مراحل اكتشاف النرجسي
انتي قبل ماتعرفي انه نرجسي كنتي عايشة ازاي معاه وبعد مابدأتي تشكي ان فيه حاجة غلط بتبدئي تحاولي تفهمي وتدوري وتبحثي وبعدين تبدأي تعيدي ترتيب نفسك وتفكري و في الاخر بتاخدي قرار استمر ولا اهرب كل دة انتي بتمري بخمس مراحل خلينا نشرحهم بالتفصيل :
١- التأمل المسبق : انتي عايشة علاقة مش فاهماها وحاسة ان فيه حاجة غلط لكن مش فاهمة ايه هي وفي نفس الوقت انتي بتتعودي على نمط العلاقة الغير صحية دي وبتتأقلمي عليه ومع الوقت بتحسي انها طبيعية ومفيهاش حاجة بحكم التعود اللي حصل
٢- التأمل :
مع استمرار ضغط النرجسي وبداية تكشف بعض الاوجه السيئة لشخصيته انتي رجعتي تحسي تاني ان فيه حاجة غلط وبدأتي ترفضيها وتفكري ان لازم لها حل لكن في نفس الوقت مش بتحكي لحد ولا بتحاولي تسألي ولا تستشيري لكن بينك وبين نفسك بتحاولي تجدي طرق للخروج من الموقف الغريب اللي حاساه وبتحاولي تفهمي المشكلة فين عشان تحليها ، وطبعا مستحيل تعرفي انك في علاقة نرجسية سامة لانك لسة محبوسة جوة تفكيرك وعقلك اللي معندوش اي معلومات عن النرجسي ولا عن صفاته ولا العلامات الحمرا اللي تبينه لكي ، ولو حتي شفتي التصرفات اللي لو اي حد شافها حيفهم ان شريكك مستغل ومؤذي انتي حيكون عندك مبررات كتير لتصرفاته وحتدافعي عنه بس في نفس الوقت جواكي عارفة ان فيه حاجة غلط
٣- الاعداد والتجهيز :
المرحلة دي بتوصلي لها غالبا بعد اول صدمة خيانة او غضب نرجسي واحيانا بعد تكرار صمت عقابي طويل ، بتبدأي تبحثي وتسألي وتحكي للمقربين اوي وبتوصلي لحل اللغز وبتتصدمي وتمري بمرحلة الصدمة بما فيها من الام واوجاع وحزن وخوف وكوابيس وبعدين بتفكري وتحسبي حساباتك اكمل ولا اهرب ودي بتكون مرحلة خطرة جدا لانك بتتغيري غصب عنك والنرجسي بيحس بتغيرك دة وبيبدأ يبان اكتر والقناع بيقع بالكامل وبتشوفي الوجه القبيح منه ، وخصوصا لو مكنتيش عندك ثبات انفعالي ولو واجهتيه باللي عرفتيه عنه وطبعا انتي مطلوب منك في المرحلة دي انك تتماسكي ومتواجهيهوش ولا تعرفيه وصلتي لايه عشان متعرضيش نفسك للمواجهة معاه وانتي في مرحلة الصدمة اللي بتكوني في منتهى الحزن والضعف والهشاشة وتفكيرك مشوش وهو في الحالة دي حيتلاعب بيكي كويس جدا فلازم تهدي ومتواجهيش ولا تعرفيه انتي عرفتي ايه .
٤- اخد القرار وتنفيذه
المرحلة دي بتكوني فوقتي من الصدمة وبدأتي تراقبي النرجسي وتصرفاته بس من برة الدايرة اللي كان حابسك فيها بتتفرجي عليه وهو بيحاول يائسا انه يعمل جاس لايتينج ولا يتلاعب بيكي ولا يحاول ياخد منك وقود نرجسي باستفزازك بكل الطرق وانتي بتكوني كأنك قاعدة بتتفرجي علي فيلم ( حالة قالت لي انا بتفرج كأني قاعدة فوق وببص عليه من فوق ، يعني قعدة في السقف وبتتفرج ) ودة تعبير معناه النفسي انها حست اد ايه هي اعلى واحسن منه وانه اصبح ادامها طفل بيعبط وهي قاعدة تتفرج عليه)
الوصول للمرحلة دي محتاج مجهود منك وشغل على نفسك وقراءة ورياضة وخروج وتثقيف وقرب من نفسك ، لازم تتعبي عشان توصلي للمرحلة دي عشان لما تاخدي قرار تاخدي قرار سليم متندميش عليه ابدا
اذا اخدتي القرار بالترك ، طبعا حيحصل تشويه سمعة وطبعا القرود الطائرة حتبدأ تقوم بواجبها وهو حيلف حواليكي ويبعد شوية ويقرب شوية ويحصل اختلال في التوازن طبعا لان المفاجـأة بتكون بالنسبة له ضربة قوية
٥- الصيانة :
المرحلة دي مرحلة الحفاظ على التغيير اللي حققتيه ومفروض تعملي فيها قطع اتصال طويل الامد لو كنتي قررتي تخرجي من العلاقة تماما او تعملي حجر رمادي لو حتستمري في العلاقة ، المرحلة دي حرجة جدا ومؤلمة جدا سواء حصل انفصال نفسي او جسدي ولازم يكون حواليكي مساندين موثوق فيهم ولازم متسمعيش لحد يقولك فكري و دة بيحبك و ،،، متخليش حد يؤثر عليكي وحافظي على اللي وصلتي له محدش فاهم ايه الوضع الحقيقي غيرك . عشان تحافظي علي اللي وصلتي له متستسلميش للذكريات وحاولي تبعدي عن الاماكن اللي فيها ذكريات حلوة والمناسبات السنوية اللي لها ذكريات كويسة دا اذا اصلا هي الحمد لله بتكون كلها ذكريات وحشة ، المهم متستسلميش للذكريات اللي تضعفك وكوني عارفة انك حتمري باوقات صعبة فيها حزن واحباط والم وخوف وارق وكوابيس كل دة طبيعي وحياخد وقته ويخلص المهم تكوني قوية وتسندي على حد يقويكي ومفيش احسن من ربنا هو اللي تسندي علي وتكلميه وتحكي له وتشتكي له وهو اللي حيقويكي ، ولو لكي صديقة او اخت او ام ياريت تكوني معاها كتير في الوقت دة


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11