ازاي تحطي حدودك مع النرجسي ومع اي حد
١- افهمي الاول انتي بتتعاملي مع ايه ، النرجسي ضعيف جدا داخليا وحاسس بعدم الامان زي ما انتوا عارفين ، وكونك تستقلي عنه نفسيا فدة معناه انك ممكن تسيبيه في اي لحظة عشان كدة هو حريص على انه يكسر الحدود تماما ويسيطر عليكي ويتحكم فيكي عشان تفضلي معاه قلبا وقالبا ، فانتي ممكن بعد ماتتعافي وتقرري تستمري معاه وتبني حدود صحية بينك وبينه تبدأي تطمنيه من وقت للتاني انك متمسكة بيه ومش حتسيبيه ( بس دة يكون في وقت صفا وقعدة حلوة ومش كل شوية تعملي دة يعني متقوليش دة كتير عشان ميحسش انك ضعيفة وخايفة يسيبك فيلعب بيكي )
٢- افهمي حدودك اللي انتي عايزاها ، يعني مثلا حددي عدد الساعات اللي عايزة تقضيها او تتواجدي فيها معاه او اللي تقدري تتواجدي فيها معاه في اليوم سواء هو موجود في البيت باستمرار او لا ، ورتبي يومك على اساس كدة يعني تشغلي نفسك باقي اليوم باشياء مهمة تخص البيت والاولاد وشغلك واهلك واهله حتى ، بحيث ميبانش انك قاصدة تتهربي منه خليها تاخد شكل طبيعي ، ومتسمحيش لنفسك انك تتعدي الوقت اللي انتي مقرراه ، وكمان لازم تحددي وقت تقضيه مع نفسك وتلزمي الجميع باحترام الوقت دة (لو انتي تعافيتي حتقدري تنفذي دة )
٣- استمعي لمشاعرك ، يعني متهمليش احساسك ومشاعرك وتكبتيها مثلا لما تحسي بالغضب ادي نفسك فرصة تسمعي مشاعرك بتقول ايه زي مثلا تلاقي نفسك بتكلمي نفسك داخليا انا زهقت من معاملته دي ولازم اوقفه عند حده ، ولازم تتفقي مع نفسك على حلول ، يعني مثلا انك لما تخلصي التعافي والعلاج من التعلق المرضي حتاخدي قرار او حتقدري تواجهيه او ساعتها مش حيهمك اصلا كلامه ولا اساءة ادبه ، او انها فترة وحتخلص لما تقدري تشتغلي وتاخدي قرار الانفصال ولا البقاء وساعتها حتكوني اقوي وحتجبريه يغير سلوكه ، او انك تحكي الموقف اللي اغضبك لحد بتثقي فيه عشان تخرجي مشاعر الغضب وتتخلصي من جزء كبير منها ، المهم انك لازم تتعاملي مع مشاعرك وتهندليها ومتكبتيهاش لان كبت المشاعر وتجاهلها بيخليكي مع الوقت تتقبلي التصرفات السيئة منه وتتأقلمي معاها وبالتالي بتكون حدودك منتهكة وضعيفة .المشاعر مهمة لان هي اللي بتفهمك انتي تقدري تستحملي ايه ومتستحمليش ايه ، تقبلي ايه ومتقبليش ايه وهو دة اساس بناء الحدود
٤-تجاهلي اوامره المتعجرفة اللي الغرض منها التحكم والسيطرة لمجرد التحكم والسيطرة المرضية ( عشان تعملي الخطوة دي لازم تكوني تعافيتي وعندك مصدر رزق ولو بسيط )يعني مثلا متنزليش الساعة كذا وانزلي كذا ، متلبسيش دة والبسي دة ، متتواصليش مع فلانة ، متقبليش العرض الفلاني ، سيبي الكتاب اللي في ايدك دة ، ممنوع القراءة اصلا ، الغي اكونت الفيس بتاعك ، اعملي بلوك لفلانة ، او يفرض عليكي فكره او رأيه ولازم توافقيه عليه ، المفروض لو انتي بقيتي قوية ومعافاه تقولي له دة رأيك وانا بحترمه بس انا لي رأي تاني و حعمل الحاجة الفلانية بالشكل الفلاني ، لان انا مش حقاطع فلانة لاني مش مقتنعة ، لما تجربي الكلام دة في حاجات هايفة وملهاش تأثير على مصالح النرجسي حتشوفي انه مع الوقت حيستسلم وحيبدأ يحترم حدودك بس اتعلمي تقتلي الخوف ودة مش حيحصل الا ولو قتلتي الادمان والتعلق المرضي والاهتمام برأي الناس والناس حتفرح فيا والناس حتقول مطلقة والناس والناس ومحدش منهم عايش مأساتك ولا حاسس بيها ولامهتم بيكي انتي ليه تهتمي بيهم
٥- لازم تتعلمي تقولي لا خصوصا في الانشطة اليومية اللي بيفرضها عليكي ،مثلا انا مش بحب الافلام الحزينة ، مش بحب الماتشات ولا النشرة ، مش حابة اخرج ، مش عايزة كل يوم ازور اهلك خصوصا اللي ساكنين في بيت واحد لازم تتعلمي تقولي لا ، بس خدي بالك موضوع اهله دة خليه اخر حاجة لما الاول تعلميه انك مش حتعملي حاجة انتي مش عازة تعمليها في الحاجات الهايفة الاول وبعدين في الاخر موضوع اهله يعني ابدأي بالراحة وبعدين صعدي بالتدريج .
٦-شفتوا حلقة( لو ناوية تكملي حياتك مع النرجسي لازم تمشي على الخطة دي عشان تخلي حياتك اسهل) اتكلمنا فيها ازاي متشاركيش النرجسي احداثك الشخصية وايه الاخبار اللي تقوليها له وايه اللي متقوليهوش،اسمعي الحلقة دي كويس هي دي رقم٦
٧- لما يجيب سيرة الناس بسوء ماتنخرطيش معاه في الحوار ابدا ارضاء له ، الغلط غلط ومينفعش تعمليه عشانه ولا عشان غيره وهو طبعا حيكون عايزك توافقيه على كل حاجة صح وغلط ودي فرصة كويسة تتعلمي تقولي فيها لا من غير ما تمسي مصالح النرجسي فيكون رد فعله مش عنيف ويبدأ يتدرب على انك عندك حدود لازم يلزمها وانتي كمان تتدربي على انك تقولي لا
٨- ماتدافعيش عن نفسك لما يهينك او يتهمك بيني له انك واثقة من نفسك ومش مهتمة برأيه ، لان دفاعك عن نفسك بيبن ضعفك ويعرفه ايه اللي بيستفزك ودة بيكون زي ثقب في الحدود بتاعتك يدخل لك منه
٩- متحاوليش تبيني له اي نوع من انواع الحنية والاشتياق وانك عايزاه يقضي وقت معاكي والكلام دة كله لازم دة يكون بحساب مش تزني وتشتكي انه مش موجود ومش بيقعد معاكي ومش مهتم بيكي لان كل دة بيحسسه انه بيمتلكك طالما امتلك مشاعرك وكمان بيفتح حدودك بدون حساب طالما انتي بالضعف لدرجة تتحايلي على حد مش عايز يتواجد معاكي او مش مهتم انه يتواجد معاكي دة معناه انك قابلة فكرة انك مش فارقة معاه وكمان بتتحايلي عليه انك تكوني فارقة معاه ( اللي مش متأكدة ان جوزها نرجسي متعملش كدة)
١٠- لازم تقضي وقت كافي مع ناس اسوياء ولازم يكون عندك علاقات سوية مع ناس فاهماكي ومقدرة قيمتك ومؤمنين بيكي وبقدراتك وبطيبة قلبك ومتستسلميش للعزلة اللي هو فرضها عليكي ، دكتور محمد طه بيقول العلاقة السامة نقدر نعالج نتيجتها بعلاقة صحية
حلقة رقم (٦) https://youtu.be/O8Z6HnI_ZVw
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11