنهاري فدول متطبقيش معاهم الكلام دة
طيب الأول لازم تكوني حققتي جزء كبير من التعافي عشان تقدري تردي بثبات انفعالي وتقدري تحكمي اعصابك ومهما حاول يستفزك بردوده برضه متتهزيش ( شوفوا سلسلة التشافي )
١- لما النرجسي يبدأ يقول رأيه فيكي او في لبسك او في طباعك زي مثلا انتي غبية انتي مش واثقة من نفسك انتي تخنتي انتي نحيفة ، انتي حساسة وطبعا كدة بياخد المناقشة في سكة تانية عشان يغير الموضوع الأساسي كالعادة ، ردك في الحالة دي مفروض يكون " اوك انا اقدر اتقبل رأيك فيا او تصورك عني مفيش مشكلة بس اظن نرجع لموضوعنا " لاتدافعي عن نفسك ولا تنهاري ولا تصدقي انك فعلا غبية ولا حساسة ولا أي حاجة من اللي بيقولها انتي محتاجة تقفلي السكة دي وتخليكي في الموضوع الرئيسي او تقفلي المناقشة بلطف
٢- لما يكون شايف انك مهملاه او أحيانا يقولك انا اكتشفت انك عمرك ماحبيتيني او انتي مش بتحبيني او مش بتحترميني او أي حاجة من الحاجات اللي هو ممكن يدعي انه حاسسها فمفروض يكون ردك " انا اسفة انك حسيت الكلام دة ، او انا زعلانة انك حاسس كدة " بدون ماتناقشي مشاعره ابدا وخدي بالك ان الشخص السوي مش مفروض يناقش مشاعر حد او ينكرها عليه او حتى يحاول يعدلها له ( شوفي حلقة ازاي النرجسي بيسيطر على مشاعرك ويكبتها من غير ماتحسي ) خصوصا بقى لو هو بيدعي المشاعر دي عشان يستفزك ويحطك في موقع دفاع عن النفس ،
٣- في رقم اتنين مفروض تفهميه انك مش من حقك تتحكمي في مشاعره او تتحكمي في هو بيحس بإيه تجاهك او تجاه أي حد ، وتقولي " انا متقبلة مشاعرك دي وفاهمة كويس ان مش من حقي اني اتحكم فيها ولا في تصورك لي"
٤- و" اعتقد اني لازم اتقبل اللي انت حاسه " يعني مش عايزة اتخانق النهاردة
٥- لما يحسي ببوادر الغضب النرجسي اذا اداكي فرصة أصلا تتكلمي ممكن تقولي له " انا متقبلة غضبك لكن دة مش معناه اني مسئولة عنه " ، او غضبك الزايد دة مسئوليتك وانا اعتقد اني مضطرة اتقبله" وممكن يكون دة ردك على الغضب بعد ماينتهي ويخلص وييجي يتناقش بقى ويقولك انتي السبب في انه غضب
٦- أحيانا النرجسي بيحب يفتح موضوع حساس بالنسبة لك الاف المرات عشان يحرجك او يجرحك ، زي مثلا موضوع خطيبك اللي قبله او زوجك الاولاني ، او مثلا مشكلة عن اهلك او مثلا طلاق اختك ، لما يبدأ يفتح موضوع زي دا لازم لازم يكون ردك عليه واضح وصريح " انا معنديش رغبة اجادل او اناقش الموضوع دة تاني " ولازم تقفلي المناقشة ولو اضطريتي تخرجي من المكان
٧- لما يحاول يغلطك بسبب رد من الردود دي تقولي له بمنتهى الهدوء " احساسك وتصورك دي ملكك انت لوحدك وانا مليش سلطة عليها ومش مفروض اناقشك فيها لان دي ابسط حق من حقوق البني ادمين "
اللي تعرف ردود تانية تكتبها لنا في الكومنتات واللي عندها مواقف محتاجة الرد عليها برده تكتبها لنا في الكومنتات وان شاء الله نوصل لردود لها


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11