حوارك الداخلي عن النرجسي … د. كارتر
يعني ايه حوارك الداخلي عن النرجسي ؟ يعني تفكيرك فيه وكلامك له في نفسك بينك وبين نفسك ، عارفة لما تكوني ماشية في الشارع ويطلع لك كلب اعزكم الله ، بتقفي مكانك وتقولي في نفسك ايه انا مش خايفة منك انت مجرد كلب ، انا مش حخاف عشان انت لو شميت ريحة الخوف فيا حتهجم عليا ، انا مش خايفة منك انا لو هوشتك حتجري صح؟ مش دة اللي بتقوليه لنفسك ؟ هو دة اللي اقصده بحوارك الداخلي مع النرجسي مع الفارق طبعا والاعتذار لكل نرجسي سيء حقير .
حوارك الداخلي مع النرجسي حيساعدك على التغلب على الخوف والاضعاف اللي بيعملهولك النرجسي ، تعالي نشوف الحوار دة مفروض يكون ازاي ؟
١- انا عارفة ان تصرفك العنيف دة بيخبي وراه خوف عميق من انك تكون مهجور ومنعزل ومنبوذ ، انت زي الطفل المرعوب اللي عمره ماحيكبر ويتخلص من خوفه ، وانت متخيل انك كدة بتخوفني ودة مش حاصل ومش حيحصل
٢- انت بتبني احترامك وتقديرك لنفسك عن طريق اهانتك للاخرين وانا منهم ، ودي طريقة مختلة والمهم اني فهمتها وبالتالي اهاناتك مبقتش تؤثر فيا ابدا لان رأيك معيوب ومفهوش اي منطقية ولا شفافية ولا عقلاني اصلا
٣- انت مش بيعجبك تفكيري ولا كلامي عشان مش متوافق مع تفكيرك ودي مشكلتك لان الانسان السوي مفروض يتقبل الاختلاف في التفكير والرأي ويحترم دة وكونك معندكش المهارة دي فدة معناه انك محتاج تتعالج واني مش مفروض ادخل معاك في مناقشات منهكة ملهاش اي فايدة ولا اي لازمة
٤- انت حابب تاخد البهجة والانبساط من تحقيرك لطريقتي واسلوبي وتفكيري بس انا عارفة نفسي وامكانياتي وعارفة اني صح ومش حديك البهجة دي ابدا لاني مش حديك اي رد فعل
٥- غضبك عدواني ومكروه من الناس كلها مش مني انا بس ، وانا مبقتش اخاف من غضبك دة لاني فهمت ان سببه الضعف (شوفي حلقة ٧ حاجات بتخوف النرجسي جدا وهي السبب الرئيسي للغضب النرجسي) .
٦- انت متخيل انك حتقدر تكسرني وتخليني دمية تحقق لك رغباتك وتتنازل عن حقوقها وحريتها ودة تفكير مريض وانا حعرف اقاومه
٧- مهما كان ذكائك ومهاراتك الا انها منفعتكش في نموك العاطفي وفضلت متوقف عند طفل عمره اربع سنوات
٨- ممكن تكون متخيل انك حتقدر تحطمني بحملات التشويه اللي بتعملها لي ، دة عمره ماحيحصل لان الناس اللي بتهمني فاهميني كويس وعارفين انا ايه وعمرهم ماحيتأثروا بحملاتك دي
٩- انا مش ححاول اغيرك ولا اعالجك لان دي مش شغلتي ، في نفس الوقت رأيي في نفسي مش حستمده منك ابدا ولا حتأثر ابدا برأيك فيا
١٠- في الحقيقة انا مشفقة على طريقتك اللاانسانية في الحياة
١١- انا عارفة انك محبط بسببي عشان انت دايما شايف اني عندي حاجات كتير مش عندك وانت متخيل انها مفروض تكون عندك لان انت اولى واحق بيها من اي حد زي ثقتي في نفسي واحترامي لذاتي وحناني و مشاعري وتعاطفي مع الاخرين وايجابيتي وانت مش قادر تكون كدة بس انا مليش ذنب في كل دة وانت مش قادر تفهم دة وان مشكلتك جواك انت
لازم طول الوقت تفكري نفسك بطبيعة الشخص اللي انتي عايشة معاه وبتتعاملي معاه ، لازم طول الوقت تكوني فاهمة ان مشكلته مش معاكي هو مشكلته مع نفسه

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11