ازاي تعرفي البني ادم اللي ادامك دة حد طبيعي بس عصبي ولا دة غضب نرجسي؟ طيب ايه فايدة الكلام حنستفيد منه ايه يعني احنا مالنا غضب نرجسي ولا عصبية ؟ لا مالنا طبعا عشان انتي لو جوزك عصبي بس مش نرجسي تفهمي لو انتي فاكره نرجسي بسبب عصبيته لما تسمعي الفيديو دة ممكن تفهمي ان لا الكلام دة مش في جوزي يبقى مش نرجسي ،او لو انتي جوزك نرجسي وانتي عمالة تلتمسي له اعذار لغضبه اللي كل شوية راعبك بيه وتقولي اصله عصبي ، تفهمي بقى انه مش عصبي لا دة نرجسي
حقولك ٩ علامات تعرفي منهم اذا دة غضب نرجسي ولا عصبية
١- الغضب النرجسي غالبا بيكون سببه النقد او توجيه اتهام يعني قفشتي اخينا في حاجة ، او اهنتيه باي حاجة
٢- الغضب النرجسي بيكون وش النرجسي كله كره ونظراته كلها غل وكره ودايما بيكون جواه احساس انه لازم ينتقم واحساسه دة بيخرج في نظراته لكي
٣- الغضب النرجسي بيحصل من النقد مهما كان النقد دة حقيقي يعني مش ظالمينه ولو قافشاه في خيانة ومعاكي دليل برضه عادي حيغضب ،انما الانسان العصبي ممكن لو النقد صحيح مش حيغضب ولو اتقفش برضه حيجيب ورا
٤- النرجسي بيفضل الغضب عن المناقشة المنطقية حتى لو المناقشة حتحقق له مكسب برضه هو بيروح للغضب لانه بيحب يرعبك ويخليكي تسكتي تماما متتناقشيش ولا تكرري الاعتراض دة تاني ابدا وفي نفس الوقت يجننك لان الغضب ملوش اي مبرر وبكدة يشكك في نفسك يمكن انتي قلتي حاجة مكنش مفروض تقوليها او انك فاهمة الموضوع غلط ودة بيعتبر نوع من انواع الجاسلايتينج لانه بيلخبطك ويشكك في نفسك
٥- الغضب النرجسي بيخلي النرجسي يحس بقوته وقدرته علي هزيمة اللي ادامه وبالتالي بيتأكد انه صح طالما انتصر فميفكرش اصلا انه غلطان عشان يتعلم من غلطه ، انما الانسان العصبي بيكون العصبية حصلت غصب عنه ولما بيهدى بيفكر ويفهم انه غلط وبيتعلم من غلطه فالنرجسي بيكرر الاغلاط ومنها الغضب النرجسي بنفس الصورة كل مرة انما العصبي احيانا بيحاول يتحكم في نفسه وطبعا سهل يتعالج ويتغير انما النرجسي لا
٦- الغضب النرجسي بيستفزك فتنتقديه تاني فيزيد الغضب لدرجة ممكن يوصل للعنف ، انما العصبية غالبا مش بتوصل للعنف
٧- الغضب النرجسي اذا حصل ادام الناس بيتهيألهم وهو كمان بيصور لهم ان الضحية هي السبب وانها عملت عملة سودا وبالتالي بيخلي الناس في جانبه وممكن يعمل معاهم علاقات قوية تخليهم بعد كدة قروده الطائرة ، كمان الغضب النرجسي بيساعده على انه يعمل حواجز قوية بينه وبين الناس عشان يحمي نفسه
٨- النرجسي دايما مهاجم في حالة الغضب هو بيستخدم مبدأ الهجوم خير وسيلة للدفاع
٩- الغضب النرجسي بيكون اكتر في النرجسي الخفي لانه الاكثر حساسية للنقد واكتر ضعفا واحتياجا لتخويف اللي ادامه ولو حصل مع النرجسي الظاهر بيحصل في وقت يكون هو فيه ضعيف


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11