الفلوس هي نقطة ضعفك وهي مصدر قوته وعشان كدة اول حاجة بيعملها اول ما يتمكن منك هي انه يمنعك من الشغل وطبعا بحجة انه يريحك وانتي اميرة الاميرات ومينفعش تتبهدلي في الشغل ، او يقول لك انه حيفتح لك شركة وتبقي مديرتها او مدرسة او عيادة او أي حاجة انتي بتشتغليها حيفضل يوعدك بالاحلام اللي عمرها ما حتتحقق عشان تسيبي شغلك وتفقدي مصدر رزقك عشان تكوني تحت ضرسه طول عمرك ويوم ماتفكري تهربي منه متلاقيش تصرفي على نفسك ولا على اولادك ، وبعضهم لما يلاقي زوجته متمسكة بالشغل في اول الزواج وقبل الخلفة يسيبها تشتغل شوية لحد ماتخلف ويبقى فيه طفل حتخاف على البيت عشانه ويبدأ بالذوق يقول لك لازم تقعدي عشان تراعي البيبي واولادك أولى بمجهودك وانتي بقيتي ام و..... ، المهم انه حيقعدك في البيت الا في حالة واحدة انك مرتبك كبير وحيستفيد منه وهو مش حيقدر يعمل كل اللي هو عايزه بمرتبه لوحده ، في الحالة دي حيخليكي تشتغلي بس مش حيخليكي تحتكمي على مليم من مرتبك ولو اصريتي حيعمل لك مصروف صغير يادوب يمشيكي وعمرك ماتعرفي تحوشي منه ، ولو كنتي واعية شوية واصريتي ميكنش له علاقة بمرتبك ، حيقصر في مصاريف البيت والاكل واللبس عشان تضطري تصرفي كل مرتبك وبرضه ماتحوشيش وميبقاش معاكي أي حاجة للزمن ومهما عمل فيكي متقدريش تسيبيه لانك مش حتقدري برضه تكفي اولادك بمرتبك لوحده ولانك معملتيش أي مدخرات تنفعك في الحالة دي . طيب لو انتي غنية وهو غني حيحاول يدخل في مشاريع كبيرة ويدخلك معاه ومعظم فلوسك تكون تحت ادارته بحيث يعرف يمسكك تماما ويتحكم فيكي ومتقدريش تهربي منه برضه لانه حيهددك ياخد كل ممتلكاتك وفلوسك اللي هو بيديرها ،
الفلوس نقطة ضعف الكل ومصدر قوة الكل برضه لكن في العلاقة النرجسية الفلوس هي سجن الضحية وأولادها عشان كدة لازم تشتغلي ولازم يكون لك ذمة مالية منفصلة عنه ، واللي مش بتشتغل ومش عارفة تشتغل تدور على شغل ع النت حفضل أقول طول الوقت اللي عايزة تعمل حاجة حتعملها ، بيقولوا الحاجة ام الاختراع ، وانتي محتاجة ، محتاجة تعيشي في سلام ومحتاجة تعيشي حياة كريمة ، ومحتاجة تحمي نفسك واولادك من استغلال النرجسي ، ومحتاجة تحافظي على كرامتك ، انتي اكتر حد محتاج للشغل يبقى لازم تشوفي طريقة تدخلي بيها فلوس ، اعرف بيت كان مفتوح بتربية القطط واعرف ناس كانوا عايشين من تربية الطيور والبيوت دي طلع منها مهندسين ودكاترة ، واعرف حالات بدأوا مشاريع من البيت وبيكبروا ، واعرف حالات بتشتغل ع النت والنرجسي ميعرفش عنها حاجة وخصوصا اللي بيكون زوجها مسافر ومش مقيم معاها او اللي سايبها وقاعد عند اهله ، وحتى اللي عايش معاها تقدر تشتغل وتغريه بانها حتساعده وعندي حالات عملت كدة فعلا وسابها تشتغل لان حيستفيد بس الشطارة انك متعرفيهوش داخل لك كام ابدا عشان تعرفي تحوشي طبعا
كل واحدة وظروفها ، كل واحدة تعرف تمشي حياتها بالطريقة اللي تناسبها ، المهم متناميش في الخط وتقعدي تعيطي وتشتكي للي رايح واللي جاي وانا مظلومة وانا مسكينة وجوزي ظالم ومفتري لا وطلع نرجسي يعني مفيش امل يعني حموت بالحياة ، وبعدين في النهاية بتخسري نفسك واولادك وبتديه فرصة يضيعك اكتر واكتر ، متستسلميش للنوم والكسل والضعف ، اتعلمي أي حاجة من اليوتيوب اتعلمي وعلمي ، اشتغلي تطريز او أي حاجة بالابرة والخيط ، اللي عايزة حتعمل واللي كسلانة وعايزة تعيش دور الضحية محدش حينفعها وحتضيع نفسها وأولادها .


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11