الفيروول : دكتور راماني
هو بالعربي يعني جدار الحماية وهو عبارة عن برنامج لحماية الكمبيوتر او أي جهاز موصول بالنت ، ودة بنستخدمه عشان نمنع وصول أي هاكر او قرصنة على الأجهزة دي ، طيب ايه الحل البديل له ؟ الحل البديل هو اننا نفصل النت ودة مستحيل نقدر نعمله لأننا كدة بنحول الحاسوب لآلة كاتبة ملهاش أي فايدة ، طيب ايه علاقة الكلام دة بالنرجسي ؟
النرجسي في بداية علاقته بيكي في مرحلة الحب الدهبية بيبدأ يعمل هاك لجهازك النفسي زي الهاكرز بالظبط مابيعملوا في جهازك الحاسوبي او الكمبيوتر بتاعك ، ازاي الكلام دة ؟ النرجسي بيبعت لينك لدماغك يقول لك فيه ان هو حبيبك وهو جدار الحماية بتاعك (الفيروول) وان محدش بيحبك اده وكل الكلام دة ، وبعدين يبدأ يدخل جوة عقلك بمزاجك وياخد كل المعلومات اللي ممكن يستخدمها ضدك بعدين ( ايه اكبر مخاوفك ، ايه اكتر حاجة بتقلقك ، ايه اللي بتحبيه في نفسك ، .... شاركيني مشاكلك واحزانك ) وهكذا وانتي تفتكري ان هو دة الحب الحقيقي اللي بنتشارك فيه كل حاجة ومحدش بيخبي حاجة على التاني وخصوصا ان هو كمان حيمثل دور الصادق الأمين اللي بيحكي لك كل اسراره وكل مشاكله وبيكون غالبا نصها كدب وطبعا انتي بتصدقي كل كلمة بيقولها وبتفتحي كل أبواب الحماية بتاعتك وبتدي كل اللي تقدري عليه ، وهو بياخد المعلومات وبعدين بمجرد ماتخلص مرحلة الحب الدهبية وتبدأ مرحلة التحقير يبدأ يستخدم المعلومات دي ويبدأ يخرج اسرارك برة اللي انتي قلتيها له بمزاجك لانك قفلتي الفيروول بتاعك ، طيب نرجع الفيروول او نبنيه ازاي ؟ دلوقتي انتي فهمتي ان أي لينك غريب يتبعت لك ايميل او واتس متفتحيهوش لانه ممكن يكون هاكر او فايروس ولو انتي مش عارفة كدة كل يوم حتنزلي فيروس على جهازك او موبايلك ، يبقى اول خطوة انك تعرفي وتفهمي ، تعرفي كل حاجة عن النرجسية وتعرفي كل حاجة عن النرجسي اللي معاكي تفهميه وتفهمي تصرفاته واسبابها وتفهمي نواياه وتعرفي تتوقعي الخطوة الجاية وتفكري حتتعاملي معاها ازاي ، مع الوقت والعشرة حتقدري تعملي دة ، مجرد مافهمتي النرجسي حتعرفي تحمي نفسك منه ، يبقى اول خطوة هي المعرفة . تاني حاجة انك تفهمي ان مينفعش تفصلي النت عن الجهاز عشان تحميه من الهاكرز والفيروسات ، لازم تنزلي برامج حماية وتفتحي النت ، ودة اللي لازم تعمليه لنفسك لازم تسلحي نفسك بالعلم والشغل والثقة بالنفس وتتعاملي مع النرجسي ومع العالم الخارجي كمان ، الا في حالة واحدة حتفصلي النت اذا نويتي تقطعي مع النرجسي وهنا بنعمل النوكونتاكت ( حلقة النوكونتاكت )
تاني خطوة انك تنفذي تكنيك دييب اللي قلناه في حلقة (تكنينك من اربع خطوات للتعامل مع النرجسي بشكل افضل وخسائر اقل )متدافعيش عن نفسك ، متشرحيش نفسك ومتشرحيش سبب مشاعرك ، متشرحيش لما تحسي انه مش فاهم لانه غالبا مش حيسمع ولا حيفهم غير اللي هو عايز يسمعه ويفهمه فريحي نفسك ، تالت حاجة متدخليش معاه في مناقشات ومهاترات بتضيع الوقت والجهد وتديه وقود نرجسي ، ، واهم نقطة رابع نقطة متشخصنيش المسألة لان المشكلة مش فيكي المشكلة فيه هو .
طيب اعمل دة ازاي في المعاملة اليومية ؟
لما تعملي صمت عقابي للنرجسي وبعدين تتصالحوا وييجي بعدها يسألك انتي ليه عملتي كدة وانا بحبك ومقدرش استغنى عنك وانتي ظلمتيني وانا تعبت في الفترة دي وانتي كنتي واحشاني ، وممكن يشتري لك هدايا ويدخلك في مرحلة هوفرينج كمان ، هنا لازم تنتبهي وتاخدي بالك انه بيبعت لك نفس اللينك اللي بعتهولك في مرحلة الحب الدهبية عشان يهكر دماغك ويفهم انتي ازاي قدرتي تعملي صمت عقابي وايه اللي غيرك وانتي حاسة بإيه وياخد كل المعلومات الجديدة اللي انتي مخبياها وبعدين يعمل لك سيت اب من اول وجديد ونعيد المأساه تاني ، انتبهي لو قلتي له انا عملت كدة عشان انت ظلمتني ولازم تدوق اللي بتعمله فيا وانت عملت كذا وكذا وانا زعلت منك وكان لازم ابعد زي مابتبعد وهكذا ، انتي كدة اديتيه اللي هو عايزه وفهمتيه حيدخل لك منين المرة الجاية وحيتعامل ازاي ، الصح انك تحافظي ع الفيروول بتاعك المفروض ان ردك يكون مقتضب وقصير وبدون تفاصيل ( انا لقيت نفسي مش قادرة أتكلم قلت افصل شوية ، او انا فضلت نبعد شوية عشان منفجرش الموضوع ، او مفيش حاجة انت كنت ساكت فأنا محبتش ازعجك زي كل مرة ،.. ) الردود اللي مش مفهومة كتيييرة ولازم تكوني اتعلمتيها منه .

حلقة النوكونتاكت
https://youtu.be/_GglOMn6RnU
حلقة تكنيك دييب
https://youtu.be/bJpKLvnHAv8

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11