ازاي تجبري النرجسي او أي حد انه يحترمك؟

المهم بقى النهاردة عايزين نتكلم عن ازاي تجبري النرجسي انه يحترمك وبرضه حقولك بغض النظر عن اللي بيضرب وبيشتم دة حيحترمك لما تعملي له محضر في القسم لكن طول مابيضربك وانتيب تداري عليه وتقولي وقعت واتخبطت عمره ما حيحترمك لانك متنازلة له عن نفسك ، انا اسفة اني بقول كدة بس دة حق ربنا وميزعلش حد ، ربنا كرمك ورفعك وانتي تذلي نفسك ليه ، اما بقى النرجسي المتوسط وخفيف النرجسية فدة تجبرية يحترمك بالعشر حاجات اللي حقولهم لك دول :

١- انتي الأول لازم تقَدري نفسك وتحترميها ودة حعمله حلقة نتكلم فيه ولو استدعى الامر حعمل له سلسلة حلقات ازاي تحبي نفسك وتقدريها وتحترميها ، لما انتي تقدري نفسك وشخصك ومشاعرك النرجسي حيحس بدة وحيبدأ يلاحظ ان فيه حدود محطوطة مش حيعرف يعديها لان النرجسي أصلا ضعيف ومش بيروح غير للشخص الضعيف وللأسف الضعيف عاطفيا بالاخص والأبحاث بتقول ان الضعيف عاطفيا بيكون تقديره لنفسه قليل وبالتالي احترامه لنفسه بيكون اقل وهو أصلا النرجسي اختارك كدة عشان هو ضعيف وعايز حد اضعف منه عشان يقدر عليه واذا مكنتيش في البداية اضعف فهو بيقدر يضعفك بمرحلة التحقير عشان يقدر عليكي ، يبقى انتي مطلوب منك تقدري نفسك عشان هو يبدأ يتراجع عن حدودك
٢- دايما تحسسي النرجسي انك ممكن جدا تسيبيه وانك مش حتموتي لو سبتيه وان الف واحد غيره ممكن ياخد مكانه ، حتى لو انتي مش مقتنعة بكدة خليكي متماسكة ادامه ولما يهددك انه يمشي حسسيه انه مش فارق معاكي ولو بالتمثيل وخلي احتمال تركه وارد جدا اذا ماتعاملش معاكي باحترام ، لان النرجسي بيخاف من الهجر ومش ممكن يتحمل فرضية ان أي حد يسيبه ، بس طبعا مش بمناسبة وبدون مناسبة لا بحكمة وبالعقل ، يعني لما يبدأ يتلاعب بيكي وضحي له بهدوء انك فاهمة انه بيكدب وبيتلاعب وانك رافضة الأسلوب دة ولو مبطلوش حتسيبيه مش كل مايكح تقولي له حسيبك ، خليكي حكيمة
٣- متقربيش منه عاطفيا ، خلي دايما فيه مسافة نفسية بينك وبينه ، يعني بالبلدي كدة متأخديهوش عليكي ومتندلقيش عليه اوي لانه للأسف لما دة بيحصل هو بيخاف من القرب الشديد وبيكون رد فعله انه يهبشك ويهينك بدون سبب لانه مش عايزك تقربي ، فلما تكوني على مسافة مش حتديه الفرصة انه يلوشك ، كمان متتداخليش معاه اوي ولا تعرضي خدماتك الا اذا طلبها وطلبها بأدب واحترام ومتنصحيهوش الا اذا طلب النصيحة ، خليكي حدودية ومتتباسطيش معاه الا اذا تباسط هو معاكي ، يعني زي مابيقولوا اذا ابتسم ابتسمي اذا قلب زي البحر الهايج خدي جنب وابعدي عنه لحد مايهدى ويرجع تاني لوحده ودة على فكرة ممكن نطبقه مع أي شخص سوي كمان .
٤- لو حاول يدخلك مرحلة التحقير شغلي طريقة الحجر الرمادي ، يعني مفيش أي تأثر بأي كلام بيقوله وكمان ابعدي عنه بقدر المستطاع ، بأي حجة ، مشغولة ، مذاكرة الأولاد ،روحي عند اهلك او حتى عند اهله ، ابعدي ولو في نفس المكان بس ابعدي نفسيا وسدي ودانك .
٥- لما يحاول يدخلك في مناقشة ملهاش هدف ولا فايدة ومش حتوصلي منها لحاجة والغرض منها انهاكك او استثارتك عشان ياخد شوية وقود انسحبي وانهي المناقشة بلباقة وهدوء وبرضه اتحججي بأي حاجة عشان تقفلي المناقشة ، مرة قومي الحقي الصلاة ، مرة الاكل ع النار ، مرة ادخلي الحمام ، أي حاجة ميقدرش يمسك بيها عليكي غلطة .
٦- متبينيش له انك خايفة منه ومتحسسيهوش انه نجح في انه يمشيكي على قشر بيض ، اتحركي بطبيعتك واعملي اللي انتي عايزاه في بيتك ولو حتى كنتي خايفة فعلا برضه مثلي انك مش خايفة ( شوفي خلقة اكبر عدو لضحية النرجسي ، بتتكلم عن الخوف وازاي تتخلصي منه ، حطي في دماغك انه سواء غلطتي او مغلطتيش هو بيعمل مشاكل ومنكد يعني مش فارقة ودة حيشجعك تكوني على طبيعتك لانها زي مابيقولوا خربانة خربانة كدة كدة مش مرتاحين ، وعلى فكرة الكلام دة فيه حالات كتير نفذوه ونجحوا وبدأوا يتغلبوا على الخوف وبدأوا يجبروا النرجسي على احترامهم بس انتي حاولي بحكمة ومتغلطيش متمسكيهوش غلطة عليكي
٧- اتعاملي مع النرجسي وانتي مقتنعة داخليا انك احسن منه ع الأقل انتي بتراعي ربنا ومش بتعصيه ، وانتي عندك مميزات اكتر منه بكتير وانتي عندك تعاطف ومشاعر وانتي بتخافي من ربنا ، انتي احسن منه ، لما تتعاملي معاه وانتي من جواكي عارفة انك احسن منه ع الأقل انتي ربنا في صفك ودي تكفيكي وتخليكي فعلا مقتنعة انك احسن منه ، طبعا دة حيكون له تأثير عليه في معاملته لكي واحترامه لكي ومتسأليش ليه وازاي جربي وانتي تعرفي
٨- قوي حدودك ودي لها حلقتين لوحدها ( ازاي تحمي نفسك من النرجسي وتبني حدودك (التشافي ١٦) ، ازاي يبقى ليكي حدود واضحة وخطوط حمراء النرجسي ميقدرش يتعداها )

٩- خليه يعمل مجهود عشان يحصل على رضاكي ، حسسيه انك مش حترضي غير لما تاخدي حقك ، مترضيش بفتات الخبز ، ورضاكي بالنسبة له مش حب والكلام بتاع الاسوياء لا رضاكي حيتمثل في ارضاؤه في العلاقة الحميمة ، وفي انك تديه جزء من مرتبك ، او انك تمدحيه وتديله وقود هو دة اللي بيحسسه انك راضية عنه وطبعا الوقود هنا إيجابي ، كل دة مش مفروض ياخده بسهولة لازم يعمل حاجة مقابل رضاكي دة
١٠- حسسيه انك مش ملكه ومش متاحة طول الوقت لان النرجسي مش شغوف باللي بيمتلكه هو دايما شغوف باللي مش ملكه وشغوف اكتر باللي بيحس انه مش حيقدر يمتلكه ، انتي حسسيه انك مش تحت رجله طول الوقت وانك عندك حاجات كتير شاغلاكي بس بحكمة ومتسيبيش الحبل يفلت من ايدك يعني متوصليهوش لغضب نرجسي عشان انتي مش متواجدة طول الوقت ، طبعا لازم توزني
كل دة حيجبر النرجسي على احترامك ، بس انتي حاولي بالتدريج وبهدوء وبنفس طريقته ( شوفي حلقة لو مش عايزة تطلقيازاي تغيري معاملتك مع النرجسي بالتدريج من غير ما يقلب عليكي)


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11