٨ علامات لرابطة الصدمة ، د. راماني
يعني ايه رابطة الصدمة ؟ رابطة الصدمة دي عبارة عن تكون رابطة بين المسيء والمساء اليه وبتحصل بسبب ان الجهاز النفسي بيحرك مشاعر المساء اليه في اتجاه المسيء عشان يدافع عن نفسه بشكل لا ارادي ،بمعنى انك لما الشخص اللي معاكي يبدأ يوجه لك الاذى انتي بتخافي ويبدأ جهازك النفسي يشغل حيلة دفاعية عشان تخليكي في امان ، ايه هي الحيلة الدفاعية دي ، انك تتوافقي مع افكار وطلبات المعتدي دة وطبعا منطقيا (طبقا لجهازك النفسي) هو مش حيؤذيكي لما تعملي كدة ، في النهاية بيحصل ارتباط مرضي بينك وبين المؤذي وبيوصل لحد الادمان زي ادمان المخدرات بالظبط ودة مشروح بالتفصيل في حلقة (ايه سبب ادمانك للنرجسي ؟ وبيعمل ايه عشان يخليكي تدمنيه ؟ .. التشافي (٧) )
طيب ازاي تعرفي انك دخلتي في رابطة الصدمة دي؟ حقولك ٨ اعراض لو موجودين عندك تبقي في رابطة الصدمة ولازم تتخلصي منها
١- التبرير : النرجسي طول الوقت يؤذيكي وانتي طول الوقت تبرري تصرفاته وتقولي يمكن ضعف ، يمكن نزوة ، يمكن متعصب ، يمكن حد مزعله ، يمكن عنده مشكلة في الشغل ، ودة ناتج عن كلامه اللي بيقوله لكي وقت الهوفرينج طبعا انتي حياتي وانتي عمري وانا بعمل كدة عشان انتي ضعيفة وضايعة وانا خايف عليكي (جملة من لسان احدى الحالات) ، زي ماكان الاب او الام بيقول لك وانتي طفلة انا بضربك عشان بحبك وخايف عليك ، الموضوع بادئ معاكي من زمان اوي
٢- تصديق المستقبل المزيف اللي النرجسي طول الوقت بيوعد بيه واحيانا يتكلم عنه كأنه واقع من كتر مابيعيش في احلام اليقظة ، المهم ان هو بيوعدك بتحقيق احلامه اللي انتي فيها دميته الحبيبة وانتي بتفضلي مصدقاه لدرجة انك لو انفصلتي عنه احيانا تجتري ذكريات الوعود دي وتندمي انك مشيتي وماستنتيتيش تحققي معاه الاحلام المكذوبة دي
٣- تكرار المعركة مرارا وتكرارا وعدم الانسحاب او حتى الاستسلام ودة طبعا على امل ان المرة دي يعترف بغلطه او يفهم او يندم او يتغير ، ودي دائرة الامل المهلكة ، اللي دكتور راماني بتقول ويموت الامل في النهاية
٤- تفكير غير منطقي عن الشريك والعلاقة باكملها وحيرة اصلا وعدم قدرة على اتخاذ القرار واحساس بالرغبة في البقاء معاه ولو حد سألك انتي ليه مش بتسيبيه بتلاقيه نفسك معندكيش اجابة انتي نفسك مش عارفة ، بتلاقي نفسك بتقولي حاجة جوايا بتمنعني اسيبه انا مش عارفة اوصفها وهو انتي اصلا مش عارفاها مش مش عارفة توصفيها
٥- الخوف الدائم من انك تسيبيه وعلطول مترددة مش يمكن انا اللي غلطانة ، مش يمكن العيب فيا ، مش يمكن انا ظالماه ، مش يمكن انا مفترية وطماعة وهو مسكين مش عارف يكفيني ، ……
٦- طول الوقت تقولي لنفسك لو اجتهدت اكتر او لو حسنت نفسي في الحاجة الفلانية طيب لو خسيت شوية او لو تخنت شوية طيب اغير ستايل شعري ولبسي ، طيب اغير شخصيتي وابقى فرفوشة شوية طيب ابقى جادة شوية طيب ابقى مثقفة واقرأ في الحاجات اللي بيحبها طب اهتم بماتشات الكورة ولا باللعبة اللي بيحب يلعبها ع الموبايل ، طول الوقت فاكرة انك لو زودتي مجهودك هو حيكون كويس وحيتحسن معاكي ، دا غير انك عاملة له سكرتيرة ومدرسة لاولاده وطباخة ومديرة منزل وسواق للاولاد وممكن لاهله
٧- بتخفي احساسك ومشاعرك واحتياجاتك لانك متقدريش تعلنيهم او تطالبي بيهم من غير مايعمل عليكي هجوم ويقولك انتي مش بتحمدي ربنا ع النعمة ، او انتي اصلك فاضية ومش لاقية حاجة تقوليها ، او انتي بتحبي النكد وانتي متستاهليش اللي بعمله عشانك او انتي بتكفري العشير وهكذا فبتفضلي السكوت عشان تحافظي ع الهدوء وعلى العلاقة
٨- بتبرري السواد اللي انتي شايفاه في العلاقة دي للي يلاحظه وبتخبيه من اللي ملاحظش ، ومش بتحكي اي حاجة لاي حد عشان كدة مش بتحصلي على مساعدة ولا حد بيفوقك ولا يفهمك


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11